ദേശീയ റെക്കോഡ് തിരുത്തി ജിന്‍സണ്‍ ജോണ്‍സണ്‍ ലോക ചാമ്പ്യന്‍ഷിപ്പിന്

1500 മീറ്ററില്‍ സ്വന്തം പേരിലുള്ള ദേശീയ റെക്കോഡ് തിരുത്തി മലയാളി താരം ജിന്‍സണ്‍ ജോണ്‍സണ്‍. ബെര്‍ലിനില്‍ നടന്ന ISTAF ചാമ്പ്യന്‍ഷിപ്പിലാണ് ജിന്‍സന്‍ ദേശീയ റെക്കോഡ് മറികടന്ന പ്രകടനത്തോടെ ലോകചാമ്പ്യന്‍ഷിപ്പിന് യോഗ്യത നേടിയത്. 3:35.24 സെക്കന്റില്‍ ഫിനിഷ് ചെയ്ത ജിന്‍സണ്‍ അമേരിക്കയുടെ ജോഷ്വ തോംസണ് പിന്നില്‍ രണ്ടാമതായാണ് ഫിനിഷ് ചെയ്തത്.

മുന്‍ റെക്കോഡിനേക്കാള്‍ രണ്ട് സെക്കന്റിലേറെ കുറവുവരുത്തിയാണ് 28കാരനായ ജിന്‍സണ്‍ പുതിയ റെക്കോഡ് സ്ഥാപിച്ചത്. ഗോള്‍ഡ് കോസ്റ്റ് കോമണ്‍വെല്‍ത്ത് ഗെയിംസില്‍ കഴിഞ്ഞ വര്‍ഷം സ്ഥാപിച്ച 3:37.86 ആയിരുന്നു മുന്‍ റെക്കോഡ്. 800 മീറ്ററിലും ദേശീയ റെക്കോഡ് ജിന്‍സന്റെ പേരിലാണ്(1:45.65)

ദോഹയില്‍ സെപ്തംബര്‍ 28 മുതല്‍ ഒക്ടോബര്‍ ആറ് വരെയാണ് ലോക അത്‌ലറ്റിക് ചാമ്പ്യന്‍ഷിപ്പ് നടക്കുക. ലോക ചാമ്പ്യന്‍ഷിപ്പിന് 3:36.00 ആയിരുന്നു യോഗ്യതാ മാര്‍ക്ക്.

ദേശീയ റെക്കോഡ് തിരുത്തുമെന്ന് പ്രതീക്ഷിച്ചിരുന്നെങ്കിലും വെള്ളിമെഡല്‍ പ്രതീക്ഷിച്ചിരുന്നില്ലെന്നും ലോക ചാമ്പ്യന്‍ഷിപ്പിനുള്ള ഒരുക്കങ്ങള്‍ക്കായി അമേരിക്കയിലേക്ക് പോകുമെന്നും ജിന്‍സണ്‍ മത്സരശേഷം പറഞ്ഞു. ദേശീയ റെക്കോഡ് തിരുത്തിയതില്‍ സന്തോഷമുണ്ടെന്നും 2020 ലെ ടോക്യോ ഒളിംപിക്‌സില്‍ മികച്ച പ്രകടനമാണ് ലക്ഷ്യമെന്നും ജിന്‍സണ്‍ പറഞ്ഞു.