പലിശ നിരക്ക് വർധിപ്പിച്ച് യുഎസ് ഫെഡറൽ റിസർവ്; ഇന്ത്യൻ വിപണിയെ ബാധിക്കുന്നതെങ്ങനെ?

വാഷിംഗ്‌ടൺ ഡിസി: മൂന്ന് വർഷത്തെ ഇടവേളയ്ക്ക് ശേഷം അമേരിക്കൻ കേന്ദ്ര ബാങ്കായ ഫെഡറൽ റിസർവ് അടിസ്ഥാന പലിശ നിരക്കുകൾ വർധിപ്പിച്ചിരിക്കുകയാണ്. കാൽ ശതമാനത്തിന്റെ (0.25%) വർധനവാണ് ഫെഡ് ഇപ്പോൾ പ്രഖ്യാപിച്ചിരിക്കുന്നത്. ഇതോടെ അമേരിക്കയിലെ പലിശ നിരക്ക് 3.75 ശതമാനത്തിനും 4 ശതമാനത്തിനും ഇടയിലായി. അമേരിക്കൻ സമ്പദ്‌വ്യവസ്ഥയെ വലിയ പ്രതിസന്ധിയിലാക്കുന്ന പണപ്പെരുപ്പവും ഇന്ധന വിലക്കയറ്റവും നിയന്ത്രിക്കുക എന്നതാണ് ഈ അടിയന്തര തീരുമാനത്തിന് പിന്നിലെ പ്രധാന ലക്ഷ്യം. അമേരിക്കയിൽ നടക്കാനിരിക്കുന്ന നിർണായകമായ ഇടക്കാല തെരഞ്ഞെടുപ്പിന് ആഴ്ചകൾ മാത്രം ബാക്കിനിൽക്കെയാണ് ഈ സുപ്രധാന സാമ്പത്തിക ഇടപെടൽ ഉണ്ടായിരിക്കുന്നത്.

പണപ്പെരുപ്പവും നിരക്ക് വർധനവിന് പിന്നിലെ കാരണങ്ങളും

ഇറാൻ യുദ്ധം മൂലമുണ്ടായ ഭീമമായ ചെലവുകളാണ് ആഗോള വിപണിയിൽ അമേരിക്കക്ക് വലിയ പ്രത്യാഘതങ്ങൾ സൃഷ്ടിക്കുന്നത്. ഈ യുദ്ധത്തിനായി ഇതുവരെ 3800 കോടി ഡോളർ ചെലവായതായാണ് കോൺഗ്രഷണൽ ബജറ്റ് ഓഫീസിന്റെ പുതിയ റിപ്പോർട്ട് വ്യക്തമാക്കുന്നത്. ഇതിന്റെ ഫലമായി ക്രൂഡ് ഓയിൽ വില കുതിച്ചുയരുകയും ബ്രെന്റ് ക്രൂഡ് വില ബാരലിന് 109 ഡോളറിനടുത്തെത്തുകയും ചെയ്തു. ഇതിന് പുറമെ അമേരിക്കയിലെ പെട്രോൾ, ഡീസൽ വിലയിലുണ്ടായ വൻ വർധനവ് അവിടുത്തെ പണപ്പെരുപ്പം കൂടുതൽ രൂക്ഷമാക്കി. ഡീസൽ വില കഴിഞ്ഞ വർഷത്തേക്കാൾ ഇരട്ടിയായി ഉയർന്നത് ചരക്കുകടത്ത് ചെലവുകൾ വർധിപ്പിക്കാനും നിത്യോപയോഗ സാധനങ്ങളുടെ വില ഉയരാനും കാരണമായിട്ടുണ്ട്.

വിലക്കയറ്റം രൂക്ഷമായതോടെ ആഗസ്റ്റ് മാസത്തിൽ ഉപഭോക്തൃ വില സൂചികയിൽ 0.4 ശതമാനത്തിന്റെ വർധനവ് രേഖപ്പെടുത്തി. നിലവിൽ അമേരിക്കയിലെ വാർഷിക പണപ്പെരുപ്പം 3.4 ശതമാനമായി തുടരുകയാണ്. ഈ പ്രതിസന്ധിഘട്ടത്തിലാണ് പണപ്പെരുപ്പം ഫെഡിന്റെ ലക്ഷ്യമായ രണ്ട് ശതമാനത്തിലേക്ക് എത്തിക്കാൻ പലിശ നിരക്ക് വർധിപ്പിക്കാൻ ഫെഡറൽ റിസർവ് ചെയർമാൻ കെവിൻ വാർഷിന്റെ നേതൃത്വത്തിലുള്ള സമിതി നിർബന്ധിതരായത്. പലിശ നിരക്ക് ഒരു ശതമാനത്തിലോ അതിൽ താഴെയോ ആയി കുറയ്ക്കണമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് ശക്തമായി ആവശ്യപ്പെട്ടിരുന്നെങ്കിലും, ഈ സമ്മർദ്ദങ്ങൾക്ക് വഴങ്ങാതെയാണ് ഫെഡ് നിരക്ക് കൂട്ടാൻ തീരുമാനിച്ചത്.

ഇന്ത്യൻ ഓഹരി വിപണിയിലുണ്ടാകുന്ന പ്രത്യാഘാതങ്ങൾ

യുഎസ് ഫെഡിന്റെ പലിശ നിരക്ക് വർധനവ് ഇന്ത്യൻ ഓഹരി വിപണിയെയും സാമ്പത്തിക മേഖലയെയും നേരിട്ട് ബാധിക്കുന്ന ഒന്നാണ്. അമേരിക്കയിൽ പലിശ നിരക്ക് ഉയരുമ്പോൾ അവിടുത്തെ ട്രഷറി ബോണ്ടുകളിൽ നിക്ഷേപിക്കുന്നത് കൂടുതൽ ലാഭകരവും സുരക്ഷിതവുമായി മാറും. നിലവിൽ പത്ത് വർഷത്തെ അമേരിക്കൻ ട്രഷറി യീൽഡ് പത്തൊൻപത് വർഷത്തെ ഏറ്റവും ഉയർന്ന നിരക്കായ 5.02 ശതമാനത്തിൽ എത്തിയിട്ടുണ്ട്. ഇത് ഇന്ത്യ പോലുള്ള വികസ്വര വിപണികളിൽ നിന്നും വിദേശ നിക്ഷേപകർ തങ്ങളുടെ പണം വലിയ തോതിൽ പിൻവലിക്കാൻ കാരണമാകും. ഇത്തരം കൊഴിഞ്ഞുപോക്കുകൾ ഇന്ത്യൻ ഓഹരി വിപണിയിൽ വിലയിടിവ് സൃഷ്ടിക്കാൻ ഇടയാക്കും.

വിദേശ നിക്ഷേപകർ ഇന്ത്യൻ വിപണിയിൽ നിന്നും പണം പിൻവലിക്കുന്നത് ഡോളറിനെതിരെ രൂപയുടെ മൂല്യം ഇടിയാനും കാരണമാകും. രൂപ ദുർബലമാകുന്നത് ഇന്ത്യയുടെ ഇറക്കുമതി ചെലവുകൾ, പ്രത്യേകിച്ച് ക്രൂഡ് ഓയിൽ ഇറക്കുമതി, വലിയ തോതിൽ വർധിപ്പിക്കും. ഇത് രാജ്യത്തെ ആഭ്യന്തര പണപ്പെരുപ്പം ഉയർത്താൻ കാരണമായേക്കാം. കൂടാതെ, വിദേശ വിപണികളിൽ നിന്ന് ഫണ്ട് സ്വരൂപിക്കുന്ന ഇന്ത്യൻ കമ്പനികൾക്ക് വരും നാളുകളിൽ കൂടുതൽ പലിശ നൽകേണ്ടി വരുന്നതിനാൽ അത് അവരുടെ പ്രവർത്തന ലാഭത്തെയും വിപുലീകരണത്തെയും പ്രതികൂലമായി ബാധിച്ചേക്കാം.

ആർക്കൊക്കെ നേട്ടമുണ്ടാകും?

രൂപയുടെ മൂല്യത്തകർച്ച സാധാരണക്കാരുടെ ജീവിതച്ചെലവ് വർധിപ്പിക്കുമെങ്കിലും ചില മേഖലകൾക്ക് ഇത് വലിയ രീതിയിൽ ഗുണകരമാകാറുണ്ട്. പ്രധാനമായും, വിദേശത്ത് ജോലി ചെയ്യുന്ന പ്രവാസികൾ ഇന്ത്യയിലേക്ക് പണമയക്കുമ്പോൾ അവർക്ക് കൂടുതൽ രൂപ ലഭിക്കാൻ ഇത് കാരണമാകും. കൂടാതെ, ഐടി, ഫാർമസ്യൂട്ടിക്കൽസ്, ടെക്സ്റ്റൈൽസ് തുടങ്ങി കയറ്റുമതിയെ വലിയ തോതിൽ ആശ്രയിക്കുന്ന കമ്പനികൾക്കും ഇതൊരു നേട്ടമാണ്. ഈ സാഹചര്യത്തിൽ വിദേശ വിപണിയിൽ അവരുടെ ഉൽപ്പന്നങ്ങൾക്ക് ഡിമാൻഡ് വർധിക്കുകയും അതുവഴി കമ്പനികളുടെ വരുമാനം കൂടുകയും ചെയ്യുന്നു.

നിക്ഷേപകർ ആശങ്കപ്പെടേണ്ടതുണ്ടോ?

പലിശ നിരക്ക് ഉയർത്തുന്നത് സാധാരണയായി ഓഹരി വിപണികളിൽ ഇടിവ് സൃഷ്ടിക്കാറുണ്ടെങ്കിലും, നിലവിലെ സാഹചര്യത്തിൽ പെട്ടെന്നുള്ള ഒരു വലിയ തകർച്ചയ്ക്ക് ഇത് കാരണമാകാൻ സാധ്യതയില്ല. ഫെഡ് നിരക്ക് വർധിപ്പിക്കാനുള്ള സാധ്യത സാമ്പത്തിക വിദഗ്ധരും വിപണി നിരീക്ഷകരും നേരത്തെ തന്നെ പ്രവചിച്ചിരുന്നു. അതിനാൽ ഓഹരി വിപണി ഈ മാറ്റം മുൻകൂട്ടി കണ്ട് വിലകളിൽ ആവശ്യമായ തിരുത്തലുകൾ ഇതിനകം തന്നെ വരുത്തിയിട്ടുണ്ട്. എങ്കിലും, നിലവിലെ ആഗോള യുദ്ധസാഹചര്യങ്ങളും ഇന്ധന വിലയിലെ കുതിപ്പും തുടർന്നുള്ള ദിവസങ്ങളിൽ വിപണിയിൽ ചാഞ്ചാട്ടങ്ങൾ സൃഷ്ടിച്ചേക്കാം. ഈ വർഷം അവസാനത്തോടെ ഒരു തവണ കൂടി പലിശ നിരക്ക് കൂട്ടാൻ സാധ്യതയുണ്ടെന്ന് ഫെഡ് സൂചന നൽകിയിട്ടുണ്ട്. അതിനാൽ വരും ദിവസങ്ങളിലെ സാമ്പത്തിക മാറ്റങ്ങൾ വിലയിരുത്തിക്കൊണ്ട് മാത്രമേ നിക്ഷേപകർ വിപണിയിൽ ഇടപെടാൻ പാടുള്ളൂ.