പണം ലാഭിക്കാം, ചെലവുകൾ കുറയ്ക്കാം; ഇംപൾസ് പർച്ചേസിങ്ങിനും ക്രെഡിറ്റ് കാർഡ് കെണികൾക്കും വിട; എന്താണ് '48 ഹവർ റൂൾ'?, നിങ്ങൾക്കും പരീക്ഷിക്കാം

ഇന്നത്തെ തിരക്കേറിയ ജീവിതത്തിൽ പണം ചെലവഴിക്കുന്നത് എത്രത്തോളം എളുപ്പമായി മാറിയിരിക്കുന്നുവോ, അത്രത്തോളം തന്നെ ബുദ്ധിമുട്ടാണ് അത് നിയന്ത്രിക്കുക എന്നതും. മൊബൈൽ ഫോൺ തുറക്കുമ്പോഴേക്കും ഷോപ്പിങ് ആപ്പുകളുടെ നോട്ടിഫിക്കേഷനുകളും, സോഷ്യൽ മീഡിയയിൽ കാണുന്ന ഓഫറുകളും, "ലിമിറ്റഡ് ടൈം സെയിൽ" പോലുള്ള സന്ദേശങ്ങളും നമുക്ക് ചുറ്റും വളയുന്നു.

ഒരു ക്ലിക്കിലൂടെയാണ് പേയ്‌മെന്റ് നടക്കുന്നത്. എത്രവേ​ഗമാണ് കൈയിലെ പണം നഷ്ടപ്പെട്ടതെന്ന് അറിയുകപോലുമില്ല. അതുകൊണ്ടാണ് ഇന്നത്തെ കാലത്ത് 'ഇംപൾസ് സ്പെൻഡിങ്' (Impulse spending) അഥവാ ചിന്താശൂന്യമായ പണം ചെലവഴിക്കൽ എന്നത് ഒരു വലിയ പ്രശ്നമായി മാറിയിരിക്കുന്നത്.

ഈ ഇംപൾസ് ചെലവഴിക്കൽ രീതി പതുക്കെപ്പതുക്കെ നമ്മുടെ സമ്പാദ്യത്തെയും നിക്ഷേപത്തെയും വിഴുങ്ങും. ഡിജിറ്റൽ പേയ്‌മെന്റുകളും ക്രെഡിറ്റ് കാർഡുകളും കാരണം പണം നഷ്ടപ്പെടുന്നതിന്റെ പ്രശ്നം പെട്ടെന്ന് അറിയണമെന്നില്ല, എന്നാൽ മാസാന്ത്യത്തിൽ അക്കൗണ്ട് പരിശോധിക്കുമ്പോൾ ബജറ്റ് പൂർണ്ണമായും താളംതെറ്റിയതായി കാണാം. ഇത്തരമൊരു സാഹചര്യത്തിൽ, ചെലവുകൾ നിയന്ത്രിക്കുന്നതിനായി വളരെ ലളിതവും ഫലപ്രദവുമായ ഒരു മാർ​ഗമുണ്ട് – അതാണ് '48 ഹവർ റൂൾ' (48 Hour Rule).

ഇംപൾസ് പർച്ചേസിങ് ഒരു ഭീഷണിയായി മാറുന്നത് എന്തുകൊണ്ട്?

മുൻകൂട്ടി യാതൊരുവിധ പ്ലാനിംഗും ഇല്ലാതെ പെട്ടെന്നുള്ള തോന്നലിൽ എന്തും വാങ്ങുക എന്നതാണ് ഇംപൾസ് പർച്ചേസിങ് (Impulse purchasing) കൊണ്ട് അർത്ഥമാക്കുന്നത്. പലപ്പോഴും നമുക്ക് ആവശ്യമില്ലാത്ത സാധനങ്ങളാണ് വാങ്ങിക്കൂട്ടാറുള്ളത്. സോഷ്യൽ മീഡിയയുടെ അൽഗോരിതം നമുക്ക് ഇഷ്ടപ്പെടാൻ സാധ്യതയുള്ള കാര്യങ്ങൾ കൃത്യമായി കാണിച്ചുതരുന്നു, ഇത് കാണുമ്പോൾ മനസ്സ് പെട്ടെന്ന് തന്നെ അത് വാങ്ങാൻ ആവശ്യപ്പെടുന്നു. തുടക്കത്തിൽ ഈ ചെലവ് വളരെ ചെറുതായി തോന്നാമെങ്കിലും, ഇത്തരം ചെറിയ ചെലവുകൾ ദിവസേന സംഭവിക്കുമ്പോൾ, വർഷാവസാനമാകുമ്പോഴേക്കും അത് വളരെ വലിയൊരു തുകയായി മാറും.

ക്രെഡിറ്റ് കാർഡുകൾ ചെലവുകളെ കൂടുതൽ അപകടകരമാക്കുന്നു

ഇംപൾസ് ചെലവഴിക്കലിന്റെ ഏറ്റവും വലിയ കൂട്ടാളി ക്രെഡിറ്റ് കാർഡുകളാണ്. കാർഡ് ഉപയോഗിച്ച് പണമടയ്ക്കുമ്പോൾ കൈയിൽ നിന്ന് പണം പോകുന്നില്ലല്ലോ എന്ന് തോന്നും, എന്നാൽ ഇതിന്റെ യഥാർഥ ആഘാതം അറിയുന്നത് ബിൽ വരുമ്പോഴാണ്. പലപ്പോഴും ആളുകൾ ബില്ലിന്റെ മിനിമം തുക മാത്രം അടയ്ക്കുകയും ബാക്കി തുകയ്ക്ക് വലിയ തോതിൽ പലിശ ഈടാക്കാൻ തുടങ്ങുകയും ചെയ്യുന്നു. ഇത് ചെലവുകൾക്കൊപ്പം കടബാധ്യതയും വർധിപ്പിക്കുകയും വ്യക്തിയെ ഒരു കടക്കെണിയിലേക്ക് തള്ളിവിടുകയും ചെയ്യുന്നു.

എന്താണ് '48 ഹവർ റൂൾ' (48 Hour Rule)?

വളരെ ലളിതമായ ഒരു നിയമമാണിത്. അത്യാവശ്യമല്ലാത്ത ഏതെങ്കിലും ഒരു സാധനം വാങ്ങുന്നതിന് മുൻപ് 48 മണിക്കൂർ, അതായത് 2 ദിവസം കാത്തിരിക്കുക എന്നതാണ് ഇതിന്റെ അർഥം. രണ്ടു ദിവസത്തിനു ശേഷവും ആ സാധനം നിങ്ങൾക്ക് ശരിക്കും ആവശ്യമുള്ളതാണെന്ന് തോന്നുകയാണെങ്കിൽ, നിങ്ങൾക്ക് അത് വാങ്ങാം. എന്നാൽ ഭൂരിഭാഗം കേസുകളിലും അത് വാങ്ങാനുള്ള ആഗ്രഹം തനിയെ ഇല്ലാതാകാറാണ് പതിവ്.

ഈ നിയമം നിങ്ങളെ പണം ചെലവഴിക്കുന്നതിൽ നിന്ന് പൂർണമായി തടയുന്നില്ല, പകരം ആലോചിച്ച് മാത്രം പണം ചെലവഴിക്കുന്ന ഒരു ശീലം നിങ്ങളിൽ വളർത്തിയെടുക്കുന്നു. പലചരക്ക് സാധനങ്ങൾ, വൈദ്യുതി ബിൽ, പെട്രോൾ, മരുന്നുകൾ തുടങ്ങിയ ദൈനംദിന അവശ്യസാധനങ്ങളൊന്നും ഈ നിയമത്തിന്റെ പരിധിയിൽ വരുന്നതല്ല. എന്നാൽ പുതിയ മൊബൈൽ, വസ്ത്രങ്ങൾ, ചെരുപ്പുകൾ, ഗാഡ്‌ജെറ്റുകൾ, സബ്‌സ്‌ക്രിപ്ഷനുകൾ അല്ലെങ്കിൽ പെട്ടെന്നുള്ള ഓൺലൈൻ ഷോപ്പിംഗുകൾ എന്നിവ തീർച്ചയായും ഇതിന്റെ പരിധിയിൽ വരും.

48 മണിക്കൂർ കാത്തിരിക്കുന്നത് കൊണ്ടുള്ള പ്രയോജനം എന്ത്?

ഈ 48 മണിക്കൂർ സമയം, നമ്മൾ ചെയ്യാൻ പോകുന്ന ചെലവ് നമ്മുടെ ജീവിതത്തിൽ ശരിക്കും ഉപകാരപ്പെടുമോ ഇല്ലയോ എന്ന് ചിന്തിക്കാനുള്ള അവസരം നൽകുന്നു. പലപ്പോഴും ഇന്ന് അത്യാവശ്യമെന്ന് തോന്നുന്ന ഒരു കാര്യം രണ്ട് ദിവസത്തിന് ശേഷം തികച്ചും ആവശ്യമില്ലാത്തതായി തോന്നാം. ഇതാണ് ഈ നിയമത്തിന്റെ ഏറ്റവും വലിയ കരുത്ത്.

ഇംപൾസ് സ്പെൻഡിങ് വൈകാരികമാകുന്നത് എന്തുകൊണ്ട്?

ഭൂരിഭാഗം ഇംപൾസ് പർച്ചേസുകളും സന്തോഷം, വിരസത, മാനസിക സമ്മർദ്ദം അല്ലെങ്കിൽ FOMO (Fear Of Missing Out - മറ്റുള്ളവർക്ക് ലഭിക്കുന്നത് തനിക്ക് നഷ്ടപ്പെടുമോ എന്ന ഭയം) എന്നിവ കാരണം സംഭവിക്കുന്നതാണ്. ഓഫർ ഇന്ന് മാത്രം, അവസാന സ്റ്റോക്ക് തുടങ്ങിയ സന്ദേശങ്ങൾ തിടുക്കത്തിൽ തീരുമാനങ്ങളെടുക്കാൻ നമ്മെ പ്രേരിപ്പിക്കുന്നു. 48 മണിക്കൂർ കാത്തിരിക്കുമ്പോൾ ഈ വികാരങ്ങൾ അടങ്ങുകയും കൂടുതൽ വിവേകത്തോടെ തീരുമാനമെടുക്കാൻ നമുക്ക് സാധിക്കുകയും ചെയ്യും.

'48 ഹവർ റൂൾ' എങ്ങനെ ജീവിതത്തിൽ പകർത്താം?

ഈ നിയമം പിന്തുടരാൻ ഏറ്റവും എളുപ്പമുള്ള മാർ​ഗെ നിങ്ങളുടെ മൊബൈലിൽ 'ബൈ ലേറ്റർ' എന്ന പേരിൽ ഒരു ലിസ്റ്റ് തയാറാക്കുക എന്നതാണ്. എന്തെങ്കിലും വാങ്ങാൻ തോന്നുമ്പോൾ അത് പെട്ടെന്ന് വാങ്ങാതെ ഈ ലിസ്റ്റിലേക്ക് മാറ്റുക. അതിൽ എന്താണ് വാങ്ങേണ്ടത്, അതിന്റെ വില എത്രയാണ്, ഏത് തീയതിയിലാണ് ലിസ്റ്റിൽ ചേർത്തത് എന്നിവ എഴുതി വെക്കുക. രണ്ട് ദിവസത്തിന് ശേഷം ആ ലിസ്റ്റ് വീണ്ടും പരിശോധിക്കുക. അപ്പോൾ അത്യാവശ്യമെന്ന് കരുതിയ പല കാര്യങ്ങളും ഇപ്പോൾ ഒട്ടും ആവശ്യമില്ലാത്തതായി തോന്നുന്നത് കണ്ട് നിങ്ങൾ തന്നെ അത്ഭുതപ്പെടും.

'48 ഹവർ റൂൾ' പതുക്കെപ്പതുക്കെ നിങ്ങളുടെ സാമ്പത്തിക ജീവിതത്തെ മാറ്റിമറിക്കും. നിങ്ങൾ അനാവശ്യ കാര്യങ്ങൾ വാങ്ങുന്നത് കുറയ്ക്കുകയും കൂടുതൽ പ്രധാനപ്പെട്ട ലക്ഷ്യങ്ങൾക്കായി പണം സമ്പാദിക്കാൻ തുടങ്ങുകയും ചെയ്യും. ഇത് നിങ്ങളുടെ സമ്പാദ്യം വർധിപ്പിക്കുകയും, എസ്‌ഐ‌പികളും (SIP) നിക്ഷേപങ്ങളും ശക്തമാക്കുകയും പണത്തെക്കുറിച്ചുള്ള മാനസിക സമ്മർദ്ദം കുറയ്ക്കുകയും ചെയ്യും.