ഇന്ത്യക്കും ഗൾഫ്​ സഹകരണ കൗൺസിൽ രാഷ്ട്രങ്ങൾക്കുമിടയിലെ ഉഭയകക്ഷി നിക്ഷേപത്തിൽ വർധന

2011ൽ 4.7 ശതമാനമായിരുന്ന നിക്ഷേപ പങ്കാളിത്തം കഴിഞ്ഞ വർഷം അവസാനത്തോടെ 16.2 ശതമാനമായാണ്​ ഉയർന്നത്

ഇന്ത്യക്കും ഗൾഫ്​ സഹകരണ കൗൺസിൽ രാഷ്ട്രങ്ങൾക്കുമിടയിലെ ഉഭയകക്ഷി നിക്ഷേപത്തിൽ വർധനയെന്ന്​ റിപ്പോർട്ട്​. 2011ൽ 4.7 ശതമാനമായിരുന്ന നിക്ഷേപ പങ്കാളിത്തം കഴിഞ്ഞ വർഷം അവസാനത്തോടെ 16.2 ശതമാനമായാണ്​ ഉയർന്നത്.
നിക്ഷേപ ബാങ്കിങ്​ സ്ഥാപനമായ ആൽപെൻ ക്യാപിറ്റൽ തയാറാക്കിയ ജി.സി.സി ഇന്ത്യ കോറിഡോറിലെ നിക്ഷേപ അവസരങ്ങളും വെല്ലുവിളികളും എന്ന റിപ്പോർട്ടിലാണ് ഇക്കാര്യമുള്ളത്.

ഗൾഫ്​ സഹകരണ രാഷ്ട്രങ്ങളുടെ ഇന്ത്യയിലെ നിക്ഷേപമാകട്ടെ 0.7 ശതമാനത്തിൽ നിന്ന്​ 2.95 ശതമാനമായും വർധിച്ചു. ജിസിസി രാഷ്ട്രങ്ങളിലെ മൊത്തം വിദേശ നിക്ഷേപത്തിൽ കുറവുരേഖപ്പെടുത്തിയ സമയത്താണ്​ ഇന്ത്യയിൽ നിന്നുള്ള നിക്ഷേപത്തിൽ പ്രതിവർഷം നിശ്ചിത ശതമാനമെന്ന തോതിൽ ഉയർച്ചയുണ്ടായത്​. ജിസിസി രാഷ്ട്രങ്ങളും ഇന്ത്യയും തമ്മിൽ സാംസ്കാരികവും വാണിജ്യപരവും സാമ്പത്തിക, പ്രതിരോധ മേഖലകളിൽ എല്ലാമുള്ള ചരിത്രപരമായ പങ്കാളിത്തം വർധിപ്പിക്കുകയാണെന്ന്​ ആൽപെൻ ക്യാപിറ്റൽ എക്സിക്യൂട്ടീവ്​ ചെയർമാൻ രോഹിത്​ വാലിയ പറയുന്നു. കേവലം വ്യാപാരത്തിന്​ അപ്പുറത്ത്​ തന്ത്രപരമായ സഹകരണത്തിലൂടെയുള്ള വളർച്ചാ സാധ്യതകൾ ഇരുകക്ഷികളും മനസിലാക്കിയതായും അദ്ദേഹം കൂട്ടിച്ചേർത്തു. എണ്ണ പ്രകൃതി വാതകം, ഭക്ഷ്യ സംസ്കരണം, ഹെൽത്ത്​കെയർ, വിദ്യാഭ്യാസം, അടിസ്ഥാന സൗകര്യം എന്നീ മേഖലകളിലാണ്​ ഇന്ത്യൻ നിക്ഷേപകർ കൂടുതലായി മുതൽമുടക്കുന്നതെന്നും റിപ്പോർട്ട്​ പറയുന്നു.