ഖത്തറിനെ വിമര്‍ശിച്ച് സൗദി അനുകൂല രാജ്യങ്ങൾ

യുഎൻ മനുഷ്യാവകാശ സമിതിക്കു മുമ്പാകെ ഖത്തർ ഉന്നയിച്ച ആരോപണങ്ങൾക്കുള്ള മറുപടിയെന്ന നിലക്കാണ്​ സൗദി അനുകൂല രാജ്യങ്ങളുടെ വിശദീകരണം.

ഗൾഫ്​ പ്രതിസന്ധിയെ അന്താരാഷ്ട്ര ​പ്രശ്നമാക്കി മാറ്റാനുള്ള ഖത്തർ നീക്കം അപലപനീയമാണെന്ന്​ സൗദി അനുകൂല രാജ്യങ്ങൾ. അപ്രധാനമായ ഒരു പ്രശ്നത്തിന്​ ആഗോള സ്വഭാവം നൽകാനുള്ള നീക്കം വിജയിക്കില്ലെന്നും ചതുർ രാജ്യങ്ങൾ വ്യക്തമാക്കി. യുഎൻ മനുഷ്യാവകാശ സമിതിക്കു മുമ്പാകെ ഖത്തർ ഉന്നയിച്ച ആരോപണങ്ങൾക്കുള്ള മറുപടിയെന്ന നിലക്കാണ്​ സൗദി അനുകൂല രാജ്യങ്ങളുടെ വിശദീകരണം.

ചതുർ രാജ്യങ്ങൾക്കു വേണ്ടി യുഎൻ മനുഷ്യാവകാശ സമിതിയുടെ പ്രത്യേക സെഷനു മുമ്പാകെ യുഎഇയുടെ സ്ഥിരം പ്രതിനിധി ഉബൈദ്​ സാലിം അൽ സഅബിയാണ്​ ഖത്തറിനെതിരെ നിശിതവിമർശം ഉൾക്കൊള്ളുന്ന വിശദീകരണം നൽകിയത്​. ലോക പിന്തുണ കിട്ടാൻ പ്രശ്നത്തെ ഖത്തർ പെരുപ്പിച്ചു കാട്ടുകയാണ്​. കുവൈത്ത്​ അമീറിന്റെ മധ്യസ്ഥതയിൽ തുടരുന്ന സമവായ ചർച്ചകളിലൂടെ പ്രശ്ന പരിഹാരം ഉറപ്പാക്കാനാണ്​ ഖത്തർ തുനിയേണ്ടത്​. രാഷ്ട്രീയ പ്രശ്ന പരിഹാരം പ്രാദേശിക തലത്തിൽ തന്നെ രൂപപ്പെടുകയാണ്​ വേണ്ടതെന്നും ചതുർ രാജ്യങ്ങൾ വ്യക്തമാക്കി.

തീവ്രവാദം ഉൾപ്പെടെയുള്ള സുപ്രധാന വിഷയങ്ങളിൽ അന്താരാഷ്ട്ര ചട്ടങ്ങളും ഗൾഫ്​ കൂട്ടായ്മയുടെ നയപരിപാടികളും ഉൾക്കൊണ്ട്​ പ്രവർത്തിക്കുന്നതിനു പകരം നിഷേധാത്മക നിലപാടാണ്​ ഖത്തർ സ്വീകരിക്കുന്നതെന്നും സൗദി അനുകൂല രാജ്യങ്ങൾ കുറ്റപ്പെടുത്തി. ഒരേസമയം വിരുദ്ധ നിലപാടുകളുമായി ഖത്തറിന്​ നീങ്ങാൻ പറ്റില്ല. തീവ്രവാദത്തെ പിന്തുണക്കുന്ന നിലപാട്​ തീർത്തും ഉപേക്ഷിക്കാതെ പ്രശ്നപരിഹാരം ഉണ്ടാകില്ല. അതുവരെ ഖത്തറുമായുള്ള ബന്ധം വിച്ഛേദിക്കാനുള്ള തങ്ങളുടെ പരമാധികാരം ഉയർത്തി പിടിക്കുമെന്നും ചതുർ രാജ്യങ്ങൾ ആവർത്തിച്ചു വ്യക്തമാക്കി.