സൈക്കിളുകൾ ആറാടിയ ദുബൈ റൈഡിന്​ പരിസമാപ്​തി

നഗരത്തിലെ പ്രധാനപാത നിറയെ സൈക്കിളുകൾ കീഴടക്കിയ ദുബൈ റൈഡിന്​ പരിസമാപ്​തി. ഒരു മാസം നീണ്ടുനിൽക്കുന്ന ദുബൈ ഫിറ്റ്​നസ്​ചലഞ്ചിന്‍റെ ഭാഗമായാണ്​ ദുബൈ റൈഡ്​ അര​ങ്ങേറിയത്​. കുട്ടികൾ ഉൾപ്പെടെ ആയിരങ്ങളാണ്​ റൈഡിൽ ഭാഗഭാക്കായത്​.

പുലർച്ചെ തന്നെ ശൈഖ്​സായിദ്​ റോഡിൽ സൈക്കിൾ കൊണ്ട്​ നിറഞ്ഞിരുന്നു. അഞ്ച് ​മണി മുതൽ ഏഴര വരെയാണ്​ റൈഡ്​ തീരുമാനിച്ചിരുന്നതെങ്കിലും അതിന്​ മണിക്കൂറുകൾക്ക് ​മുമ്പേ സൈക്കിളുടെ പ്രവാഹം ആരംഭിച്ചു. ദുബൈ നഗരത്തിന്‍റെ വിവിധ ഭാഗങ്ങളിലെ അഞ്ച്​ ഗേറ്റുകൾ മുഖേനയാണ് ​റൈഡർമാരെ പ്രവേശിപ്പിച്ചത്​.

റൈഡിന്റെ ഭാഗമായി ശൈഖ്​ സായിദ്​ റോഡിൽ മറ്റു വാഹനങ്ങളെ വിലക്കിയിരുന്നു.​​. കേരള റൈഡർമാരുടെ കൂട്ടായ്മയായ ഡി.എക്സ്​.ബി റൈഡേഴ്​സ്​, കേരള റൈഡേഴ്​സ്​ എന്നിവയും അണിനിരന്നു.

ദുബൈ മ്യൂസിയം ഓഫ്​ ഫ്യൂച്ചർ, ​ബുർജ് ​ഖലീഫ, ഡൗൺ ടൗൺ, വാട്ടർ കനാൽ എന്നിവയ്ക്ക്​ മുമ്പിലൂടെയായിരുന്നു ​യാത്ര. കുട്ടികൾക്കും കുടുംബങ്ങൾക്കുമായി പ്രത്യേക റൂട്ട്​ ക്രമീകരിച്ചിരുന്നു.​ 12 കിലോമീറ്റർ ശൈഖ്​സായിദ്​ റോഡ്​റൂട്ടും നാല്​ കിലോമീറ്റർ ഡൗൺ ടൗൺ റൂട്ടും എന്ന നിലയ്ക്കായിരുന്നു ക്രമീകരണം. അനുകൂല കാലാവസ്ഥ കാരണം കുട്ടികൾ വരെ ആവേശത്തോടെയാണ്​ റൈഡിന്റെ ഭാഗമായത്​.

ഏതാണ്ട്​ 35,000ഓളം പേർ റൈഡിൽ പ​​ങ്കെടുത്തുവെന്നാണ്​ കണക്ക്​. റൈഡ്​ വൻ വിജയമാക്കിയ സ്​പോർട്​സ്​ ​പ്രേമികളെ സംഘാടകർ അഭിനന്ദിച്ചു.