യു.എ.ഇ യാത്രാവിലക്ക് സൗദി പിൻവലിച്ചതോടെ പുത്തനുണർവ് പ്രതീക്ഷിച്ച് ഗൾഫ് വിപണി

യു.എ.ഇയിൽ നിന്നുള്ള യാത്രാവിലക്ക്​ സൗദി പിൻവലിച്ചത്​ ഗള്‍ഫ് വിപണിയില്‍ ഉണര്‍വുണ്ടാക്കും.

നേരത്തെ സൗദി യാത്രക്കാർ ഇടത്താവളമാക്കിയിരുന്നത് യു.എ.ഇ ആയിരുന്നു. യാത്രാവിലക്കിനെ തുടർന്ന് ​മറ്റു രാജ്യങ്ങള്‍ വഴിയാണ് ഇന്ത്യക്കാര്‍ ഉള്‍പ്പെടെ സൗദിയിലേക്ക് പോയിരുന്നത്​.

യു.എ.ഇക്കും സൗദിക്കും ഇടയിൽ മാസങ്ങളായി നിലനിന്ന യാത്രാവിലക്കാണ്​ അവസാനിക്കുന്നത്​. കോവിഡ്​ പ്രതിസന്ധി കുറഞ്ഞതോടെ നിയന്ത്രണങ്ങൾ യു.എ.ഇ ഏറെക്കുറെ പിൻവലിച്ച ഘട്ടത്തിൽ തന്നെയാണ്​ സൗദി യാത്രയും സുഗമമാകുന്നത്​.

ഖത്തർ, സെർബിയ, മാലിദ്വീപ്​ തുടങ്ങിയ രാജ്യങ്ങളെ ഇടത്താവളങ്ങളാക്കി മാറ്റിയത്​ മലയാളികൾ ഉൾപ്പെടെ ഇന്ത്യക്കാർക്ക്​ വലിയ സാമ്പത്തിക ചെലവിന്​ ഇടയാക്കിയിരുന്നു. ഹോട്ടൽ ക്വാറന്‍റൈൻ വ്യവസ്​ഥകളാണ്​ സൗദിയാത്ര വലിയ പണച്ചെലവുള്ള ഒന്നാക്കി മാറ്റിയത്​.

ട്രാൻസിറ്റ്​ യാത്ര എളുപ്പമാക്കിയും വിസാ ഓൺ അറൈവൽ സംവിധാനം ഏർപ്പെടുത്തിയും സൗദി യാത്രക്കാരെ പരമാവധി ആകർഷിക്കാനുള്ള ഒരുക്കത്തിലാണ്​ യു.എ.ഇ. ഇന്ത്യയെ റെഡ്​ ലിസ്​റ്റിൽ നിന്ന്​ മാറ്റാത്ത സാഹചര്യത്തിൽ രണ്ടാഴ്​ചക്കാലം സൗദി യാത്രക്കാർ യു.എ.ഇയിൽ തങ്ങേണ്ടി വരും. സുഹൃത്തുക്കൾക്കും ബന്ധുക്കൾക്കുമൊപ്പം തങ്ങി സൗദിയിലേക്ക്​ പോകാൻ നൂറുകണക്കിനാളുകളാണ്​ടിക്കറ്റിനായി സമീപിക്കുന്നതെന്ന്​ ട്രാവൽ ഏജൻസികൾ അറിയിച്ചു. സൗദി സെക്​ടർ സജീവമാകുന്നത്​ ഹോട്ടൽ, ടൂറിസം വിപണിക്കും മെച്ചമാകും. അടുത്ത മാസം ഒന്നുമുതൽ ദുബൈയിൽ വേൾഡ്​ എക്​സ്​പോ ആരംഭിക്കാനിരിക്കെ, ലോക രാജ്യങ്ങളിൽ നിന്നുളള സന്ദർശക പ്രവാഹത്തിനാകും യു.എ.ഇ സാക്ഷ്യം വഹിക്കുക. ആയിരക്കണക്കിന്​ സന്ദർശക വിസകളാണ്​ യു.എ.ഇ ഇപ്പോള്‍ അനുവദിച്ചു വരുന്നത്​.