ലക്ഷ്യം കൂടുതല്‍ വിപണി; പുതിയ എണ്ണപ്പാത തുറന്ന് ഇറാന്‍

എണ്ണ കപ്പലുകൾക്ക്​ സുരക്ഷിത പാതയൊരുക്കി ഇറാൻ. ഹോർമുസ്​ കടലിടുക്ക്​ ഒഴിവാക്കി പുതിയ ടെർമിനൽ തുറന്നതിലൂടെ ഇറാ​ന്‍റെ എണ്ണ വിപണനം ഗണ്യമായി വർധിക്കും എന്നാണ്​ വിലയിരുത്തൽ. ഉപരോധം മറികടന്ന്​ ചൈന ഉൾപ്പെടെയുള്ള രാജ്യങ്ങൾക്ക്​ കൂടുതൽ എണ്ണ വിൽക്കാൻ ഇറാൻ തുനിയുമെന്ന ആശങ്കയിലാണ്​ അമേരിക്ക.

ഗൾഫ്​ ഓഫ്​ ഒമാനിലാണ്​ ഇറാൻ ആദ്യ ഓയിൽ ടെർമിനൽ തുറന്നത്​. പ്രസിഡൻറ്​ പദവിയിൽ നിന്ന്​ വിരമിക്കുന്ന ഹസൻ റൂഹാനിയാണ്​ ഇതു സംബന്​ധിച്ച പ്രഖ്യാപനം നടത്തിയത്​. ഇതോടെ ​ ഹോർമൂസ്​ കടലിടുക്ക്​ മറികടന്ന്​ ഗൾഫ്​ ഓഫ്​ ഒമാൻ മുഖേന ഇറാ​ന്‍റെ കപ്പലുകൾക്ക്​ സഞ്ചരിക്കാൻ സാധിക്കും. പ്രാദേശിക സംഘർഷങ്ങൾക്കിടയാക്കിയ ഹോർമുസ്​ കടലിടുക്ക്​ മുഖേനയുള്ള ഇറാ​ന്‍റെ എണ്ണവ്യാപാരം പല ഘട്ടങ്ങളിലും പ്രതിസന്​ധി സൃഷ്​ടിച്ചിരുന്നു.

സുപ്രധാന ചുവടുവെപ്പ്​ എന്ന നിലയിലാണ്​ തെഹ്​റാൻ പുതിയ പാതയെ നോക്കി കാണുന്നത്​. ഇറാന്​ ഇനി സുരക്ഷിതമായി എണ്ണ കയറ്റുമതി ചെയ്യാൻ സാധിക്കുമെന്ന്​ റൂഹാനി പ്രതികരിച്ചു..100 ടൺ എണ്ണയുമായി ഇറാ​ന്‍റെ എണ്ണകപ്പൽ പുതിയ റൂട്ടിലൂടെ സഞ്ചാരം ആരംഭിക്കുകയും ചെയ്​തു.

ദിനംപ്രതി 10 ലക്ഷം ബാരൽ എണ്ണ പുതിയ പാതയിലൂടെ കയറ്റുമതി ചെയ്യാനാണ്​ ഇറാൻ ലക്ഷ്യമിടുന്നത്​. ഹോർമുസ്​ കടലിടുക്കിന്​ തെക്കായി ഗൾഫ്​ ഓഫ്​ ഒമാനിലെ ജാസ്​ക്​ തുറമുഖത്തിനു സമീപമാണ്​ പുതിയ ടെർമിനൽ.

അടുത്തിടെ ചൈനക്ക്​ വൻതോതിൽ എണ്ണ വിറ്റതായ റിപ്പോർട്ട്​ പുറത്തുവന്നതോടെ ഇറാനു മേൽ പുതിയ ഉപരോധം ഏർപ്പെടുത്തുമെന്ന്​ അമേരിക്ക മുന്നറിയിപ്പ്​ നൽകിയിരുന്നു. അതേ സമയം ആണവ കരാർ സംബന്​ധിച്ച വിയന്ന ചർച്ചയെ പുതിയ സംഭവവികാസങ്ങൾ ബാധിക്കില്ലെന്നാണ്​ യൂറോപ്യൻ രാജ്യങ്ങളുടെ പ്രതീക്ഷ.