കുവൈത്തിൽ വീണ്ടും വ്യാജ മദ്യ നിർമാണം; മൻഗഫിൽ മൂന്ന് പ്രവാസികൾ പിടിയിൽ

കുവൈത്ത് സിറ്റി: കുവൈത്തിൽ അനധികൃതമായി മദ്യം നിർമിച്ച 3 പ്രവാസികൾ പിടിയിൽ. വ്യാജ മദ്യനിർമാണ കേന്ദ്രങ്ങൾക്കെതിരെയ രാജ്യത്ത് ശക്തമായ നടപടികൾ സ്വീകരിക്കുന്നതിനിടയിലാണ് മൻഗഫ് മേഖലയിൽ നിന്നും ഒരു രഹസ്യ മദ്യനിർമാണ കേന്ദ്രം കൂടി കണ്ടെത്തിയത്. ഹവല്ലി ഗവർണറേറ്റ് ഇൻവെസ്റ്റിഗേഷൻ വിഭാഗത്തിലെ സാൽമിയ ഇൻവെസ്റ്റിഗേഷൻ യൂണിറ്റാണ് റെയ്ഡ് നടത്തിയത്.

മൻഗഫിലെ ഒരു കെട്ടിടത്തിന്റെ ബേസ്‌മെന്റിൽ അനധികൃതമായി മദ്യം നിർമിക്കുന്നുണ്ടെന്ന രഹസ്യവിവരത്തെ തുടർന്ന് നടത്തിയ അന്വേഷണത്തിലാണ് സംഘം ഈ കേന്ദ്രം കണ്ടെത്തിയത്. രഹസ്യ നിരീക്ഷണത്തിലൂടെ വിവരം സ്ഥിരീകരിച്ച ശേഷം പൊലീസ് റെയ്ഡ് നടത്തുകയായിരുന്നു.

റെയ്ഡിൽ മദ്യം നിർമ്മിക്കാൻ ഉപയോഗിക്കുന്ന ഉപകരണങ്ങളും അസംസ്‌കൃത വസ്തുക്കളും കണ്ടെത്തി. സ്ഥലത്തുണ്ടായിരുന്ന മൂന്ന് പ്രവാസികളെ പൊലീസ് അറസ്റ്റ് ചെയ്തു. ഇവരെ തുടർ നിയമനടപടികൾക്കായി ബന്ധപ്പെട്ട അധികാരികൾക്ക് കൈമാറി. പിടിച്ചെടുത്ത വസ്തുക്കൾ തെളിവായി സൂക്ഷിച്ചിട്ടുണ്ട്.

രാജ്യത്തുടനീളം അനധികൃത മദ്യനിർമാണ ശാലകൾക്കെതിരെ ക്രിമിനൽ സെക്യൂരിറ്റി സെക്ടർ ശക്തമായ പരിശോധനകളാണ് നടത്തിവരുന്നത്. ഇത്തരം കേന്ദ്രങ്ങളിൽ ഉൽപാദിപ്പിക്കുന്ന സുരക്ഷിതമല്ലാത്ത മദ്യം ഗുരുതരമായ ആരോഗ്യപ്രശ്‌നങ്ങൾക്ക് കാരണമാവുകയും, സമീപകാലത്ത് നിരവധി മരണങ്ങൾക്ക് വഴിവെക്കുകയും ചെയ്തിട്ടുണ്ട്.