സഹകരണം ശക്തമാക്കാൻ കുവൈത്തും തുർക്കിയും ധാരണയിൽ

കുവൈത്ത് സിറ്റി: കുവൈത്ത് അമീ‍‍ർ മിഷ്​ഗൽ അഹ്മദ് അസ്സബാഹുമായി തുർക്കി പ്രസിഡൻ്റ് റ‍ജബ് ത്വയ്യിബ് ഉർദു​ഗാനും പ്രതിനിധി സംഘവും നടത്തിയ ചർച്ചയിൽ വിവിധ മേഖലകളിലുള്ള സഹകരണ ബന്ധം ശക്തമാക്കാൻ ധാരണയായി. ദ്വിരാഷ്ട്ര ബന്ധങ്ങൾ അവലോകനം ചെയ്ത ചർച്ചയിൽ മാരിടൈം ട്രാൻസ്പോർട്ട് കരാറിൽ ഒപ്പുവെച്ചു.

ഈ കരാറിന് പുറമെ കപ്പൽ ജീവനക്കാരുടെ സർട്ടിഫിക്കറ്റുകൾ പരസ്പരം അം​ഗീകരിക്കുന്നത് സംബന്ധിച്ച് കുവൈത്ത് ആഭ്യന്തര മന്ത്രാലയവും തുർക്കി ​ഗതാ​ഗത മന്ത്രാലയവും ധാരണപത്രത്തിൽ ഒപ്പുവെച്ചു. അതോടൊപ്പം ഊർജ സഹകരണത്തിനുള്ള ധാരണത്രത്തിലും നേരിട്ടുള്ള നിക്ഷേപം പ്രോത്സാഹിപ്പിക്കുന്നതിലും ഇരു രാജ്യങ്ങളുടെയും അതത് വകുപ്പ് മന്ത്രിമാർ ധാരണപത്രങ്ങളിൽ ഒപ്പുവെച്ചു.