ലോക കേരള സഭാ സമ്മേളനം: പ്രവാസി പ്രശ്​നങ്ങൾ ചർച്ചയായില്ലെന്ന്​ ആക്ഷേപം

തിരുവനന്തപുരം: ഗൾഫ്​ മേഖലയിലെ സാധാരണ പ്രവാസികളുടെ പ്രശ്നങ്ങൾ ചർച്ച ചെയ്യുന്നതിൽ മൂന്നാമത്​ ലോക കേരള സഭാ സമ്മേളനം പരാജയമെന്ന് വിമർശനം. മുൻ സമ്മേളനങ്ങളിൽ കൈക്കൊണ്ട തീരുമാനങ്ങൾ നടപ്പാക്കുന്നിലും ലോക കേരള സഭ മുന്നോട്ടു പോയില്ലെന്ന വിമർശനവും ഗൾഫ് മേഖലയിൽ നിന്ന് ശക്തമാണ്​. കക്ഷി രാഷ്ട്രീയ താൽപര്യങ്ങൾക്കുപരിയായി ലോക കേരള സഭയുടെ ഘടന പൊളിച്ചെഴുതണമെന്ന ആവശ്യമാണ്​ പ്രവാസികൾക്കുള്ളത്​. ലോകത്തെങ്ങുമുള്ള മലയാളികളെ ചേർത്തു നിർത്തുക എന്ന നല്ല ആശയമാണ്​ ലോക കേരള സഭയുടേത്​. അതിനോട്​​ താൽപര്യം പുലർത്തുന്നവരാണ്​ പ്രവാസികളിൽ ഭൂരിഭാഗവും. എന്നാൽ ഗൾഫ്​ മേഖലയിലെയും മറ്റും തുച്ഛവരുമാനക്കാരായ പ്രവാസികളുടെ ജീവൽ പ്രശ്​നങ്ങൾ അർഹിക്കുന്ന പ്രാധാന്യത്തോടെ വിലയിരുത്താനും നടപടി സ്വീകരിക്കാനും ലോക കേരള സഭ തയാറായില്ലെന്നു കരുതുന്നവരാണ്​ അധികവും.

15 മുതൽ 30 കോടി വരെ ചെലവിട്ടാണ്​ മൂന്ന്​ ലോക കേരള സഭാ സമ്മേളനങ്ങൾ ഇതിനകം നടത്തിയത്​​. ഗൾഫിൽ കോവിഡ്​ ബാധിച്ചു മരിച്ച സാധാരണക്കാരുടെ കുടുംബങ്ങൾക്ക്​ അർഹമായ നഷ്​ടപരിഹാരം ഉറപ്പാക്കാനുള്ള അഭ്യർഥന പോലും സമ്മേളനത്തിൽ ഉയരാതെ പോയത്​ സങ്കടകരമാണെന്ന്​ ഗൾഫിലെ സാമൂഹിക പ്രവർത്തകർ അഭിപ്രായപ്പെട്ടു. പ്രവാസികളുമായി ബന്ധപ്പെട്ട ക്ഷേമ പദ്ധതികൾക്ക്​ കൂടുതൽ വിഹിതം അനുവദിക്കുക, തിരിച്ചെത്തിയ പ്രവാസികളുടെ പുനരധിവാസത്തിന്​ പദ്ധതി ആവിഷ്​കരിക്കുക ഉൾപ്പെടെയുള്ള ആവശ്യങ്ങളിലും അനുകൂല നടപടിയൊന്നും ഉണ്ടായില്ല. മൂന്നു വർഷം മുമ്പ്​ ദുബൈയിൽ സംഘടിപ്പിച്ച ലോക കേരള സഭയുടെ മേഖലാ സമ്മേളനത്തിൽ മുന്നോട്ടുവെച്ച കർമ പരിപാടികൾക്കും തുടർച്ച ഉണ്ടായില്ല. ഗൾഫ്​ മേഖലയിലെ പ്രതികൂല തൊഴിൽ സാഹചര്യം മുൻനിർത്തി സാധാരണ പ്രവാസികളുടെ ക്ഷേമം ലക്ഷ്യമാക്കിയുള്ള പുതിയ പദ്ധതികൾക്ക്​ തുടക്കം കുറിക്കണമെന്ന ആവശ്യവും ലക്ഷ്യം കണ്ടില്ല. നോർക്ക സംവിധാനത്തെ കുറേക്കൂടി പ്രവാസോൻമുഖമാക്കി മാറ്റുകയാണ്​ ഉടനടി സ്വീകരിക്കേണ്ട നടപടികളിൽ പ്രധാനം. പ്രവാസി ക്ഷേമത്തിനുള്ള വിഹിതം ഉയർത്താൻ സർക്കാർ തയാറാകണമെന്നും സാമൂഹിക പ്രവർത്തകർ ആവശ്യപ്പെടുന്നു.