ജലനിരപ്പ് 75%ത്തിലധികമായ അണക്കെട്ടുകളുടെ ഷട്ടർ തുറക്കും: ഒമാൻ ജലവിഭവ മന്ത്രാലയം

മസ്‌കത്ത്: സംഭരണശേഷിയുടെ 75 ശതമാനത്തിലധികം ജലനിരപ്പ് കവിഞ്ഞ അണക്കെട്ടുകളുടെ ഷട്ടറുകൾ തുറന്നു തുടങ്ങുമെന്ന് ഒമാൻ കൃഷി, മത്സ്യബന്ധന, ജലവിഭവ മന്ത്രാലയം. പുറത്തുവിടുന്ന വെള്ളം ഭൂഗർഭജല ജലാശയങ്ങൾ റീചാർജ് ചെയ്യുകയും അധിക അളവിൽ വരുന്ന വെള്ളം ഉൾക്കൊള്ളുകയുമാണ് നടപടിയുടെ ലക്ഷ്യം. ഒമാന്റെ വടക്കൻ ഗവർണറേറ്റുകളിലെ കാലാവസ്ഥാ പ്രത്യാഘാതങ്ങൾ കണക്കിലെടുത്താണ് നടപടിയെന്നും മന്ത്രാലയം വ്യക്തമാക്കി.

മഴയുടെ തീവ്രത ഇനിയും വർധിക്കുമെന്നാണ് പ്രതീക്ഷിക്കുന്നത്. ഇത് വാദികളുടെ ശക്തമായ ഒഴുക്കിന് കാരണമാകും. അതിനാൽ അണക്കെട്ടിലെ ജലനിരപ്പ് കുറയ്ക്കുന്നത് സ്ഥിതിഗതികൾ നിയന്ത്രിക്കാൻ സഹായിക്കുകയും ഭൂഗർഭജല ശേഖരത്തിന് ഗുണം ചെയ്യുകയും ചെയ്യും. വാദികളിൽ നിന്ന് വിട്ടുനിൽക്കാനും സുരക്ഷാ നിർദേശങ്ങൾ കർശനമായി പാലിക്കാനും മന്ത്രാലയം പൗരന്മാരോടും താമസക്കാരോടും ഓർമിപ്പിച്ചു.