സമൂഹമാധ്യമങ്ങൾ വഴിയുള്ള മാർക്കറ്റിംഗ്: ഒമാനിൽ നിബന്ധനകൾ പ്രാബല്യത്തിൽ വന്നു

ഒമാനിൽ സമൂഹമാധ്യമങ്ങൾ വഴിയുള്ള മാർക്കറ്റിങ്ങിന് നിർദേശിച്ച നിബന്ധനകൾ പ്രാബല്യത്തിൽ വന്നു. വെബ്സൈറ്റുകളും , സോഷ്യൽ മീഡിയകളിലുമുള്ള ബിസിനസ് പ്രവർത്തനങ്ങൾ നിയന്ത്രിക്കുന്നതിനായിട്ടാണ് നിബന്ധനകൾ ഏർപ്പെടുത്തിയത്.

ഒമാനിൽ സമൂഹമാധ്യമങ്ങൾ വഴിയുള്ള ഉൽപന്നങ്ങളുടെയും സേവനങ്ങളുടെയും പ്രമോട്ടർമാർ വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയത്തിന്റെ വാണിജ്യ കാര്യ, ഇലക്ട്രോണിക് ട്രേഡ് വകുപ്പിൽനിന്നാണ് ലൈസൻസ് എടുക്കേണ്ടത്. ഇൻവെസ്റ്റ് ഈസി പോർട്ടലിലൂടെ ലൈസൻസിന് അപേക്ഷിക്കാം. ആവശ്യമായ രേഖകൾ സമർപ്പിച്ച് ഒരു വർഷം മുതൽ മൂന്ന് വർഷം വരെയുള്ള ലൈസൻസ് കാലയളവ് തിരഞ്ഞെടുക്കാം.

സന്നദ്ധ സേവനങ്ങൾ പോലുള്ള ലാഭേച്ഛയില്ലാത്ത പ്രവർത്തനങ്ങൾക്ക് ലൈസൻസ് നിർബന്ധമില്ല. അപേക്ഷ അംഗീകരിച്ചാൽ ഇ-മാർക്കറ്റിങ്ങിനും പ്രമോഷൻ പ്രവർത്തനങ്ങൾക്കുമായി ലൈസൻസ് നൽകും. വ്യവസ്ഥകൾ ലംഘിച്ചാൽ, 1000 റിയാലിൽ കവിയാത്ത അഡ്മിനിസ്ട്രേറ്റിവ് പിഴ, ഒരു വർഷത്തേക്ക് ലൈസൻസ് സസ്പെൻഡ് ചെയ്യുക, ലൈസൻസ് പൂർണമായി റദ്ദാക്കുക തുടങ്ങിയ കാര്യങ്ങൾക്കും ബന്ധപ്പെട്ടവർക്ക് അധികാരമുണ്ടാകും.