സൗദി വിമാനത്താവള ആക്രമണങ്ങളെ അപലപിച്ച് ഒമാൻ; സംയമനം പാലിക്കാൻ ആഹ്വാനം

മസ്‌കത്ത്: സൗദിയിലെ വിമാനത്താവളങ്ങൾക്ക് നേരെ നടന്ന ആക്രമണങ്ങളെ ഒമാൻ ശക്തമായി അപലപിച്ചു. സാധാരണക്കാർക്ക് ഭീഷണിയാകുന്ന ഇത്തരം നടപടികൾ മേഖലയിലെ സമാധാനാന്തരീക്ഷം തകർക്കുമെന്ന് ഒമാൻ വിദേശകാര്യ മന്ത്രാലയം മുന്നറിയിപ്പ് നൽകി. ജനവാസ കേന്ദ്രങ്ങളെയും സാധാരണ യാത്രാ വിമാനത്താവളങ്ങളെയും ലക്ഷ്യമിട്ടുള്ള അക്രമങ്ങൾ ഒരുതരത്തിലും അംഗീകരിക്കാനാവില്ലെന്ന് രാജ്യം വ്യക്തമാക്കി. സംഘർഷം കൂടുതൽ വഷളാകാതിരിക്കാൻ എല്ലാ കക്ഷികളും സംയമനം പാലിക്കണമെന്നും, വിവേകത്തോടെ പ്രശ്‌നങ്ങൾ പരിഹരിക്കണമെന്നും ഒമാൻ ആവശ്യപ്പെട്ടു. ഒപ്പം സൗദിയോടുള്ള പൂർണ ഐക്യദാർഢ്യം പ്രഖ്യാപിച്ച ഒമാൻ, കൊല്ലപ്പെട്ടവരുടെ കുടുംബങ്ങളെ അനുശോചനം അറിയിക്കുകയും പരിക്കേറ്റവർ എത്രയും വേഗം സുഖം പ്രാപിക്കട്ടെയെന്ന് ആശംസിക്കുകയും ചെയ്തു.

കഴിഞ്ഞ ഒക്ടോബർ ആറ്, ഏഴ് തീയതികളിലാണ് സൗദിയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിനും അബഹ വിമാനത്താവളത്തിനും നേരെ ആക്രമണമുണ്ടായത്. സംഭവത്തിൽ മൂന്ന് പേർ കൊല്ലപ്പെടുകയും 36 പേർക്ക് പരിക്കേൽക്കുകയും ചെയ്തതായി സൗദി സിവിൽ ഏവിയേഷൻ അധികൃതർ അറിയിച്ചു. റിയാദിലെ കിങ് ഖാലിദ് വിമാനത്താവളത്തിലുണ്ടായ ആക്രമണത്തിൽ ഒരാൾ കൊല്ലപ്പെടുകയും എട്ടുപേർക്ക് പരിക്കേൽക്കുകയും ചെയ്തു. എന്നാൽ അബഹ വിമാനത്താവളത്തിന് നേരെയുണ്ടായ ആക്രമണത്തിൽ രണ്ടുപേർ മരിക്കുകയും 28 പേർക്ക് പരിക്കേൽക്കുകയുമുണ്ടായി. വിമാനത്താവളങ്ങൾക്ക് സാരമായ നാശനഷ്ടങ്ങൾ സംഭവിച്ചിട്ടുണ്ട്.