ഒമാന്റെ ദുഖ്ം 2 റോക്കറ്റ് പരീക്ഷണ വിക്ഷേപണം നാളെ

മസ്‌കത്ത്: ഒമാന്റെ രണ്ടാമത്തെ പരീക്ഷണ റോക്കറ്റായ ദുഖം-2 ന്റെ വിക്ഷേപണം നാളെ (ശനിയാഴ്ച) ദുഖമിൽ നിന്ന് നടക്കും. രാത്രി 10നും പുലർച്ചെ 6നും ഇടയിലുള്ള സമയത്താണ് വിക്ഷേപണം നടത്താൻ ഒരുങ്ങുന്നത്. നാഷണൽ സ്‌പേസ് സർവീസസ് കമ്പനിയുടെ അനുബന്ധ സ്ഥാപനമായ ഇത്തലാഖ് കമ്പനിയുമായി സഹകരിച്ചാണ് ഈ ദൗത്യം.

സുരക്ഷാ മുൻകരുതലുകളുടെ ഭാഗമായി, വിക്ഷേപണ സമയത്ത് മത്സ്യത്തൊഴിലാളികളും മറ്റ് കടൽ യാത്രക്കാരും വിക്ഷേപണ മേഖലയിലേക്ക് പ്രവേശിക്കുന്നത് ഒഴിവാക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്. കോർഡിനേറ്റുകൾ വ്യക്തമാക്കിയ പ്രദേശത്തേക്ക് കപ്പൽ യാത്രയോ പ്രവേശനമോ പാടില്ലെന്ന് നിർദ്ദേശമുണ്ട്. പ്രതികൂല കാലാവസ്ഥയെ തുടർന്ന് ജൂലൈ 5-6 തീയതികളിൽ നടത്താനിരുന്ന വിക്ഷേപണം നേരത്തെ മാറ്റിവെച്ചിരുന്നു.

ഒമാനിലെ ബഹിരാകാശ പ്രവർത്തനങ്ങൾക്കായി ഒരു ദേശീയ ചട്ടക്കൂട് സ്ഥാപിക്കുന്നതിനുള്ള തുടർച്ചയായ ശ്രമങ്ങളുടെ ഭാഗമാണ് ഈ വിക്ഷേപണം. രാജ്യത്തിന്റെ ബഹിരാകാശ മേഖലയിലെ വളർച്ചക്ക് ഇത് വലിയ സംഭാവന നൽകും.

ഈ വർഷം അഞ്ച് റോക്കറ്റുകൾ വിക്ഷേപിക്കാൻ ഇത്തലാഖ് സ്‌പേസ്‌പോർട്ട് പദ്ധതിയിടുന്നുണ്ട്. ദുഖം-2 ന് പുറമെ ഒക്ടോബറിൽ ദുഖം-3, നവംബറിൽ അംബിഷൻ-3, ഡിസംബറിൽ ദുഖം-4 എന്നിവയും വിക്ഷേപിക്കും. കഴിഞ്ഞ വർഷം ഡിസംബറിൽ നടത്തിയ ആദ്യത്തെ പരീക്ഷണ വിക്ഷേപണം വിജയകരമായതോടെ ഒമാൻ ബഹിരാകാശ രംഗത്ത് ചരിത്രനേട്ടം കൈവരിച്ചിരുന്നു.