ഖത്തറില്‍ ഡ്രൈവറില്ലാ മിനിബസ്; പരീക്ഷണ ഓട്ടം തുടങ്ങി

ദോഹ: വളയം പിടിക്കാൻ ഡ്രൈവറില്ല, പ്രവർത്തനം പൂർണമായും ഓ​ട്ടോമാറ്റിക്​. റോഡുകളിലെ സിഗ്​നൽ പോയൻറുകൾ മുതൽ മറ്റുവാഹനങ്ങളെ മറികടക്കുന്നത്​ വരെ കണ്ടാൽ പെർഫക്ട്​​ ഓക്കെ. ഖത്തറിന്റെ വികസനക്കുതിപ്പിന്റെ പുതിയ അടയാളപ്പെടുത്തലായി ഡ്രൈവറില്ലാ ബസുകള്‍. ലെവൽ ഫോർ ടെക്​നോളജിയിൽ ചൈനീസ്​ കമ്പനിയായ യുടോങ്​ നിർമിച്ച ഈ ബസ്​ ഇപ്പോൾ പരീക്ഷണ ഓട്ടത്തിലാണ്, ഖത്തര്‍ ഫൌണ്ടേഷന്റെ കാമ്പസിലെ 3.1 കിലോ മീറ്റര്‍ ദൂരത്തിലാണ് പരീക്ഷണം, 25 കിലോമീറ്ററാണ് വേഗത. ഡ്രൈവറില്ലെങ്കിലും ഏത് സാഹചര്യവും നേരിടാന്‍ പരീക്ഷണ സമയത്ത് ഒരു ഇന്‍സ്ട്രക്ടര്‍ വാഹനത്തിലുണ്ടാകും.

പരീക്ഷണ വിജയം കണ്ടാൽ ഖത്തറിൻെറ നിരത്തുകളിൽ താരമാവുന്നത്​ ഈ കൊച്ചു ചൈനക്കാരനായി മാറും. നവംബർ 30ന്​ കിക്കോഫ്​ കുറിക്കുന്ന ഫിഫ ലോക​ കപ്പിന്​ ആരാധകരുടെ യാത്രക്ക്​ ലഭ്യമാക്കുക എന്ന ലക്ഷ്യത്തിലാണ്​ ഖത്തർ പൊതുഗതാഗത വിഭാഗമായ മുവാസലാത്ത്​. റഡാറുകളും, ലിഡാർ സംവിധാനങ്ങളും, ഏറ്റവും പുതിയ സാ​ങ്കേതിക വിദ്യയിലെ കാമറകളും ഉൾപ്പെടുന്നതാണ് ബസ്​. സഞ്ചാരപാതയിൽ കാമറയും റഡാറും ഉൾപ്പെടെയുള്ള സംവിധാനത്തിലൂടെ തടസ്സങ്ങളെ വേഗത്തിൽ തിരിച്ചറിഞ്ഞ്​ യാത്ര സുരക്ഷിതമാക്കും. 250 മീറ്റർ ദൂരക്കാഴ്​ച പിടിച്ചെടുക്കാനാവുന്നതാണ്​ കാമറ സംവിധാനം.

മിനിബസിൽ ഒരേസമയം എട്ടു പേർക്ക്​ യാത്രചെയ്യാം.‌‌‌ നിരത്തിലിറക്കുമ്പോള്‍ നാല്‍പത് കിലോമീറ്ററാകും വേഗം.