ദമ്മാം പ്രവാസി വെൽഫെയർ ചർച്ച സംവാദം സംഘടിപ്പിച്ചു

ദമ്മാം: പ്രവാസി വെൽഫെയർ ദമ്മാം റീജീയണൽ കമ്മറ്റി ഇന്ത്യൻ റിപ്പബ്ലിക് സമകാലിക ഇന്ത്യ എന്ന തലക്കെട്ടിൽ ചർച്ചയും സംവാദവും സംഘടിപ്പിച്ചു. പരിപാടിയിൽ വിഷയം അവതരിപ്പിച്ചു കൊണ്ട് റീജിയണൽ കമ്മറ്റി അംഗം അമീൻ വി.ചുനൂർ സംസാരിച്ചു. ഗുജറാത്ത് അടക്കമുള്ള എല്ലാ വംശഹത്യകളെയും നിരന്തരം ഓർമകൾക്ക് വിധേയമാക്കണമെന്നും ഇന്ത്യയിൽ നടന്ന നെല്ലി വംശഹത്യയും ഭഗൽപൂരും, ബാബരി മസ്ജിദും 1947 ന്റെ മുൻപുണ്ടായ ബീഹാർ കലാപവും ഗുജറാത്ത് വംശഹത്യയും വിസ്മരിച്ചുപോകേണ്ടതല്ലന്നും അദ്ധേഹം ഓർമിപ്പിച്ചു. വംശഹത്യകളുമായി ബന്ധപ്പെട്ട് ആർ എസ് എസ് നേതാക്കളായ ഭരണാധികാരികൾക്കുള്ള പങ്കിനെ എപ്പോഴും തുറന്നു കാട്ടേണ്ടതുണ്ട്. തെഹൽകയുടെ ആശിഷ് ഖേതന്റെ ജനുവരിയിൽ ഇറങ്ങിയ പുസ്തകം, റാണ അയ്യൂബിന്റെ ഗുജറാത്ത് ഫയൽസ്, വസ്തുതകൾ വ്യക്തമാക്കുന്ന ഡോക്യുമെന്ററികൾ തുടങ്ങിയവ ഉപയോഗിച്ച് വസ്തുതകൾ പ്രചരിപ്പിക്കേണ്ടതുണ്ട്.

ശേഷം നടന്ന ചർച്ചാ സംഗമത്തിൽ മഹമൂദ് പുക്കാട് (കെ.എം.സി.സി), സന്തോഷ് ഗോപനാരായണൻ (ബാംസഫ് സൗദി കമ്മറ്റി അംഗം) എന്നിവർ സംസാരിച്ചു. സമകാലിക ഇന്ത്യ നേരിടുന്ന ഫാഷിസ്റ്റ് കാലത്ത് ഇന്ത്യയുടെ റിപ്പബ്ലികിനെ തിരിച്ചുപിടിക്കാൻ ഇന്ത്യയിലെ മുഴുവൻ ജനങ്ങളും തയ്യാറകണമെന്നും മൌലികാവകാശങ്ങളെ കരിനിയമങ്ങള്‍ ഉപയോഗിച്ച് റദ്ദ് ചെയ്യുകയും ഭരണഘടനാസ്ഥാപനങ്ങളെ ദുര്‍ബലപ്പെടുത്തി അട്ടിമറിക്കുകയും ചെയ്യുന്ന അപ്രഖ്യാപിത അടിയന്തിരാവസ്ഥയാണ് മോദി ഭരണകൂടം നടപ്പിലാക്കുന്നത് എന്നും. ഭരണഘടനയെ അതിന്റെ മൂല്യങ്ങളെ അട്ടിമറിക്കുന്ന തരത്തില്‍ പ്രയോഗവല്‍ക്കരിക്കുന്നതിനെതിരെയും ഭരണകൂടത്തിന്റെ സമഗ്രാധിപത്യ സ്വഭാവത്തിനെതിരെയും കൃത്യമായ പ്രതിഷേധ സ്വരങ്ങൾ ഉയർന്ന് വരണമെന്നും അഭിപ്രായപ്പെട്ടു.

ഷക്കീർ ബിലാവിനകത്ത് സമാപനം പ്രഭാഷണം നിർവഹിച്ചു. 1947 ഓഗസ്റ്റ് 15-ലെ ഇന്ത്യൻ സ്വാതന്ത്ര്യത്തിന് ശേഷം ബാബാ സാഹേബ് ഡോക്ടർ ബി.ആർ.അംബേദ്കറുടെ നേതൃത്വത്തിൽ തയ്യാറാക്കിയ ഇന്ത്യയുടെ പരമോന്നത ഭരണഘടന നിലവില്‍ വന്ന ദിവസമാണ് ജനുവരി 26. ഭരണഘടന മൂല്യങ്ങൾ ഉയർത്തിപ്പിടിച്ച് ഭരണഘടന ഉറപ്പു നൽകിയ സാമൂഹിക നീതിയിലധിഷ്ഠിതമായ ഭരണ നിർവ്വഹണ വഴിയിൽ രാജ്യത്തിന് എത്ര ദൂരം സഞ്ചരിക്കാൻ കഴിഞ്ഞു എന്നത് വിലയിരുത്തേണ്ട ദിനം കൂടിയാണ് റിപ്പബ്ലിക് ദിനം.

സാമൂഹിക നീതിക്ക് പകരം വിവേചനങ്ങളെ സാമൂഹിക വ്യവസ്ഥയാക്കി മാറ്റുന്ന അത്തരം എല്ലാ മേൽക്കോയ്മ ശ്രമങ്ങൾക്കെതിരെയും പൊരുതാനുള്ള പ്രേരണ കൂടി റിപ്പബ്ലിക് ദിനം നമുക്ക് പകർന്നു നൽകുന്നുണ്ട് എന്നും അദ്ധേഹം ഓർമിപ്പിച്ചു. സംഘ് പരിവാറിന് ഇന്ത്യൻ ഭരണഘടനയോട് എന്നും അലർജിയായിരുന്നു. ഭരണഘടനയുടെ ആത്മാവായ സാമൂഹിക നീതിയും സമത്വവും എല്ലാ മത വിഭാഗങ്ങൾക്കും അന്തസ്സോടെ ജീവിക്കാൻ കഴിയുന്ന സാഹചര്യവും സംഘപരിവാറിനു ഉൾക്കൊള്ളാൻ കഴിയില്ല.

അതുകൊണ്ടാണ് കിട്ടാവുന്ന എല്ലാ അവസരങ്ങളും ഉപയോഗിച്ച് ഇന്ത്യൻ ഭരണഘടനയെ ഇല്ലാതാക്കാൻ സംഘപരിവാർ ശ്രമിക്കുന്നത്. ഇത്തരം ഒരു ഘട്ടത്തിൽ ഇന്ത്യൻ ഭരണഘടനയെ നമുക്ക് കൂടുതൽ ശക്തിപ്പെടുത്തേണ്ടതുണ്ട് എന്നും അദ്ധേഹം പറഞ്ഞു.

റീജിയണൽ കമ്മറ്റി പ്രസിഡൻ്റ് അബ്ദുറഹീം തിരൂർക്കാട് അദ്ധ്യക്ഷത വഹിച്ചു. റഊഫ് ചാവക്കാട് സ്വാഗതവും ജനറൽ സെക്രട്ടറി ബിജു പൂതകുളം, വിവിധ ജില്ലാ റീജിയണൽ കമ്മറ്റി അംഗങ്ങളായ ഫൈസൽ കുറ്റിയാടി, ഷബീർ ചാത്തമംഗലം, സമീഉള്ള കൊടുങ്ങല്ലൂർ, തൻസീം കണ്ണൂർ, ജാബിർ, ജമാൽ പയ്യന്നൂർ, ആഷിഫ് കൊല്ലം, ജംഷാദലി കണ്ണൂർ, അയ്മൻ, ഷരീഫ് കൊച്ചി, സിദ്ധീഖ് ആലുവ, അനീസ മെഹബൂബ്, സജ്ന സക്കീർ, സുനില സലീം, ഫാത്തിമ ഹാഷിം, അബ്ദുള്ള സൈഫുദ്ധീൻ, ഷമീം കണ്ണൂർ എന്നിവർ നേതൃത്വം നൽകി.