മഴ മുന്നറിയിപ്പുകൾ ഇനി നേരത്തെ അറിയാം; ക്ലൈമറ്റ് മാപ്പ് അവതരിപ്പിച്ച് സൗദി ദേശീയ കാലാവസ്ഥാ കേന്ദ്രം

റിയാദ്: കാലാവസ്ഥാ നിരീക്ഷണം കൂടുതൽ കാര്യക്ഷമമാക്കുന്നതിനും പൊതുജനങ്ങൾക്ക് നേരത്തെ തന്നെ കാലാവസ്ഥയുമായി ബന്ധപ്പെട്ട മുന്നറിയിപ്പുകൾ നൽകുന്നതിന്റെ ഭാ​ഗമായി ക്ലൈമറ്റ് മാപ്പുകൾ അവതരിപ്പിച്ച് സൗദി ദേശീയ കാലാവസ്ഥാ കേന്ദ്രം. കൃത്രിമ ഉപ​ഗ്രഹങ്ങളിൽ നിന്നുള്ള വിവരങ്ങളുടെ അടിസ്ഥാനത്തിലാണ് കേന്ദ്രം മാപ്പ് തയാറാക്കുന്നത്. ഇതിന്റെ ആദ്യ ഘട്ടത്തിൽ ഏപ്രിൽ മാസത്തെ ക്ലൈമറ്റ് മാപ്പ് പുറത്തിറക്കിയിട്ടുണ്ട്.

തെക്കുപടിഞ്ഞാറൻ, പടിഞ്ഞാറൻ ഉയർന്ന പ്രദേശങ്ങളിലാണ് ഏപ്രിലിൽ ഏറ്റവും കൂടുതൽ മഴ ലഭിക്കുകയെന്നാണ് മാപ്പിൽ സൂചിപ്പിക്കുന്നത്. അതേസമയം രാജ്യത്തിന്റെ മധ്യമേഖലയിൽ മഴ കുറവായിരിക്കും. രാജ്യത്തിന്റെ ബാക്കി ഭാഗങ്ങളിൽ വ്യത്യസ്ത അളവുകളിലായിരിക്കും മഴ ലഭിക്കുക. മാപ്പ് നൽകുന്ന വിവരങ്ങളുടെ അടിസ്ഥാനത്തിൽ കാലാവസ്ഥാ വ്യതിയാനങ്ങളെ സംബന്ധിച്ച് നേരത്തെ അറിയാനും ആവശ്യമായ സുരക്ഷാ മുൻകരുതലുകൾ സ്വീകരിക്കാനും ബന്ധപ്പെട്ട അതോറിറ്റികൾക്ക് സാധിക്കും.