അറബ് രാജ്യങ്ങളിൽ നാളെ മുതൽ വേനൽക്കാലം ആരംഭിക്കും

റിയാദ്: അറബ് രാജ്യങ്ങളിലും ഭൂമിയുടെ ഉത്തരാർദ്ധഗോളത്തിലും നാളെ മുതൽ ഔദ്യോഗികമായി ഗോളശാസ്ത്രപ്രകാരം വേനൽക്കാലം ആരംഭിക്കുമെന്ന് ജിദ്ദ അസ്ട്രോണമിക്കൽ സൊസൈറ്റി അറിയിച്ചു. നാളെ മക്ക സമയം പകൽ 11:24-ന് സൂര്യൻ ട്രോപിക് ഓഫ് കാൻസറിന് നേരെ മുകളിൽ വരുന്നതോടെയാണ് 'ഉത്തരായനാന്തം' ‌സംഭവിക്കുന്നത്.

വർഷത്തിലെ ഏറ്റവും ദൈർഘ്യമേറിയ പകലും ഏറ്റവും ദൈർഘ്യം കുറഞ്ഞ രാത്രിയുമായിരിക്കും ഉത്തരായനാന്ത ദിനത്തിലുണ്ടാവുകയെന്ന് ജിദ്ദ അസ്ട്രോണമിക്കൽ സൊസൈറ്റി മേധാവി എഞ്ചിനീയർ മാജിദ് അബു സഹ്ര വിശദീകരിച്ചു. ഈ ദിവസം സൂര്യൻ വടക്ക്-കിഴക്കേ അറ്റത്തുനിന്ന് ഉദിച്ച് വടക്ക്-പടിഞ്ഞാറേ അറ്റത്ത് അസ്തമിക്കും. ഉച്ചസമയത്ത് വസ്തുക്കളുടെ നിഴലുകൾക്ക് വർഷത്തിൽ ഏറ്റവും കുറഞ്ഞ നീളമായിരിക്കും ഈ ദിവസം അനുഭവപ്പെടുക.

ഈ വർഷത്തെ വേനൽക്കാലം 93 ദിവസങ്ങൾ നീണ്ടുനിൽക്കുമെന്ന് അദ്ദേഹം വ്യക്തമാക്കി. എന്നാൽ ഏറ്റവും കഠിനമായ ചൂട് അനുഭവപ്പെടുന്നത് ഉത്തരായനാന്ത ദിനത്തിൽ തന്നെ ആകണമെന്നില്ല. ഭൂമിയും സമുദ്രങ്ങളും സൗരോർജ്ജം ആഗിരണം ചെയ്ത് പുറത്തുവിടാൻ സമയമെടുക്കുന്ന 'സീസണൽ ലാഗ്' എന്ന പ്രതിഭാസമാണ് ഇതിന് കാരണം.