യു.എ.ഇയുടെ പലയിടത്തും ശക്തമായ മഴ: റോഡുകളിൽ വെള്ളക്കെട്ട്‌

അബുദാബി: യു.എ.ഇയുടെ പലയിടത്തും ശക്തമായ മഴ തുടരുകയാണ്. തിങ്കളാഴ്ച ഉച്ചക്ക്​ തുടങ്ങിയ മഴ ചൊവ്വാഴ്​ച വൈകുന്നേരം വരെ നീണ്ടു. വിനോദസഞ്ചാര കേന്ദ്രങ്ങൾ പലതും താൽകാലികമായി അടച്ചിരിക്കുകയാണ്. റോഡുകളിൽ രൂപപ്പെട്ട വെള്ളക്കെട്ട്​ കാരണം പലയിടങ്ങളിലും ഗതാഗതം തടസപ്പെട്ടു. എല്ലാ എമിറേറ്റുകളിലും കനത്ത മഴയാണ്​ അനുഭവപ്പെട്ടത്​.

വിനോദസഞ്ചാര കേന്ദ്രങ്ങൾ പലതും താൽകാലികമായി അടച്ചു. ഷാർജയിലെ എല്ലാ പാർക്കുകളും തിങ്കളാഴ്ച അടച്ചിരുന്നു. റാസൽഖൈമയിലെ ജബൽ ജൈസിലേക്കുള്ള റോഡ്​ അടച്ചതായി റാക്​ പൊലീസ്​ അറിയിച്ചു. വാദികൾ നിറഞ്ഞൊഴുകാൻ സാധ്യതയുള്ളതിനാൽ മുൻകരുതലെടുക്കണമെന്നും പൊലീസ്​നിർദേശിച്ചു. അതേസമയം, ചില സ്ഥാപനങ്ങൾ ജീവനക്കാർക്ക്​ വിദൂര ജോലി സംവിധാനം ഏർപെടുത്തി. പലയിടത്തും ഓൺലൈൻ ഡെലിവറി ഉൾപ്പെടെയുള്ള സംവിധാനങ്ങൾ തടസപ്പെട്ടു.

പ്രതികൂല കാലാവസ്ഥ തുടരുമെന്ന്​​ കാലാവസ്ഥാ നിരീക്ഷണ കേന്ദ്രം മുന്നറിയിപ്പ്​ നൽകി. മലയോര പ്രദേശങ്ങള്‍ സന്ദര്‍ശിക്കുന്നവർ ജാഗ്രത പുലര്‍ത്തണമെന്ന് ഫുജൈറ പൊലീസും മുനിസിപ്പാലിറ്റിയും മുന്നറിയിപ്പ് നല്‍കി. കിഴക്കൻ പ്രവിശ്യയിൽ സുരക്ഷാ സംവിധാനങ്ങൾ വിപുലപ്പെടുത്തിയതായി കിഴക്കൻ മേഖലാ പൊലീസ് ഡിപ്പാർട്ട്‌മെന്‍റ്​ഡയറക്ടർ കേണൽ ഡോ. അലി അൽഹമൂദി അറിയിച്ചു.