സ്വദേശിവൽക്കരണം കർശനമാക്കി യു.എ.ഇ; നടപ്പാക്കാത്ത കമ്പനികൾക്ക്​ ജുലൈ മുതൽ പി​ഴ

നിശ്ചിത ശതമാനം സ്വദേശിവൽക്കരണം പൂർത്തിയാക്കിയില്ലെങ്കിൽ ജുലൈ മുതൽ പി​ഴ ഇടാക്കുമെന്ന് യു.എ.ഇ​. ഈ വർഷം നടപ്പിലാക്കേണ്ട ഒരു ശതമാനം സ്വദേശിവൽക്കരണം ജൂൺ 30നകം പൂർത്തിയാക്കണം. 50 മുതൽ കൂടുതൽ ജീവനക്കാരുള്ള സ്ഥാപനങ്ങളാണ്​ സ്വദേശികളെ നിയമിക്കേണ്ടത്​.

​മാനവവിഭവ, എമിററ്റൈസേഷൻ മന്ത്രാലയമാണ്​ മുന്നറിയിപ്പ് നൽകിയത്​ 2022ൽ രണ്ടു ശതമാനം ഇമാറാത്തികളെ നിയമിക്കണമെന്ന നിർദേശം നേരത്തെ നടപ്പിലാക്കിയിരുന്നു. ഇതിന്​പുറമെ ഒരു ശതമാനം കൂടി സ്വദേശികളെ നിയമിക്കാനാണ് ​ജൂൺ വരെ സമയം അനുവദിച്ചിരിക്കുന്നത്​.

നിയമിക്കാതിരുന്ന ഒരോ ഇമാറാത്തിക്കും 42,000ദിർഹം വീതമാണ് ​പിഴ അടക്കേണ്ടി വരിക. ജൂലൈ മുതൽ ഓരോ മാസവും 7000 ദിർഹം വീതം കണക്കാക്കി വർഷാവസാനം വരെയുള്ള തുകയാണിത്​. പിന്നീട്​ 2026 വരെ ഓരോ വർഷവും 1000ദിർഹം വീതം വർധിപ്പിച്ച് ​ഫൈൻ അടക്കേണ്ടതായും വരും. 2026ൽ സ്വകാര്യ സ്ഥാപനങ്ങളിൽ 10 ശതമാനം സ്വദേശിവൽക്കരണം നടപ്പിലാക്കാനാണ് ​ഫെഡറൽ നിയമം ലക്ഷ്യമിടുന്നത്​.

ഓരോ വർഷവും രണ്ടു ശതമാനം വെച്ച്​ ഘട്ടംഘട്ടമായി നടപ്പിലാക്കുന്ന പദ്ധതിക്ക്​ കഴിഞ്ഞ വർഷമാണ് ​തുടക്കം കുറിച്ചത്​.. ഓരോ വർഷത്തെയും ടാർഗറ്റ് ​ആറു മാസത്തേക്ക്​ ഒരു ശതമാനം എന്ന നിലയിൽ വിഭജിച്ചാണ് ​നടപ്പിലാക്കുക. ഈ വർഷം ജൂൺ 30 ഓടെ കമ്പനികൾ ആകെ ജീവനക്കാരുടെ മൂന്ന് ശതമാനത്തിൽ സ്വദേശികളെ നിയമിക്കണം. തൊഴിൽ നൈപുണ്യം ആവശ്യമുള്ള തസ്തികകളിലാകണം നിയമനം. 2023 ഡിസംബറോടെ സ്വദേശിവൽക്കരണം നാലു ശതമാനത്തിൽ എത്തിക്കുകയും വേണം.