ഇസ്രായേലിൽ എംബസി തുറന്ന് യു.എ.ഇ

ഇസ്രായേൽ തലസ്ഥാനമായ തെൽ അവീവിൽ യു.എ.ഇ എംബസി തുറന്നു. യു.എ.ഇ -ഇസ്രായേൽ നയതന്ത്രബന്ധത്തിന്​ കൂടുതൽ ശക്തി പകരാൻ​ എംബസി ഉപകരിക്കുമെന്ന്​ ഇരു രാജ്യങ്ങളും പ്രത്യാശ പ്രകടിപ്പിച്ചു. ഒരു ഗൾഫ്​ രാജ്യം ഇതാദ്യമായാണ്​ ഇസ്രായേലിൽ എംബസി തുറക്കുന്നത്​.

കോവിഡ്​ നിയന്ത്രണങ്ങൾ കാരണം ലളിതമായ രീതിയിലായിരുന്നു എംബസി ഉദ്​ഘാടനം.കഴിഞ്ഞ വർഷം ഒപ്പുവെച്ച അബ്രഹാം കരാറി​ലെ ധാരണപ്രകാരമാണ്​ ഇരുരാജ്യങ്ങളും തമ്മിലെ നയതന്ത്രബന്ധം ശക്​തിപ്പെട​ുത്തുന്ന നടപടി. എംബസി ഉൽഘാടന ചടങ്ങിൽ പുതുതായി തെരഞ്ഞെടുക്കപ്പെട്ട ഇസ്രയേൽ പ്രസിഡൻറ്​ ഐസാക്​ ഹെർസോഗ്​, യു.എ.ഇ ഭക്ഷ്യ-ജല സുരക്ഷാ വകുപ്പ്​ മന്ത്രി മറിയം അൽ മുഹൈരി, യു.എ.ഇ അംബാസഡർ മുഹമ്മദ്​ അൽ ഖാജ എന്നിവർ സംബന്​ധിച്ചു. യു.എ.ഇ പതാക ഉയർത്തിയും റിബൺ മുറിച്ചും നടന്ന ചടങ്ങിന്​ ശേഷം തെൽ അവീവ് സ്​റ്റോക്ക് എക്സ്ചേഞ്ചിൽ ഓഹരി വ്യാപാരത്തിനും തുടക്കം കുറിച്ചു.

ഇരുരാജ്യങ്ങളും തമ്മിലെ ബന്ധം മേഖലക്ക്​ ഒന്നാകെ ഗുണം ചെയ്യുമെന്ന്​ ഇസ്രയേൽ പ്രസിഡൻറ്​ പറഞ്ഞു. നയതന്ത്ര ഉദ്യോഗസ്ഥരുടെ കേന്ദ്രം എന്നതിലുപരി സമാധാനത്തി​െൻറ മാതൃക രൂപപ്പെടുത്തുന്ന ആസ്​ഥാനമായും എംബസി പ്രവർത്തിക്കുമെന്ന്​ അംബാസഡർ മുഹമ്മദ്​ അൽ ഖാജ അഭിപ്രായപ്പെട്ടു.

കാർഷികരംഗത്ത് ഇരുരാജ്യങ്ങളും ഗവേഷണത്തിനും നവീകരണത്തിനും പ്രധാന്യം നൽകുന്ന കരാറിൽ മന്ത്രിതലയോഗത്തിൽ ഒപ്പുവെച്ചു. കഴിഞ്ഞ മാസം ഇസ്രയേൽ വിദേശകാര്യമന്ത്രി യായിർ ലാപിഡ്​ യു.എ.ഇ സന്ദർശിച്ചിരുന്നു. അബൂദബിയിൽ എംബസിയും ദുബൈയിൽ കോൺസുലേറ്റും ഉൽഘാടനം ചെയ്യുന്ന ചടങ്ങിലും അദ്ദേഹം പ​െങ്കടുത്തിരുന്നു.