യുഎഇയുടെ തൊഴിൽനഷ്ട ഇൻഷുറൻസ് ​ പദ്ധതി; രജിസ്റ്റർ ചെയ്‌തത്‌ 50 ലക്ഷത്തിലധികം പേർ

യുഎഇ: യു.എ.ഇ പ്രഖ്യാപിച്ച തൊഴിൽ നഷ്ട ഇൻഷൂറൻസ് പദ്ധതിയിൽ രജിസ്റ്റർ ചെയ്തവരുടെ എണ്ണം 50 ലക്ഷം കവിഞ്ഞു. ജൂൺ മുപ്പതിനകം എല്ലാ തൊഴിലാളികളും പദ്ധതിയുടെ ഭാഗമായിരിക്കണം. രജിസ്റ്റർ ചെയ്തില്ലെങ്കിൽ ജൂലൈ ഒന്നു മുതൽ നടപടി സ്വീകരിക്കും.

ജോലി നഷ്ടപ്പെടുന്ന സാധാരണ തൊഴിലാളികൾക്ക്​ കുറഞ്ഞ പ്രീമിയത്തിൽ ഇൻഷൂറൻസ്​ പരിരക്ഷ ഉറപ്പാക്കുന്ന പദ്ധതിയാണിത്. സർക്കാർ, സ്വകാര്യ സ്​ഥാപനങ്ങളിലെ ജീവനക്കാരിൽ നിന്ന്​ മികച്ച സ്വീകാര്യതയാണ്​ പദ്ധതിക്ക്​ ലഭിച്ചു വരുന്നതെന്ന്​ യു.എഇ മാനവ വിഭവ, സ്വദേശിവത്​കരണ മന്ത്രാലയം അറിയിച്ചു. . ​

സ്ഥാപനം അടച്ചുപൂട്ടുകയോ ശമ്പളത്തിൽ കുടിശ്ശിക വരുത്തുകയോ ചെയ്യുന്ന സാഹചര്യത്തിൽ തൊഴിൽനഷ്ട ഇൻഷൂറൻസ്​പദ്ധതിയിൽ രജിസ്റ്റർ ചെയ്ത‍ തൊഴിലാളികൾക്ക്​മൂന്നു മാസം വരെ സാമ്പത്തിക പരിരക്ഷ ലഭിക്കും.

16,000 ദിർഹം വരെ ശമ്പളമുള്ളവർക്ക് മാസം അഞ്ച് ദിർഹം അല്ലെങ്കിൽ വർഷം 60 ദിർഹം പ്രീമിയം അടച്ച് പദ്ധതിയിൽ അംഗമാകാം. 16,000 ദിർഹത്തിന് മുകളിൽ ശമ്പളമുള്ളവർ മാസം പത്ത് ദിർഹമോ വർഷം 120 ദിർഹമോ വേണം അടക്കാൻ.