യുഎഇയിലെ റാസൽഖൈമയിൽ ഇനി ഊബർ ടാക്സികളും സർവീസ് നടത്തും

ദുബൈ: യുഎഇയിലെ റാസൽഖൈമയിൽ ഊബർ ടാക്സികൾ സർവീസ് ആരംഭിച്ചു. ഇനി 24 മണിക്കൂറും ഊബർ ടാക്സികളും, ലിമോസിനുകളും ലഭ്യമായിരിക്കും. ഇതുസംബന്ധിച്ച് റാസൽഖൈമ ട്രാൻസ്പോർട്ട് അതോറിറ്റിയും ഊബറും സഹകരണകരാർ ഒപ്പുവെച്ചു. റാക്ട ആസ്ഥാനത്ത് ചടങ്ങിൽ ഡയറക്ടർ ജനറൽ എൻജിനീയർ ഇസ്മായിൽ ഹസൻ അൽ ബലൂഷിയും, ഊബർ യു.എ.ഇ ജനറൽ മാനേജർ താലൻസൗലിയുമാണ് കരാറിൽ ഒപ്പിട്ടത്.

ഊബർ ആപ്പിലൂടെ വാഹനം ബുക്ക് ചെയ്യാനും ഡിജിറ്റൽ പേമെന്റ് നടത്താനും സൗകര്യമുണ്ടാകും. റാസൽഖൈമ നിവാസികൾക്കും ഇവിടെ എത്തുന്ന വിനോദസഞ്ചാരികൾക്കും യാത്രാസൗകര്യം മെച്ചപ്പെടുത്താൻ ലക്ഷ്യമിട്ടാണ് റാക്ട-ഊബറുമായി കൈകോർക്കുന്നത്.