മനുഷ്യശരീരത്തിലെ ഏറ്റവും പ്രധാനപ്പെട്ട അവയവങ്ങളിൽ ഒന്നാണ് വൃക്കകൾ. രക്തം ശുദ്ധീകരിക്കുക, ശരീരത്തിലെ മാലിന്യങ്ങൾ നീക്കം ചെയ്യുക, രക്തസമ്മർദം നിയന്ത്രിക്കുക, ചുവന്ന രക്താണുക്കളുടെ ഉത്പാദനത്തിന് സഹായിക്കുക എന്നിവയെല്ലാം വൃക്കകളുടെ പ്രധാന ധർമങ്ങളാണ്. ഈ സുപ്രധാനമായ പ്രവർത്തനങ്ങൾക്ക് തടസ്സം നേരിടുമ്പോൾ ഉണ്ടാകുന്ന അവസ്ഥയാണ് വൃക്കരോഗം. രോഗം പുരോഗമിക്കുന്ന ഘട്ടങ്ങളിൽ മാത്രമായിരിക്കും പലപ്പോഴും വൃക്കരോഗങ്ങൾ തിരിച്ചറിയപ്പെടുന്നത്. അതുകൊണ്ട് തന്നെ ഇതിനെക്കുറിച്ചുള്ള അവബോധം വളരെയധികം പ്രധാനമാണ്.

എന്താണ് വൃക്കരോഗം? എങ്ങനെയാണ് ഇത് ബാധിക്കുന്നത്?

വൃക്കകളുടെ പ്രവർത്തനത്തിൽ ഉണ്ടാകുന്ന തകരാറുകൾ പല കാരണങ്ങൾകൊണ്ടുമാകാം. ഇവ പ്രധാനമായും രണ്ടായി തരം തിരിക്കാം:

• അക്യൂട്ട് കിഡ്നി ഇൻജുറി (Acute Kidney Injury): വൃക്കകളുടെ പ്രവർത്തനം പെട്ടെന്ന് കുറയുന്ന അവസ്ഥയാണിത്. ഗുരുതരമായ അണുബാധകൾ (സെപ്‌സിസ്), കഠിനമായ നിർജലീകരണം (Dehydration), ഹൃദ്രോഗം, ചില മരുന്നുകളുടെ ഉപയോഗം, മൂത്രാശയ തടസ്സങ്ങൾ എന്നിവയൊക്കെ ഇതിന് കാരണമാകാം. ചികിത്സയിലൂടെ ഇത് പൂർണമായും മാറ്റിയെടുക്കാൻ സാധ്യതകളുണ്ട്.
• വിട്ടുമാറാത്ത വൃക്കരോഗം (chronic kidney disease): സാവധാനം വൃക്കകളുടെ പ്രവർത്തനം കുറഞ്ഞു വരുന്ന അവസ്ഥയാണിത്. ഈ രോഗം പുരോഗമിക്കുമ്പോൾ, വൃക്കകളുടെ ശുദ്ധീകരണശേഷി കുറയുകയും, രക്തത്തിൽ യൂറിയ, ക്രിയാറ്റിനിൻ തുടങ്ങിയ മാലിന്യങ്ങൾ അടിഞ്ഞുകൂടുകയും ചെയ്യുന്നു. ഈ അവസ്ഥയെ യുറീമിയ (Uremia) എന്ന് വിളിക്കുന്നു. ഇത് ചികിത്സിച്ചില്ലെങ്കിൽ വൃക്കസ്തംഭനത്തിലേക്ക് (Kidney Failure) എത്താം.

ഒരു വൃക്കയുടെ പ്രവർത്തനം തകരാറിലായാലും മറ്റേ വൃക്ക ബാക്കിയുള്ള എല്ലാ പ്രവർത്തനങ്ങളും നിർവഹിക്കാൻ ശ്രമിക്കുന്നതിനാൽ രോഗം പലപ്പോഴും അവസാന ഘട്ടത്തിൽ എത്തുമ്പോൾ മാത്രമാണ് ലക്ഷണങ്ങൾ പ്രകടമാകുന്നത്.

വൃക്കരോഗത്തിന്റെ പ്രധാന കാരണങ്ങൾ

വിട്ടുമാറാത്ത വൃക്കരോഗത്തിന്റെ (chronic kidney disease) ഏറ്റവും പ്രധാനപ്പെട്ട രണ്ട് കാരണങ്ങൾ ഇവയാണ്:

• പ്രമേഹം (Diabetes): അനിയന്ത്രിതമായ രക്തത്തിലെ പഞ്ചസാരയുടെ അളവ് കാലക്രമേണ വൃക്കകളിലെ സൂക്ഷ്മ രക്തക്കുഴലുകളെ തകർക്കുന്നു.
• ഉയർന്ന രക്തസമ്മർദം (High Blood Pressure/Hypertension): അമിതമായ രക്തസമ്മർദംം വൃക്കകളിലെ ഫിൽട്ടറേഷൻ സംവിധാനത്തെ (Glomeruli) തകരാറിലാക്കുന്നു.

മറ്റ് അപകടസാധ്യത ഘടകങ്ങൾ: വ്യക്തികളുടെ കുടുംബ ചരിത്രം, അമിതവണ്ണവും അമിതഭാരവും (Obesity), പുകവലി, അമിതമായ മദ്യപാനം, വൃക്കയിലെ കല്ലുകൾ, മുഴകൾ, അല്ലെങ്കിൽ ആവർത്തിച്ചുള്ള മൂത്രനാളി അണുബാധകൾ, വേദനസംഹാരികൾ (Pain Killers) പോലുള്ള ചില മരുന്നുകളുടെ അമിതോപയോഗം എന്നിവയും വൃക്കരോഗത്തിന് കാരണമായേക്കാം.

എന്താണ് ഇതിന്റെ ലക്ഷണങ്ങൾ?

പ്രധാനമായും വിട്ടുമാറാത്ത വൃക്കരോഗത്തിന്റെ ലക്ഷണങ്ങൾ ആദ്യ ഘട്ടങ്ങളിൽ അധികം പ്രകടമാവണമെന്നില്ല. രോഗം മൂർച്ഛിക്കുമ്പോൾ കണ്ടുവരുന്ന ചില പൊതുവായ ലക്ഷണങ്ങൾ താഴെക്കൊടുക്കുന്നു:

• ശരീരത്തിലെ നീർക്കെട്ട്: കാലുകളിലും കണങ്കാലുകളിലും മുഖത്തും ഉണ്ടാകുന്ന വീക്കം (നീർവീക്കം).
• മൂത്രത്തിലെ മാറ്റങ്ങൾ: രാത്രിയിൽ അമിതമായ മൂത്രമൊഴിക്കൽ, മൂത്രത്തിന്റെ അളവിൽ കുറവുണ്ടാകുകയോ കൂടുകയോ ചെയ്യുക, മൂത്രത്തിൽ നുര കാണുക (പ്രോട്ടീൻ നഷ്ടപ്പെടുന്നത് കാരണം), മൂത്രത്തിൽ രക്താംശം കാണുക.
• ക്ഷീണം/തളർച്ച: കഠിനമായ ക്ഷീണം, തളർച്ച, ഉന്മേഷക്കുറവ് (വിളർച്ച (Anemia) കാരണം).
• ദഹന സംബന്ധമായവ: ഓക്കാനം (Nausea), ഛർദ്ദി (Vomiting), വിശപ്പില്ലായ്മ.
• ചർമ്മ സംബന്ധമായവ: വരണ്ടതും ചൊറിച്ചിലുമുള്ള ചർമ്മം.
• മറ്റുള്ളവ: പേശിവലിവ് (Muscle cramps), അസ്ഥി വേദന, ശ്വാസമെടുക്കാൻ ബുദ്ധിമുട്ട് (ശ്വാസതടസ്സം), ഉറക്കമില്ലായ്മ (Insomnia) അല്ലെങ്കിൽ അമിതമായ ഉറക്കം, ചിന്താശേഷിയിൽ വരുന്ന മാറ്റങ്ങൾ.

എങ്ങനെ ഇതിനെ തടയാം?

വൃക്കരോഗങ്ങൾ ഒരു പരിധി വരെ പ്രതിരോധിക്കാൻ സാധിക്കും. ആരോഗ്യകരമായ ജീവിതശൈലിയിലൂടെ അപകടസാധ്യത ഘടകങ്ങൾ നിയന്ത്രിക്കുകയാണ് ഏറ്റവും പ്രധാനം.

പ്രധാന രോഗങ്ങളുടെ നിയന്ത്രണം: പ്രമേഹം ഉള്ളവർ രക്തത്തിലെ പഞ്ചസാരയുടെ അളവും, ഉയർന്ന രക്തസമ്മർദമുള്ളവർ രക്തസമ്മർദവും കർശനമായി നിയന്ത്രിച്ച് നിർത്തുക.

ആരോഗ്യകരമായ ജീവിതശൈലി: അമിതഭാരം ഒഴിവാക്കി ശരീരഭാരം ആരോഗ്യകരമായി നിലനിർത്തുക, ആവശ്യത്തിന് ശാരീരിക വ്യായാമങ്ങളിൽ ഏർപ്പെടുക, പുകവലിയും അമിതമായ മദ്യപാനവും പൂർണമായി ഉപേക്ഷിക്കുക.

മരുന്നുകളുടെ ശ്രദ്ധയുള്ള ഉപയോഗം: വേദനസംഹാരികൾ (NSAIDs) പോലുള്ള മരുന്നുകൾ ഡോക്ടറുടെ നിർദ്ദേശമില്ലാതെ ദീർഘകാലം ഉപയോഗിക്കുന്നത് ഒഴിവാക്കുക.

പതിവ് പരിശോധനകൾ: പ്രമേഹം, രക്തസമ്മർദം, അമിതവണ്ണം തുടങ്ങിയ അപകടസാധ്യത ഘടകങ്ങൾ ഉള്ളവർ പതിവായി രക്തപരിശോധനകളും (ക്രിയാറ്റിനിൻ, യൂറിയ), മൂത്രപരിശോധനകളും (പ്രോട്ടീൻ/ആൽബുമിൻ ഉണ്ടോ എന്ന്) നടത്തി വൃക്കകളുടെ ആരോഗ്യം ഉറപ്പുവരുത്തുക.

രോഗം വന്നുകഴിഞ്ഞാൽ എന്തൊക്കെ ശ്രദ്ധിക്കണം?

വൃക്കരോഗം സ്ഥിരീകരിച്ചാൽ, രോഗത്തിന്റെ പുരോഗതി തടയുന്നതിനും സങ്കീർണതകൾ കുറയ്ക്കുന്നതിനും താഴെ പറയുന്ന കാര്യങ്ങളിൽ ശ്രദ്ധ പുലർത്തണം:

• ഡോക്ടറുടെ നിർദ്ദേശങ്ങൾ പാലിക്കുക: വൃക്കരോഗ ചികിത്സയിൽ വൈദഗ്ധ്യമുള്ള നെഫ്രോളജിസ്റ്റിനെ (Nephrologist) കാണുക, മരുന്നുകൾ കൃത്യമായി കഴിക്കുക.
• ഭക്ഷണക്രമം നിയന്ത്രിക്കുക
• ഉപ്പിന്റെ (Sodium) ഉപയോഗം കുറയ്ക്കുക: ഇത് രക്തസമ്മർദ്ദം നിയന്ത്രിക്കാനും നീർക്കെട്ട് കുറയ്ക്കാനും സഹായിക്കും.
• പൊട്ടാസ്യം, ഫോസ്ഫറസ് എന്നിവ നിയന്ത്രിക്കുക: വൃക്കകളുടെ പ്രവർത്തനം കുറയുമ്പോൾ ഈ ധാതുക്കൾ ശരീരത്തിൽ അടിഞ്ഞുകൂടാൻ സാധ്യതയുണ്ട്.
• പ്രോട്ടീൻ നിയന്ത്രണം: വൃക്കകളുടെ പ്രവർത്തനത്തെ ആശ്രയിച്ച് പ്രോട്ടീൻ കഴിക്കുന്ന അളവിൽ മാറ്റങ്ങൾ വരുത്തേണ്ടി വരും. ഒരു ഡയറ്റീഷ്യന്റെ സഹായം തേടുന്നത് ഉചിതമാണ്.
• ദ്രാവകങ്ങളുടെ അളവ് (Fluid Intake): വൃക്കകളുടെ പ്രവർത്തനത്തെയും നീർക്കെട്ടിനെയും ആശ്രയിച്ച് വെള്ളം കുടിക്കുന്ന അളവ് ഡോക്ടറുടെ നിർദ്ദേശപ്രകാരം ക്രമീകരിക്കുക.
• വിളർച്ച (Anemia), അസ്ഥിരോഗങ്ങൾ എന്നിവയ്ക്കുള്ള ചികിത്സകൾ ഡോക്ടറുടെ നിർദ്ദേശപ്രകാരം ഉറപ്പാക്കുക.

വൃക്കസ്തംഭനത്തിന്റെ അവസാന ഘട്ടത്തിൽ, ഡയാലിസിസ് (Dialysis) (ഹീമോഡയാലിസിസ് അല്ലെങ്കിൽ പെരിറ്റോണിയൽ ഡയാലിസിസ്) അല്ലെങ്കിൽ വൃക്ക മാറ്റിവെക്കൽ ശസ്ത്രക്രിയ (Kidney Transplantation) ആവശ്യമായി വരും. രോഗത്തിന്റെ പുരോഗതി അനുസരിച്ച് ഡോക്ടറുമായി ചർച്ച ചെയ്ത് ഉചിതമായ തീരുമാനം എടുക്കുക.

ശരിയായ ചികിത്സയിലൂടെയും ജീവിതശൈലി മാറ്റങ്ങളിലൂടെയും വൃക്കരോഗത്തെ നിയന്ത്രിച്ച് നിർത്തി ആരോഗ്യകരമായ ജീവിതം നയിക്കാൻ സാധിക്കും.