പുറത്തെ ചൂടിൽ നിന്ന് വന്നാലുടൻ എസി മുറിയിലേക്ക് ഓടിക്കയറുന്നവരാണോ നിങ്ങൾ?; എങ്കിൽ ഇക്കാര്യങ്ങള്‍ അറിയാതെ പോകരുത്

കടുത്ത വേനലാണ്. പുറത്തേക്കിറങ്ങാന്‍ പോലും പറ്റാത്തത്ര ചൂടും. ചൂട് കനത്തതോടെ എസിയുടെ ഉപയോഗവും വളരെയധികം കൂടിയിട്ടുണ്ട്. കൊടുംചൂടിൽ നിന്ന് വരുമ്പോൾ തണുത്ത എസി മുറിയിലേക്ക് കയറുമ്പോൾ കിട്ടുന്ന സുഖം ഒന്ന് വേറെതന്നെയാണ്. എന്നാൽ, ഈ ശീലം അത്ര നല്ലതല്ലെന്നാണ് ഡോക്ടർമാർ മുന്നറിയിപ്പ് നൽകുന്നത്. പുറത്തെ കഠിനമായ ചൂടിൽ നിന്ന് പെട്ടെന്ന് തണുപ്പുള്ള മുറിയിലേക്ക് മാറുന്നത് ശരീരത്തിന്റെ സ്വാഭാവിക താപനില നിയന്ത്രണ സംവിധാനത്തെ ദോഷകരമായി ബാധിച്ചേക്കാം.

വിയർപ്പിലൂടെയും രക്തക്കുഴലുകളുടെ വികാസത്തിലൂടെയും ശരീരത്തിന്റെ ആന്തരിക താപനില സ്ഥിരമായി നിലനിർത്താൻ നമ്മുടെ ശരീരം നിരന്തരം ശ്രമിച്ചുകൊണ്ടിരിക്കുന്നു. പെട്ടെന്ന് തണുത്ത വായുവിലേക്ക് സമ്പർക്കമുണ്ടാകുന്നത് ഈ പ്രവർത്തനങ്ങളെ തടസ്സപ്പെടുത്തിയേക്കാം. ഇത് തലവേദന, തൊണ്ടയിലെ അസ്വസ്ഥത, മൂക്കടപ്പ് എന്നിവയ്ക്കും ശ്വാസകോശ സംബന്ധമായ ബുദ്ധിമുട്ടുകൾ ഉള്ളവർക്ക് അത് വർധിക്കാനും കാരണമാകുന്നു.

'പുറത്തെ കൊടുംചൂടിൽ നിന്ന് പെട്ടെന്ന് എസി മുറിയിലെ തണുപ്പിലേക്ക് മാറുന്നത് ശരീരത്തിന്റെ താപനില ക്രമീകരണ സംവിധാനത്തിന് വലിയ സമ്മർദമുണ്ടാക്കും. പെട്ടെന്നുണ്ടാകുന്ന ഈ തണുപ്പിക്കൽ തലവേദന, മൂക്കടപ്പ്, തൊണ്ടയിലെ അസ്വസ്ഥത എന്നിവയ്ക്ക് കാരണമാകും. ആസ്ത്മയോ സൈനസ് പ്രശ്നങ്ങളോ ഉള്ളവർക്ക് രോഗം കൂടാൻ ഇടയാക്കുമെന്നും ബംഗളൂരുവിലെ ആസ്റ്റർ വൈറ്റ്ഫീൽഡ് ഹോസ്പിറ്റലിലെ ഇന്റേണൽ മെഡിസിൻ കൺസൾട്ടന്റായ ഡോ. ബസവരാജ് എസ്. കുംഭാർ എന്‍ഡിടിവിയോട് പറഞ്ഞു.

പെട്ടെന്നുള്ള ഈ മാറ്റം ശരീരത്തെ ഒരുതരം 'ഷോക്കി'ലേക്ക് നയിക്കുമെന്നും ശരീരം സാധാരണ നിലയിലാകാൻ കൂടുതൽ സമയമെടുക്കുമെന്നും അദ്ദേഹം കൂട്ടിച്ചേർത്തു. അതിശക്തമായ താപനില വ്യതിയാനങ്ങൾ ഹൃദയത്തിന്റെയും ശ്വാസകോശത്തിന്റെയും പ്രവർത്തനത്തെ ബാധിക്കുമെന്ന് ശാസ്ത്രീയ പഠനങ്ങളും ശരിവെക്കുന്നു.

ഇത്തരം അസ്വസ്ഥതകൾക്ക് പുറമെ, എസിയുടെ അമിതമായ ഉപയോഗം മുറിക്കുള്ളിലെ വായു വല്ലാതെ വരണ്ടതാക്കാനും അത് ശ്വാസനാളത്തിന് ആയാസമുണ്ടാക്കാനും ഇടയാക്കും. ലോകാരോഗ്യ ഏജൻസികളുടെ അഭിപ്രായത്തിൽ, താപനിലയിലുണ്ടാകുന്ന മാറ്റങ്ങളും മുറിക്കുള്ളിലെ വായുവിന്റെ ഗുണനിലവാരവും നമ്മുടെ ശ്വാസകോശാരോഗ്യത്തെയും മൊത്തത്തിലുള്ള ക്ഷേമത്തെയും കാര്യമായി ബാധിക്കുന്നുണ്ട്.

ചൂടിൽ നിന്ന് വന്നാലുടൻ എസി മുറിയിലേക്ക് കയറുന്നതിന് മുമ്പ് അല്പനേരം കാത്തിരിക്കണമെന്നാണ് ആരോഗ്യ വിദഗ്ധര്‍ പറയുന്നത്. എസി മുറിയിൽ കയറുന്നതിന് മുമ്പ് ശരീരത്തിന് താപനിലയുമായി പൊരുത്തപ്പെടാൻ സമയം നൽകണമെന്ന് ഡോക്ടർമാർ ശിപാർശ ചെയ്യുന്നു. വെയിലിൽ നിന്ന് വന്നാലുടൻ എസി മുറിയിൽ കയറാതെ കുറച്ചുസമയം തണലത്തോ അല്പം തണുപ്പുള്ള ഇടത്തോ ചെലവഴിക്കുന്നത് ശരീരത്തിന് ഗുണകരമാണ്. ഇത് പെട്ടെന്നുണ്ടാകുന്ന രക്തക്കുഴലുകളുടെ സങ്കോചവും തലവേദനയും ഒഴിവാക്കാൻ സഹായിക്കുന്നു.

എസി ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ

എസി മുറിയിൽ കയറുന്നതിന് മുമ്പ് കുറച്ച് മിനിറ്റ് തണലത്തോ അല്പം തണുപ്പുള്ള സ്ഥലത്തോ കാത്തുനിൽക്കുക.

എസി താപനില എപ്പോഴും 24-26 ഡിഗ്രി സെൽഷ്യസിൽ നിലനിർത്തുക.

ശരീരത്തിലേക്ക് നേരിട്ട് എസിയില്‍ നിന്നുള്ള തണുത്ത കാറ്റ് അടിക്കാതെ നോക്കുക.

ദിവസം മുഴുവൻ നന്നായി വെള്ളം കുടിച്ച് ശരീരത്തിലെ ജലാംശം നിലനിർത്തുക.

എസി ഫിൽട്ടറുകൾ കൃത്യമായി വൃത്തിയാക്കുക.

ഇടയ്ക്കിടെ ശുദ്ധവായു മുറിക്കുള്ളിലേക്ക് കടക്കാൻ അനുവദിക്കുക.

രാത്രിയിൽ അമിതമായ തണുപ്പ് ഒഴിവാക്കാൻ 'സ്ലീപ്പ് മോഡ്' ഉപയോഗിക്കുക.

പനി, അമിതമായ ക്ഷീണം, മാറാത്ത മൂക്കൊലിപ്പ് എന്നിവയുണ്ടെങ്കിൽ അത് എസിയുടെ പ്രശ്നമല്ല, മറിച്ച് അണുബാധയുടെ ലക്ഷണമാകാം. ഇത്തരം സാഹചര്യങ്ങളിൽ ഡോക്ടറുടെ സഹായം തേടാന്‍ മറക്കരുത്.

ചുരുക്കത്തിൽ, വർധിച്ചു വരുന്ന ചൂടിനെ പ്രതിരോധിക്കാൻ എസി അത്യാവശ്യമാണെങ്കിലും അത് എങ്ങനെ ഉപയോഗിക്കുന്നു എന്നത് പ്രധാനമാണ്. പെട്ടെന്നുള്ള താപനില മാറ്റം ശരീരത്തിന് സമ്മർദ്ദമുണ്ടാക്കും. അതിനാൽ ആവശ്യത്തിന് വെള്ളം കുടിക്കുകയും കൃത്യമായ ഇടവേളകളിൽ എസി സർവീസ് ചെയ്യുകയും മിതമായ താപനിലയിൽ ഉപയോഗിക്കുകയും ചെയ്യുന്നത് ആരോഗ്യത്തിന് ഗുണകരമാണ്. ചെറിയ മുൻകരുതലുകൾ എടുക്കുന്നതിലൂടെ വേനൽക്കാലത്തെ ആരോഗ്യപ്രശ്നങ്ങൾ ഒഴിവാക്കി എസി സുരക്ഷിതമായി ഉപയോഗിക്കാൻ നമുക്ക് സാധിക്കും.