ഹൃദയാഘാതത്തെ എങ്ങനെ ഒറ്റക്ക് നേരിടാം; പ്രമുഖ ഹൃദയ ശസ്ത്രക്രിയാ വിദഗ്ധൻ പങ്കുവെക്കുന്ന 4 ജീവൻ രക്ഷാ മാർഗങ്ങൾ

ഹൃദയാഘാതം അപ്രതീക്ഷിതവും ജീവന് ഭീഷണിയുമുള്ള അവസ്ഥയാണ്. പ്രത്യേകിച്ച് നിങ്ങൾ ഒറ്റക്കാണെങ്കിൽ. എന്നാൽ ശരിയായ അറിവും വേഗത്തിലുള്ള നടപടികളും ജീവൻ രക്ഷിക്കാൻ സഹായിക്കും. പ്രമുഖ യുഎസ് ഹൃദയ ശസ്ത്രക്രിയാ വിദഗ്ധന്റെ ഉപദേശങ്ങൾ അനുസരിച്ച് ഒറ്റക്ക് ഹൃദയാഘാതം നേരിടുമ്പോൾ ചെയ്യേണ്ട 4 ജീവൻ രക്ഷിക്കുന്ന മാർഗങ്ങൾ ഇവയാണ്:

1. ലക്ഷണങ്ങൾ തിരിച്ചറിയുക

ഹൃദയാഘാതത്തിന്റെ പ്രധാന ലക്ഷണങ്ങൾ നെഞ്ചിൽ നീണ്ടുനിൽക്കുന്ന വേദന, ശ്വാസതടസം, കൈകളിലേക്കോ തോളിലേക്കോ താടിയിലേക്കോ പടരുന്ന അസ്വസ്ഥത, ഓക്കാനം, അല്ലെങ്കിൽ തലകറക്കം എന്നിവയാണ്. ഈ ലക്ഷണങ്ങൾ 5 മിനിറ്റിൽ കൂടുതൽ നീണ്ടുനിൽക്കുകയാണെങ്കിൽ ഉടൻ നടപടി എടുക്കുക. ലക്ഷണങ്ങളെ അവഗണിക്കാതിരിക്കുക കാരണം വേഗത്തിലുള്ള പ്രതികരണം ജീവൻ രക്ഷിക്കും.

2. അടിയന്തര സഹായത്തിന് വിളിക്കുക

നിങ്ങൾ ഒറ്റക്കാണെങ്കിലും ആദ്യം ചെയ്യേണ്ടത് 108 അല്ലെങ്കിൽ പ്രദേശത്തെ അടിയന്തര മെഡിക്കൽ നമ്പറിലേക്ക് വിളിക്കുകയാണ്. നിങ്ങൾ താമസിക്കുന്ന ലൊക്കേഷനും ലക്ഷണങ്ങളും വ്യക്തമായി അറിയിക്കുക. ഫോൺ സ്പീക്കർ മോഡിൽ വെച്ച് സംസാരിക്കുക. കാരണം അതുവഴി കൈകൾ സ്വതന്ത്രമായിരിക്കും. മറ്റ് കാര്യങ്ങൾ ചെയ്യാൻ കഴിയും.

3. അടുത്ത ബന്ധുക്കളെ വിളിക്കുക

അടിയന്തര സഹായത്തിന് വിളിച്ചു കഴിഞ്ഞാൽ ഉടനെ തന്നെ നിങ്ങളുടെ അടുത്ത ബന്ധുക്കളെ വിളിച്ച് സഹായത്തിന് വരാൻ ആവശ്യപ്പെടുക. നിങ്ങളുടെ അവസ്ഥകളെ കുറിച്ച് അവരെ കൃത്യമായി ധരിപ്പിക്കുക.

4. വിശ്രമിക്കുക, പക്ഷേ ശ്രദ്ധിക്കുക

നിങ്ങളുടെ ശരീരത്തിന് ഓക്സിജൻ ആവശ്യമുള്ളതിനാൽ ശാന്തമായി ഇരിക്കുകയോ കിടക്കുകയോ ചെയ്യുക. ശ്വസിക്കാൻ ബുദ്ധിമുട്ടുണ്ടെങ്കിൽ ശരീരം അല്പം ഉയർത്തി ഇരിക്കുക. അമിതമായ ചലനങ്ങൾ ഒഴിവാക്കുക. കാരണം ഇത് ഹൃദയത്തിന് കൂടുതൽ സമ്മർദ്ദം ചെലുത്തും. അടിയന്തര സഹായം എത്തുന്നതുവരെ ശാന്തമായി കാത്തിരിക്കുക.

ഹൃദയാഘാതം ഒരു ഗുരുതരമായ അവസ്ഥയാണ് എന്നാൽ ശരിയായ അറിവും വേഗത്തിലുള്ള പ്രതികരണവും ജീവൻ രക്ഷിക്കാൻ സഹായിക്കും. എല്ലായ്പ്പോഴും ഡോക്ടറുമായി ആരോഗ്യസ്ഥിതി ചർച്ച ചെയ്യുകയും ഹൃദയാരോഗ്യത്തിന് ആരോഗ്യകരമായ ജീവിതശൈലി പിന്തുടരുകയും ചെയ്യുക.