വെറും വയറ്റിൽ കുതിർത്ത ബദാം കഴിച്ചാൽ പ്രമേഹം നിയന്ത്രിക്കാമോ?

വെറും വയറ്റിൽ കുതിർത്ത ബദാം കഴിക്കുന്നത് ആരോഗ്യത്തിന് നല്ലതാണെന്ന വിശ്വാസം വർഷങ്ങളായി പല വീടുകളിലും നിലനിൽക്കുന്നുണ്ട്. പ്രത്യേകിച്ച് പ്രമേഹമുള്ളവർക്ക് ഇത് രക്തത്തിലെ പഞ്ചസാര നിയന്ത്രിക്കാൻ സഹായിക്കുമെന്ന പ്രചാരണമുണ്ട്. എന്നാൽ ഈ അവകാശവാദത്തെക്കുറിച്ച് ശാസ്ത്രം പറയുന്നത് എന്താണ്?

വിദഗ്ധരുടെ അഭിപ്രായത്തിൽ, വെറും വയറ്റിൽ കുതിർത്ത ബദാം കഴിക്കുന്നത് മാത്രം രക്തത്തിലെ പഞ്ചസാരയോ HbA1c നിലവാരമോ ഗണ്യമായി കുറയ്ക്കുമെന്ന് തെളിയിക്കുന്ന ശക്തമായ ശാസ്ത്രീയ തെളിവുകൾ നിലവിലില്ല. എന്നാൽ സമീകൃത ഭക്ഷണത്തിന്റെ ഭാഗമാക്കി ബദാം ഉൾപ്പെടുത്തുന്നത് പ്രമേഹ നിയന്ത്രണത്തിന് ഗുണകരമാകുമെന്ന് പഠനങ്ങൾ സൂചിപ്പിക്കുന്നു.

ഡയറ്റീഷ്യനും പ്രമേഹ വിദ്യാഭ്യാസ വിദഗ്ധയുമായ കനിക്ക മൽഹോത്രയുടെ അഭിപ്രായത്തിൽ, കാർബോഹൈഡ്രേറ്റ് കൂടുതലുള്ള ഭക്ഷണത്തിന് മുമ്പോ അതിനൊപ്പമോ ബദാം കഴിക്കുന്നത് ഭക്ഷണശേഷം രക്തത്തിലെ ഗ്ലൂക്കോസ് പെട്ടെന്ന് ഉയരുന്നത് കുറയ്ക്കാൻ സഹായിച്ചേക്കാം. രാവിലെ പ്രഭാതഭക്ഷണത്തിനൊപ്പം ബദാം കഴിക്കുന്നത് പിന്നീട് കഴിക്കുന്ന ഭക്ഷണത്തിന് ശേഷമുള്ള രക്തത്തിലെ പഞ്ചസാരയുടെ ഉയർച്ച കുറയ്ക്കുന്ന “സെക്കൻഡ് മീൽ ഇഫക്റ്റ്” നൽകാമെന്നും ചില പഠനങ്ങൾ വ്യക്തമാക്കുന്നു.

ബദാമിൽ ധാരാളം മഗ്നീഷ്യം, നാരുകൾ (ഫൈബർ), പ്രോട്ടീൻ, ആരോഗ്യകരമായ അപൂരിത കൊഴുപ്പുകൾ അടങ്ങിയിട്ടുണ്ട്. മഗ്നീഷ്യം ഇൻസുലിന്റെ പ്രവർത്തനം മെച്ചപ്പെടുത്താൻ സഹായിക്കുമ്പോൾ, ഫൈബർ കാർബോഹൈഡ്രേറ്റിന്റെ ദഹനം മന്ദഗതിയിലാക്കി രക്തത്തിലെ പഞ്ചസാരയുടെ ഉയർച്ച നിയന്ത്രിക്കാൻ സഹായിക്കുന്നു. ആരോഗ്യകരമായ കൊഴുപ്പുകൾ കൂടുതൽ നേരം വിശപ്പ് തോന്നാതിരിക്കാനും ഹൃദയാരോഗ്യം സംരക്ഷിക്കാനും സഹായിക്കുമെന്ന് വിദഗ്ധർ പറയുന്നു.

കുതിർത്ത ബദാമിനും പച്ച ബദാമിനും തമ്മിൽ പോഷകമൂല്യത്തിൽ വലിയ വ്യത്യാസമില്ലെന്നും പഠനങ്ങൾ സൂചിപ്പിക്കുന്നു. കുതിർക്കുന്നത് ബദാമിന്റെ തൊലി മൃദുവാകുന്നതിനാൽ ചിലർക്കെങ്കിലും ദഹിക്കാൻ എളുപ്പമാകുമെന്നതാണ് പ്രധാന ഗുണം. പോഷകങ്ങളുടെ അളവ് ഗണ്യമായി വർധിക്കുമെന്നതിന് വ്യക്തമായ തെളിവില്ല.

അതേസമയം, ബദാം ഉയർന്ന കലോറി അടങ്ങിയ ഭക്ഷണമാണ്. അതിനാൽ പ്രതിദിനം അഞ്ച് മുതൽ പത്ത് വരെ ബദാം (ഏകദേശം 30–40 ഗ്രാം) മതിയെന്നാണ് വിദഗ്ധരുടെ നിർദേശം. അമിതമായി കഴിക്കുന്നത് ശരീരഭാരം കൂടാൻ കാരണമായേക്കാം. നട്ട് അലർജിയുള്ളവർ ബദാം ഒഴിവാക്കണമെന്നും ഡോക്ടർമാർ നിർദേശിക്കുന്നു.

വിദഗ്ധർ ചൂണ്ടിക്കാട്ടുന്നത്, ബദാം മാത്രം കഴിച്ചാൽ പ്രമേഹം നിയന്ത്രിക്കാമെന്ന ധാരണ തെറ്റാണെന്നാണ്. സമീകൃത ഭക്ഷണക്രമം, പതിവ് വ്യായാമം, ആവശ്യമായ മരുന്നുകൾ, ശരീരഭാരം നിയന്ത്രിക്കൽ എന്നിവയോടൊപ്പം ബദാം ഉൾപ്പെടുത്തുമ്പോഴാണ് കൂടുതൽ ആരോഗ്യഗുണങ്ങൾ ലഭിക്കുക.