ചെറുപ്പക്കാരെ തേടിയെത്തുന്ന 'സൈലന്‍റ് കില്ലർ' സ്ട്രോക്ക്! നിസ്സാരമായി കാണരുത് ഈ അഞ്ച് ലക്ഷണങ്ങൾ...

മുൻകാലങ്ങളിൽ പ്രായമായവരിൽ മാത്രം കണ്ടിരുന്ന പക്ഷാഘാതം അഥവാ സ്ട്രോക്ക് ഇന്ന് ചെറുപ്പക്കാരിലും ആശങ്കജനകമായ രീതിയിൽ വർധിച്ചുവരുന്നതായാണ് പുതിയ റിപ്പോർട്ടുകൾ. ഇരുപതുകളിലും മുപ്പതുകളിലുമുള്ളവരിൽപോലും സ്ട്രോക്ക് കേസുകൾ ഞെട്ടിക്കുന്ന രീതിയിൽ റിപ്പോർട്ട് ചെയ്യപ്പെടുന്നത് ആരോഗ്യമേഖലയിൽ വലിയ രീതിയിൽ ചർച്ചയായിക്കൊണ്ടിരിക്കുകയാണ്. ആധുനിക ജീവിതശീലങ്ങളും മാറിയ സാഹചര്യങ്ങളുമാണ് ഈ പ്രായത്തിലുള്ളവരെയും അപകടാവസ്ഥയിലേക്ക് തള്ളിവിടുന്നതെന്നാണ് പുതിയ പഠനങ്ങൾ.

ജീവിതശൈലികളിൽ വളരെപ്പെട്ടെന്നുണ്ടായ മാറ്റങ്ങളും ജോലിസ്ഥലത്തെ കടുത്ത സമ്മർദ്ദങ്ങളും ചെറുപ്പക്കാരുടെ രക്തക്കുഴലുകളെ പ്രതികൂലമായി ബാധിക്കുന്നെന്ന് ന്യൂറോളജിസ്റ്റുകൾ വ്യക്തമാക്കുന്നു. ഇത് കൂടാതെ, വ്യായാമമില്ലായ്മ, ദീർഘനേരം ഒരേയിടത്തിരുന്ന് ജോലി ചെയ്യുക, അനാരോഗ്യകരമായ ഭക്ഷണരീതികൾ, ക്രമരഹിതമായ ഉറക്കം എന്നിവ ചെറുപ്രായത്തിൽ തന്നെ രക്തസമ്മർദ്ദം, പ്രമേഹം, അമിതവണ്ണം, കൊളസ്ട്രോൾ തുടങ്ങിയ പ്രശ്നങ്ങൾക്ക് കാരണമായേക്കും. പുകവലി, മദ്യപാനം, ലഹരിവസ്തുക്കളുടെ ഉപയോഗം എന്നിവയും രക്തക്കുഴലുകളെ തകരാറിലാക്കി സ്ട്രോക്ക് സാധ്യത ഇരട്ടിയാക്കുന്നുണ്ടെന്ന് ആരോഗ്യ വിദഗ്ദ്ധർ ചൂണ്ടിക്കാണിക്കുന്നുണ്ട്.

പാരമ്പര്യമായി പ്രമേഹം, രക്തസമ്മർദ്ദം, ഹൃദ്രോഗങ്ങൾ അല്ലെങ്കിൽ രക്തം കട്ടപിടിക്കുന്ന ജനിതക പ്രശ്നങ്ങൾ ഉള്ള കുടുംബങ്ങളിൽ നിന്നുള്ള യുവാക്കൾ കൂടുതൽ ജാഗ്രത പാലിക്കണമെന്ന് വിദഗ്ധർ മുന്നറിയിപ്പ് നൽകുന്നു. ഇത്തരം പാരമ്പര്യ പശ്ചാത്തലമുള്ളവർ 35 വയസ്സിനു പകരം 20-നും 25-നും ഇടയിൽ പ്രായമുള്ളപ്പോൾ തന്നെ പതിവ് ഹെൽത്ത് ചെക്ക്അപ്പുകൾ നടത്തിവരണമെന്നും ഡോക്ടർമാർ നിർദ്ദേശിക്കുന്നുണ്ട്.

പെട്ടെന്ന് തിരിച്ചറിഞ്ഞില്ലെങ്കിൽ ജീവന് തന്നെ ഭീഷണിയായേക്കാവുന്ന സ്ട്രോക്കിന്റെ പ്രധാനപ്പെട്ട ചില ലക്ഷണങ്ങൾ ഏതെല്ലാമെന്ന് പരിശോധിക്കാം,

• ശരീരത്തിന്റെ ഒരു വശത്തെ തളർച്ചയും മരവിപ്പും

സ്ട്രോക്ക് സംഭവിക്കുമ്പോൾ തലച്ചോറിലെ ഒരു വശത്തേക്കുള്ള രക്തയോട്ടം തടസ്സപ്പെടുകയും, ഇത് ശരീരത്തിന്റെ എതിർവശത്തെ നിയന്ത്രണത്തെ ബാധിക്കുകയും ചെയ്യുന്നു. പെട്ടെന്ന് മുഖത്തിന്റെ ഒരു വശം താഴേക്ക് കോടിപ്പോകുക, ചിരിക്കാൻ ശ്രമിക്കുമ്പോൾ വായ ഒരു വശത്തേക്ക് വലിഞ്ഞുനിൽക്കുക, അല്ലെങ്കിൽ ഒരു കൈയോ കാലോ ഉയർത്താൻ കഴിയാത്തവിധം പെട്ടെന്ന് ബലഹീനത അനുഭവപ്പെടുക എന്നിവ ഇതിന്റെ പ്രധാന ലക്ഷണങ്ങളാണ്. പലപ്പോഴും കൈയിലുള്ള വസ്തുക്കൾ അറിയാതെ താഴെ വീണുപോകുന്നതിലൂടെയോ ശരീരത്തിന്റെ ഒരു വശം പൂർണ്ണമായി മരവിച്ചുപോകുന്നതിലൂടെയോ ആണ് ഇത് തിരിച്ചറിയുന്നത്.

• സംസാരത്തിൽ അനുഭവപ്പെടുന്ന തടസ്സവും അവ്യക്തതയും

സംസാരത്തെയും ഭാഷയെയും നിയന്ത്രിക്കുന്ന തലച്ചോറിലെ ഭാഗങ്ങളെ സ്ട്രോക്ക് ബാധിക്കുമ്പോൾ വ്യക്തിക്ക് വ്യക്തമായി സംസാരിക്കാൻ സാധിക്കാതെ വരുന്നു. സാധാരണമായി പറയുന്ന വാക്കുകൾ പോലും കുഴഞ്ഞുപോകുക, ഉദ്ദേശിക്കുന്ന കാര്യം മറ്റുള്ളവരോട് പറയാൻ കഴിയാതെ വരിക, അല്ലെങ്കിൽ മറ്റുള്ളവർ സംസാരിക്കുന്നത് കേട്ടാൽ പോലും അത് മനസ്സിലാക്കാൻ സാധിക്കാതെ വരിക എന്നിവയാണ് ഈ അവസ്ഥയിൽ സംഭവിക്കുന്നത്. സംസാരിക്കാൻ പറയുമ്പോൾ വാക്കുകൾ കിട്ടാതെ വരുന്നത് സ്ട്രോക്കിന്റെ വളരെ പ്രധാനപ്പെട്ട ഒരു ലക്ഷണമാണ്.

• കാഴ്ചയിൽ പെട്ടെന്നുണ്ടാകുന്ന തകരാറുകൾ

കണ്ണുകളിലേക്ക് കാഴ്ച സന്ദേശങ്ങൾ എത്തിക്കുന്ന തലച്ചോറിലെ ഞരമ്പുകളെ സ്ട്രോക്ക് ബാധിക്കുമ്പോൾ കാഴ്ചശക്തിയെ അത് നേരിട്ട് ബാധിക്കുന്നു. ഒന്നോ രണ്ടോ കണ്ണുകളിൽ പെട്ടെന്ന് കാഴ്ച മങ്ങുക, ഒരു വസ്തു രണ്ടായി കാണപ്പെടുക, അല്ലെങ്കിൽ പെട്ടെന്ന് ഒരു കണ്ണിന്റെയോ രണ്ട് കണ്ണുകളുടെയോ കാഴ്ച പൂർണ്ണമായി നഷ്ടപ്പെടുക എന്നിവ സംഭവിക്കാം. മറ്റ് ലക്ഷണങ്ങൾക്കൊപ്പമോ അല്ലാതെയോ ഈ മാറ്റങ്ങൾ പെട്ടെന്ന് പ്രത്യക്ഷപ്പെടാം.

• സന്തുലിതാവസ്ഥയും ഏകോപനവും നഷ്ടപ്പെടുക

ശരീരത്തിന്റെ ബാലൻസ് നിയന്ത്രിക്കുന്ന തലച്ചോറിലെ ഭാഗമായ സെറിബെല്ലത്തെ സ്ട്രോക്ക് ബാധിച്ചാൽ പെട്ടെന്ന് നിൽക്കാനോ നടക്കാനോ സാധിക്കാതെ വരും. അമിതമായ തലകറക്കം അനുഭവപ്പെടുക, നടക്കുമ്പോൾ കാലുകൾ ഇടറി ഒരു വശത്തേക്ക് ചരിഞ്ഞുപോവുക, വടിയോ മറ്റോ ഇല്ലാതെ സ്വയം ബാലൻസ് ചെയ്ത് നിൽക്കാൻ കഴിയാതെ വരിക എന്നിവയാണ് ഇതിന്റെ പ്രകടനങ്ങൾ. സാധാരണ തലകറക്കത്തിൽ നിന്ന് വ്യത്യസ്തമായി പെട്ടെന്നുള്ള ബാലൻസ് നഷ്ടപ്പെടൽ വളരെ അപകടകരമാണ്.

• കാരണമില്ലാത്ത കഠിനമായ തലവേദന

തലച്ചോറിലെ രക്തക്കുഴലുകൾ പൊട്ടുന്നതുകൊണ്ട് ഉണ്ടാകുന്ന ഹെമറേജിക് സ്ട്രോക്കിന്റെ പ്രധാന ലക്ഷണമാണ് അതിശക്തമായ തലവേദന. ജീവിതത്തിൽ ഇന്നുവരെ അനുഭവപ്പെട്ടിട്ടില്ലാത്ത വിധം പെട്ടെന്ന് ഉണ്ടാകുന്ന കഠിനമായ തലവേദനയാണിത്. സാധാരണ തലവേദനകളിൽ നിന്ന് വ്യത്യസ്തമായി, യാതൊരു മുൻ ലക്ഷണങ്ങളും ഇല്ലാതെ പെട്ടെന്ന് ആരംഭിക്കുന്ന ഈ തലവേദനയോടൊപ്പം ഛർദ്ദി, തലകറക്കം, ബോധക്ഷയം എന്നിവയും ഉണ്ടാകാൻ സാധ്യതയുണ്ട്.

രോഗലക്ഷണങ്ങൾ കണ്ടുതുടങ്ങിയാൽ ഓരോ മിനിറ്റും തലച്ചോറിന് അതിനിർണായകമാണ്. ലക്ഷണങ്ങൾ കണ്ടാലുടൻ രോഗിയെ സ്ട്രോക്ക് കെയർ സൗകര്യമുള്ള ആശുപത്രിയിലേക്ക് മാറ്റാൻ ശ്രദ്ധിക്കുക. കൃത്യസമയത്ത് ചികിത്സ ലഭ്യമാക്കിയാൽ ഗുരുതരമായ സങ്കീർണ്ണതകളിൽ നിന്നും ജീവൻ തന്നെ രക്ഷിക്കാനും സാധിക്കും.