'ഒരു കപ്പ് ചായയിൽ 1,160 കോടി പ്ലാസ്റ്റിക് കണികകൾ!'; ടീ ബാഗുകൾ സുരക്ഷിതമാണോ? ശാസ്ത്രം പറയുന്നത് ഇങ്ങനെ...

രാവിലെയൊരു കപ്പ് ചൂടുചായ കുടിക്കുമ്പോൾ മനസ്സിനും ശരീരത്തിനും ലഭിക്കുന്ന ഉന്മേഷം ചെറുതല്ല. ഇന്നത്തെ തിരക്കുപിടിച്ച ജീവിതത്തിൽ ചായപ്പൊടിയും അരിപ്പയുമൊന്നും ഉപയോഗിക്കാതെ എളുപ്പത്തിൽ ചായ തയ്യാറാക്കാൻ നമ്മളിൽ പലരും ആശ്രയിക്കുന്നത് 'ടീ ബാഗുകളെ'യാണ്. എന്നാൽ, ആ നൊടിയിടയിലെ സൗകര്യത്തിന് പിന്നിൽ വലിയൊരു ആരോഗ്യ ഭീഷണി ഒളിഞ്ഞിരിപ്പുണ്ടെന്ന് നിങ്ങൾക്കറിയാമോ?

നാം ആസ്വദിച്ചു കുടിക്കുന്ന ഓരോ കപ്പ് ടീ ബാഗ് ചായയിലൂടെയും കോടിക്കണക്കിന് പ്ലാസ്റ്റിക് കണികകളാണ് നമ്മുടെ ഉള്ളിലെത്തുന്നത്. കേൾക്കുമ്പോൾ അവിശ്വസനീയമെന്ന് തോന്നാമെങ്കിലും പ്രമുഖ സർവകലാശാലകൾ നടത്തിയ പഠനങ്ങൾ ഇക്കാര്യം ചൂണ്ടിക്കാണിക്കുന്നു. എന്താണ് ഈ മൈക്രോപ്ലാസ്റ്റിക്കുകൾ? അവ എങ്ങനെയാണ് നമ്മുടെ ചായയിൽ കലരുന്നത്? ഇതിൽ നിന്നും രക്ഷനേടാൻ എന്തുചെയ്യണം എന്നതിനെക്കുറിച്ച് കൂടുതലറിയാം.

ശാസ്ത്രലോകം കണ്ടെത്തിയ ഞെട്ടിക്കുന്ന വസ്തുതകൾ

ടീ ബാഗുകളെക്കുറിച്ച് നടന്ന വിവിധ പഠനങ്ങൾ ഈ പ്രശ്നത്തിന്റെ ഗുരുതരാവസ്ഥ വെളിപ്പെടുത്തുന്നു.ഒരു പ്ലാസ്റ്റിക് ടീ ബാഗ് തിളച്ച വെള്ളത്തിൽ മുക്കുമ്പോൾ ഏകദേശം 1,160 കോടി മൈക്രോപ്ലാസ്റ്റിക് കണികകളും 310 കോടി നാനോപ്ലാസ്റ്റിക് കണികകളും ഒരു കപ്പ് ചായയിലേക്ക് പുറത്തുവിടുമെന്ന് കണ്ടെത്തി.

ഉപയോഗിക്കുന്ന വസ്തുവിനെ ആശ്രയിച്ച് ഒരു കപ്പിൽ നിന്ന് ഒരു ബില്യണിലധികം കണികകൾ പുറത്തുവിടാൻ കഴിയുമെന്ന് സമീപകാല വിശകലനങ്ങൾ സൂചിപ്പിക്കുന്നു. ചില പരീക്ഷണങ്ങളിൽ ഇതിലും ഉയർന്ന സംഖ്യകൾ അതായത്1,470 കോടി വരെ നാനോ പ്ലാസ്റ്റിക്കുകള്‍ പുറത്ത് വിടാമെന്ന് കണ്ടെത്തിയിട്ടുണ്ടെന്നും റിപ്പോര്‍ട്ടുകളുണ്ട്. നഗ്നനേത്രങ്ങൾ കൊണ്ട് കാണാൻ കഴിയാത്തത്ര ചെറുതാണ് ഈ കണികകൾ. ഇതിൽ മൈക്രോപ്ലാസ്റ്റിക്കുകൾ ചെറുതാണെങ്കിൽ, നാനോപ്ലാസ്റ്റിക്കുകൾ നമ്മുടെ ശരീരകോശങ്ങൾക്കുള്ളിലേക്ക് പോലും കടക്കാൻ ശേഷിയുള്ള അത്രയും സൂക്ഷ്മമാണ്.

എന്തുകൊണ്ടാണ് ടീ ബാഗുകളിൽ നിന്ന് പ്ലാസ്റ്റിക് പുറത്തുവരുന്നത്?

എല്ലാ ടീ ബാഗുകളും വെറും കടലാസ് മാത്രമല്ല. ഇന്ന് വിപണിയിലിറങ്ങുന്ന ടീ ബാഗുകളില്‍ പോളിപ്രൊഫൈലിൻ, നൈലോൺ, പ്ലാസ്റ്റിക് കലര്‍ന്ന "സിൽക്കൺ" മെഷ് തുടങ്ങിയ വസ്തുക്കൾ അടങ്ങിയിട്ടുണ്ട്.

ചായ തയ്യാറാക്കുമ്പോൾ വെള്ളത്തിന് ഏകദേശം 95°C ചൂടുണ്ടാകും. ഈ ഉയർന്ന താപനിലയിൽ പ്ലാസ്റ്റിക് നാരുകൾ പെട്ടെന്ന് വിഘടിക്കുകയും വെള്ളത്തിലേക്ക് പ്ലാസ്റ്റിക് കണികകൾ പടരുകയും ചെയ്യുന്നു.

ചായപ്പൊടിയിലോ വെള്ളത്തിലോ ഉള്ളതിനേക്കാൾ കൂടുതൽ പ്ലാസ്റ്റിക് അംശം ചായയിൽ കലരുന്നത് ഇത്തരം ടീ ബാഗുകൾ വഴിയാണെന്ന് ഗവേഷണങ്ങൾ സ്ഥിരീകരിക്കുന്നു.

നമ്മുടെ ശരീരത്തെ എങ്ങനെ ബാധിക്കും?

മൈക്രോപ്ലാസ്റ്റിക് ആരോഗ്യത്തെ എങ്ങനെ ബാധിക്കുമെന്നതിൽ പഠനങ്ങൾ തുടരുകയാണ്. എങ്കിലും പ്രാഥമിക കണ്ടെത്തലുകൾ ആശങ്കാജനകമാണ്.നമ്മുടെ കുടലിലെ കോശങ്ങൾക്ക് ഈ മൈക്രോ-നാനോ പ്ലാസ്റ്റിക്കുകളെ ആഗിരണം ചെയ്യാൻ കഴിയുമെന്ന് ലാബ് പരിശോധനകൾ തെളിയിക്കുന്നു. ഈ സൂക്ഷ്മ കണികകൾ രക്തത്തിൽ കലരാനും ശരീരത്തിന്റെ വിവിധ ഭാഗങ്ങളിലേക്ക് വ്യാപിക്കാനും സാധ്യതയുണ്ട്.ഇത് കുടലിന്റെ ആരോഗ്യത്തെ ദോഷകരമായി ബാധിക്കാൻ സാധ്യതയുണ്ട്.

ശരീരത്തിൽ വീക്കം, ഹോർമോൺ വ്യതിയാനങ്ങൾ എന്നിവയ്ക്ക് മൈക്രോപ്ലാസ്റ്റിക് കാരണമായേക്കാമെന്ന് പൊതുവായ ഗവേഷണങ്ങൾ സൂചിപ്പിക്കുന്നു. മനുഷ്യരിലെ ദീർഘകാല പ്രത്യാഘാതങ്ങളെക്കുറിച്ച് കൂടുതൽ ആഴത്തിലുള്ള പഠനങ്ങൾ നടന്നുവരികയാണ്.

ഭിന്നാഭിപ്രായങ്ങള്‍

ഈ വിഷയത്തിൽ ചില ഭിന്നാഭിപ്രായങ്ങളും നിലനിൽക്കുന്നുണ്ട് എന്നത് ശ്രദ്ധേയമാണ്. മുമ്പത്തെ പഠനങ്ങൾ കണക്കുകൾ പെരുപ്പിച്ചു കാട്ടിയതാകാം എന്ന് ചില ഏജൻസികൾ വാദിക്കുന്നു. അളക്കുന്ന രീതിയിലെ വ്യത്യാസങ്ങളാണ് ഇതിന് കാരണമായി അവർ ചൂണ്ടിക്കാട്ടുന്നത്.

എങ്കിലും, പ്ലാസ്റ്റിക് അടങ്ങിയ ടീ ബാഗുകൾ ചായയിലേക്ക് പ്ലാസ്റ്റിക് കണികകൾ പുറന്തള്ളുന്നുണ്ട് എന്ന കാര്യത്തിൽ ഭൂരിഭാഗം ശാസ്ത്രജ്ഞരും യോജിക്കുന്നു.

പ്ലാസ്റ്റിക് ഒഴിവാക്കാൻ എന്തുചെയ്യാം?

മൈക്രോപ്ലാസ്റ്റിക് ശരീരത്തിലെത്തുന്നത് തടയാൻ വിദഗ്ധർ നിർദ്ദേശിക്കുന്ന ലളിതമായ വഴികൾ ഇവയാണ്:

ടീ ബാഗുകൾ പൂർണ്ണമായും ഒഴിവാക്കി ലൂസ് ചായപ്പൊടി ഉപയോഗിച്ച് ചായ തയ്യാറാക്കുന്നതാണ് ഏറ്റവും സുരക്ഷിതം.

സ്റ്റീൽ അല്ലെങ്കിൽ ഗ്ലാസ് കൊണ്ടുണ്ടാക്കിയ അരിപ്പകള്‍ ഉപയോഗിക്കുക.

പ്ലാസ്റ്റിക് രഹിതമെന്നോ അല്ലെങ്കിൽ പൂർണ്ണമായും മണ്ണിൽ ലയിക്കുന്നതെന്നോ സാക്ഷ്യപ്പെടുത്തിയ ബ്രാൻഡുകൾ മാത്രം തെരഞ്ഞെടുക്കുക.

ടീ ബാഗ് ഉപയോഗിക്കുന്നുണ്ടെങ്കിൽ, അത് തിളച്ച വെള്ളത്തിൽ അമിതനേരം മുക്കിവയ്ക്കാതിരിക്കാൻ ശ്രദ്ധിക്കുക.

സൗകര്യത്തിന് നാം നൽകുന്ന മുൻഗണന നമ്മുടെ ആരോഗ്യത്തിന് വിലങ്ങുതടിയാകുന്നു എന്നതിന്റെ തെളിവാണ് ടീ ബാഗുകളെക്കുറിച്ചുള്ള ഈ പഠനങ്ങൾ. നൈലോൺ, പോളിപ്രൊഫൈലിൻ തുടങ്ങിയ പ്ലാസ്റ്റിക് അംശങ്ങൾ അടങ്ങിയ ടീ ബാഗുകൾ ഉയർന്ന താപനിലയിൽ കോടിക്കണക്കിന് സൂക്ഷ്മ കണികകളെ ചായയിലേക്ക് പുറന്തള്ളുന്നു. ഇവ നമ്മുടെ രക്തത്തിലേക്കും കോശങ്ങളിലേക്കും കടക്കാനിടയുണ്ടെന്നത് ഗൗരവകരമായ കാര്യമാണ്. ടീ ബാഗുകൾക്ക് പകരം പഴയ രീതിയിലുള്ള ചായപ്പൊടി ഉപയോഗിക്കുന്നതോ, പ്ലാസ്റ്റിക് രഹിത ടീ ബാഗുകൾ തെരഞ്ഞെടുക്കുന്നതോ ആണ് ഏറ്റവും ഉചിതമെന്ന് മറക്കാതിരിക്കുക.