ഡൽഹിയിൽ മന്ത്രിമാരെ തീരുമാനിക്കാനാകാതെ ബിജെപി; പിന്നിൽ ആഭ്യന്തര തർക്കമെന്ന്​​ അതിഷി

ന്യൂഡൽഹി: ഡൽഹി നിയമസഭാ തെരഞ്ഞെടുപ്പിൽ മികച്ച വിജയം നേടിയിട്ടും മുഖ്യമന്ത്രിയെയും മന്ത്രിമാരെയും തീരുമാനിക്കാനാകാതെ ബിജെപി. വകുപ്പ്​ വിഭജനത്തെ ചൊല്ലി ബിജെപി എംഎൽഎമാർക്കിടയിൽ ആഭ്യന്തര തർക്കമുണ്ടെന്ന്​ മുൻ മുഖ്യമന്ത്രിയും ആം ആദ്​മി പാർട്ടി നേതാവുമായ അതിഷി ആരോപിച്ചു. തെരഞ്ഞെടുപ്പ് വാഗ്ദാനങ്ങൾ പാലിക്കാതിരിക്കാൻ ബിജെപി ന്യായീകരണങ്ങൾ പറയുകയാണെന്നും അവർ വാർത്താസമ്മേളനത്തിൽ പറഞ്ഞു.

പൊതുമുതൽ ‘ചൂഷണം’ ചെയ്യാൻ മന്ത്രി സ്ഥാനങ്ങൾക്കായി ബിജെപി നേതാക്കൾ തർക്കത്തിൽ ഏർപ്പെട്ടിരിക്കുകയാണ്​. ബിജെപിയുടെ തെരഞ്ഞെടുപ്പ് പ്രകടന പത്രികയിൽ നൽകിയ വാഗ്ദാനങ്ങൾ പാലിക്കാൻ അവർക്ക് ഉദ്ദേശ്യമില്ലെന്നും അതിഷ കുറ്റപ്പെടുത്തി.

വാഗ്ദാനങ്ങൾ പാലിക്കുന്നതിൽ പരാജയപ്പെട്ടതിന് ആം ആദ്മി പാർട്ടിയെ കുറ്റപ്പെടുത്താൻ ബിജെപി പദ്ധതിയിടുന്നതായി വിവിധ സ്രോതസ്സുകളിൽനിന്ന് തങ്ങൾക്ക് മനസ്സിലായിട്ടുണ്ട്​. മുൻ ആം ആദ്മി ഭരണകൂടം കാരണം ഡൽഹി സർക്കാരിന് പണമില്ലെന്ന് അവർ കുറ്റപ്പെടുത്തുമെന്നും അതിഷി പറഞ്ഞു.

എന്നാൽ, 2014-15ലെ 31,000 കോടി രൂപയിൽനിന്ന് 2024-25ൽ 77,000 കോടി രൂപയായി ഡൽഹിയുടെ ബജറ്റ് വർധിപ്പിക്കാൻ സാധിച്ചിട്ടുണ്ട്​. കഴിഞ്ഞ 10 വർഷത്തിനിടെ ഡൽഹിയുടെ ബജറ്റ് 2.5 മടങ്ങ് വർധിച്ചു. മുൻ കോൺഗ്രസ് ഭരണകൂടം ബാക്കിവച്ച കടം പോലും അരവിന്ദ് കെജ്‌രിവാളിന്റെ നേതൃത്വത്തിലുള്ള സർക്കാർ തിരിച്ചടച്ചു. സ്ത്രീകൾക്ക് പ്രതിമാസം 2500 രൂപ നൽകുമെന്നത്​ ഉൾപ്പെടെയുള്ള ബിജെപിയുടെ എല്ലാ വാഗ്ദാനങ്ങളും കാലതാമസമില്ലാതെ നടപ്പാക്കണമെന്നും അതിഷി ആവശ്യപ്പെട്ടു.