കശ്മീരിൽ തെരഞ്ഞെടുപ്പ് നടത്തിയാൽ നാഷണൽ കോൺഫറൻസ് മത്സരിക്കും: ഫാറൂഖ് അബ്ദുല്ല

ജമ്മുകശ്മീരിന്റെ സംസ്ഥാന പദവി പുനഃസ്ഥാപിക്കുന്നതിനായുള്ള പോരാട്ടങ്ങൾ തുടരുമ്പോൾ തന്നെ, തെരഞ്ഞെടുപ്പ് എപ്പോൾ നടത്തിയാലും തങ്ങൾ മത്സരിക്കുമെന്ന് നാഷണൽ കോൺഫറൻസ് നേതാവും മുൻ മുഖ്യമന്ത്രിയുമായ ഫാറൂഖ് അബ്ദുല്ല. തന്റെ പിതാവും പാർട്ടി സ്ഥാപകനുമായ ഷെയ്ഖ് മുഹമ്മദ് അബ്ദുല്ലയുടെ 39-ാം ചരമവാർഷിക ചടങ്ങിനു ശേഷം മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം.

'തെരഞ്ഞെടുപ്പ് എപ്പോഴാണ് നടത്തുക എന്ന് ഞങ്ങൾക്കറിയില്ല. പക്ഷേ, അക്കാര്യത്തിൽ ഞങ്ങൾക്കൊരു നിലപാടുണ്ട്. ജമ്മു കശ്മീരിൽ എപ്പോൾ തെരഞ്ഞെടുപ്പ് നടത്തിയാലും നാഷണൽ കോൺഫറൻസ് മത്സരിക്കും.' - അദ്ദേഹം പറഞ്ഞു.

2019 ആഗസ്റ്റ് അഞ്ചിന് കേന്ദ്രസർക്കാർ, ജമ്മുകശ്മീരിന് പ്രത്യേകാവകാശങ്ങൾ നൽകിയിരുന്ന ഭരണഘടനയിലെ 370-ാം വകുപ്പ് എടുത്തുമാറ്റിയിരുന്നു. ജമ്മുവിനെയും കശ്മീരിനെയും കേന്ദ്രഭരണ പ്രദേശങ്ങളായി പ്രഖ്യാപിക്കുകയും ചെയ്തു. 370 എടുത്തുകളയുന്നതിനെ തുടർന്ന് ഫാറൂഖ് അബ്ദുല്ലയടക്കമുള്ള നിരവധി രാഷ്ട്രീയ നേതാക്കളെ തടവിലാക്കിയിരുന്നു.