ഹിജാബ് വിലക്കിനായി മുന്നില്‍, വിദ്യാർഥിനികളെ തീവ്രവാദികളെന്ന് വിളിച്ചു; ഉഡുപ്പിയിൽ യശ്പാൽ സുവർണക്ക് സീറ്റ് നൽകി ബി.ജെ.പി

ഉഡുപ്പി: ഹിജാബ് നിരോധനത്തിനെതിരെ കോടതിയിൽ പോയ വിദ്യാർഥികളെ തീവ്രവാദികളെന്നും രാജ്യദ്രോഹികളെന്നും വിളിച്ച യശ്പാൽ സുവർണക്ക് കർണാടക നിയമസഭാതെരഞ്ഞെടുപ്പിൽ സീറ്റനുവദിച്ച് ബി.ജെ.പി. ഹിജാബ് വിലക്കിനെതിരെ ഏറെ പ്രതിഷേധം നടന്ന ഉഡുപ്പിയിലാണ് യശ്പാൽ സുവർണ മത്സരിക്കുക. അതേസമയം, ഈ ഹിജാബ് വിലക്കുമായി ബന്ധപ്പെട്ട് വിവാദങ്ങൾക്ക് തുടക്കമിട്ട സിറ്റിങ് എം.എൽ.എ രഘുപതി ഭട്ടിനെ വെട്ടിക്കൊണ്ടാണ് സുവർണക്ക് ബി.ജെ.പി അവസരം നൽകിയത്. പാർട്ടി നടപടിക്കെതിരെ വലിയ വിമർശനമാണ് രഘുപതി ഭട്ട് ഉന്നയിച്ചത്.

വരാനിരിക്കുന്ന കർണാടക തിരഞ്ഞെടുപ്പിൽ ബിജെപിയിൽ നിന്ന് മത്സരിക്കുന്ന പുതുമുഖങ്ങളിലൊന്നാണ് സുവർണ.ഹിജാബ് വിലക്കിനെതിരെ വലിയ രീതിയിൽ പ്രതിഷേധം നടന്ന ഉഡുപ്പി ഗവൺമെന്റ് പിയു ഗേൾസ് കോളേജിലെ ഡെവലപ്മെന്റ് കമ്മിറ്റിയുടെ വൈസ് പ്രസിഡന്റുകൂടിയായിരുന്നു അദ്ദേഹം. ഫ്രാൻസിന് മുമ്പ് ഹിജാബും ഹലാലും നിരോധിക്കുന്ന ലോകത്തിലെ ആദ്യത്തെ രാജ്യമായിരിക്കും ഇന്ത്യയെന്ന് യശ്പാൽ സുവർണ നേരത്തെ പറഞ്ഞത് ഏറെ വിവാദമായിരുന്നു.

ഹിജാബ് വിഷയത്തിൽ ദക്ഷിണ കന്നഡ മേഖലയിൽ അശാന്തി സൃഷ്ടിച്ചത് നിരോധിത പോപ്പുലർ ഫ്രണ്ട് ഓഫ് ഇന്ത്യയാണെന്ന് സുവർണ ന്യൂസ് 18 ന് നൽകിയ അഭിമുഖത്തിൽ പറഞ്ഞു.

''ഉഡുപ്പിയിലുള്ളവർ സന്തോഷവും സമാധാനം ഇഷ്ടപ്പെടുന്നവരാണ്. പിഎഫ്‌ഐ, കെഎഫ്ഡി (കർണാടക ഫോറം ഫോർ ഡിഗ്‌നിറ്റി), കാമ്പസ് ഫ്രണ്ട് ഓഫ് ഇന്ത്യ (സിഎഫ്‌ഐ) എന്നിവർ പെൺകുട്ടികൾക്ക് വിദ്യാഭ്യാസം നൽകരുതെന്ന ലക്ഷ്യത്തോടെയാണ് പ്രശ്‌നങ്ങൾ സൃഷ്ടിച്ചത്. ഇവർ പാവപ്പെട്ട ഹിന്ദു വിദ്യാർത്ഥികൾക്ക് നല്ല വിദ്യാഭ്യാസം ലഭിക്കരുതെന്ന് ആഗ്രഹിക്കുന്നവരാണ്. ഗവൺമെന്റ് പിയു കോളേജിലെ സാമ്പത്തികമായി പിന്നാക്കം നിൽകുന്ന വിദ്യാർത്ഥികളുടെ ശ്രദ്ധ തിരിക്കാനാണ് അവർ ആഗ്രഹിച്ചത്. അതിന് വേണ്ടി ഹിജാബ് പ്രശ്‌നം ആളിക്കത്തിക്കുകയായിരുന്നു..' സുവർണ പറഞ്ഞു. തന്റെ തെരഞ്ഞെടുപ്പ് പ്രചാരണ വേളയിൽ ഈ വിഷയം ഉന്നയിക്കുമെന്നും സുവർണ വ്യക്തമാക്കി.

ഹിജാബ് നിരോധനത്തിനെതിരെ കോടതിയെ സമീപിച്ച ആറ് പെൺകുട്ടികൾ വളരെ ചെറുപ്പമാണ്. അവർക്ക് രാജ്യത്തെ നിയമത്തെക്കുറിച്ച് അറിയില്ല. അവർക്ക് വോട്ടവകാശമില്ല, എന്നിട്ടും അവർ ഒരു ഹരജി ഫയൽ ചെയ്യാൻ കോടതിയിൽ പോകുന്നു. അവർക്ക് പിന്നിൽ ശക്തമായ ഒരു ശക്തിയുണ്ടെന്നും അതിനെ ഞാൻ 'സാമൂഹിക വിരുദ്ധ സംഘടനകൾ' എന്ന് വിളിക്കുന്നു. ഹിജാബ് നിരോധനം ഉണ്ടായിരുന്നിട്ടും പുതിയ അധ്യയന വർഷത്തിൽ കോളേജിൽ മുസ്‍ലിം പെൺകുട്ടികളുടെ പ്രവേശനത്തിൽ വർധനവുണ്ടായിട്ടുണ്ടെന്നും അദ്ദേഹം പറഞ്ഞു.

'എല്ലാ വിവാദങ്ങളും വ്യാജമായിരുന്നു. അത് ആളുകളെ ബാധിച്ചിട്ടുണ്ടെങ്കിൽ, ഇന്നും മുസ്‍ലിം കുടുംബങ്ങൾ അവരുടെ പെൺമക്കളെ കോളേജിലേക്ക് അയയ്ക്കുന്നത് എന്തുകൊണ്ട്? അതായത് 90 ശതമാനം മുസ്‍ലിം പെൺകുട്ടികളും ഹിജാബിന് എതിരാണ്, അവരുടെ വ്യവസ്ഥിതിക്ക് എതിരാണ്, സ്വതന്ത്രമായി പറക്കാനും സാധാരണ ജീവിതം നയിക്കാനും ഹിജാബിന്റെ ചങ്ങലയിൽ പെടാതിരിക്കാനും ആഗ്രഹിക്കുന്നു, ''സുവർണ ന്യൂസ് 18 നോട് പറഞ്ഞു.

ബിജെപിയുടെ ഉഡുപ്പി സ്ഥാനാർത്ഥി എന്ന നിലയിൽ, പ്രധാനമന്ത്രി നരേന്ദ്ര മോദിയുടെ ഭരണവും വികസനവുമാണ് തന്റെ പ്രചാരണ മന്ത്രമെന്നും സുവർണ കൂട്ടിച്ചേർത്തു. ലോകമെമ്പാടുമുള്ള ആളുകൾ നരേന്ദ്ര മോദിയെ ഒരു നേതാവായി ഉറ്റുനോക്കുന്നു, അദ്ദേഹത്തെ ഞങ്ങളുടെ നേതാവായി ലഭിച്ചതിൽ ഞങ്ങൾ അഭിമാനിക്കുന്നു. മോദിയെപ്പോലെ എങ്ങനെ പ്രവർത്തിക്കാമെന്ന് ജനങ്ങള്‍ക്ക് കാണിച്ചുകൊടുക്കും.. സുവർണ പറഞ്ഞു. തീരദേശ കർണാടകയിലെ മൊഗവീര സമുദായത്തിൽ നിന്നുള്ള ആളാണ് യശ്പാൽ സുവർണ.

കർണാടക തെരഞ്ഞെടുപ്പിൽ സ്ഥാനാർഥി പ്രഖ്യാപനത്തോടെ വൻ പൊട്ടിത്തെറിയാണ് ബി.ജെ.പയിൽ നടക്കുന്നത്. സിറ്റിങ് എം.എൽ.എമാരടക്കം നിരവധി പേർക്ക് സീറ്റ് നിഷേധിച്ചിട്ടുണ്ട്. ഇതിൽ അതൃപ്തി രംഗത്തെത്തി നേതാക്കൾ പരസ്യമായി രംഗത്തെത്തിയിരുന്നു.

Also Read:ഹിജാബ് വിലക്കിന് തുടക്കമിട്ട ബി.ജെ.പി എം.എൽ.എക്ക് സീറ്റില്ല; മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞ് രഘുപതി ഭട്ട്

പാർട്ടിയിൽ നിന്ന് പുറത്താക്കിയ വിവരം മാധ്യമങ്ങളിലൂടെയാണ് അറിഞ്ഞതെന്നും അതെന്ന ഞെട്ടിച്ചെന്നും ഉഡുപ്പി എം.എൽ.എ രഘുപതി ഭട്ട് പറഞ്ഞു. ഇക്കാര്യം എന്നോട് നേരിട്ട് അറിയിച്ചിരുന്നെങ്കിൽ ഞാൻ ഞാൻ സ്വയം രാജിവെക്കുമായിരുന്നെന്നും അദ്ദേഹം പറഞ്ഞു. ടിക്കറ്റ് കിട്ടാത്തതിൽ എനിക്ക് വിഷമമില്ല. എന്നാൽ പാർട്ടി തന്നോട് പെരുമാറിയ രീതി വല്ലാതെ വേദനിപ്പിക്കുന്നു. എന്നോട് ഒന്നും പറയാതെയാണ് പുറത്താക്കിയിരിക്കുന്നതെന്നും രഘുപതി ഭട്ട് വികാരാധീനനായി മാധ്യമപ്രവർത്തകരോട് പറഞ്ഞു.