ടിടിഇ ഇല്ല, പരിശോധനയില്ല; ഈ ട്രെയിനിൽ കയറാൻ ടിക്കറ്റും വേണ്ട

ന്യുഡൽഹി: രാജ്യത്തിന്റെ 'ജീവനാഡി' എന്നാണ് നമ്മൾ ഇന്ത്യൻ റെയിൽവേയെ വിശേഷിപ്പിക്കാറുള്ളത്. രാജ്യത്തിന്റെ ​ഗ്രാമങ്ങളേയും പട്ടണങ്ങളേയും ബന്ധിപ്പിക്കുന്ന റെയിൽ സർവീസ് നമ്മുടെ ജീവിതത്തിന്റെ ഭാ​ഗമാണ്. ലോക്കൽ ട്രെയിനുകൾ മുതൽ വന്ദേഭാരത് വരെ ഇന്ത്യൻ റെയിൽവേയുടെ ഭാ​ഗമായിട്ടുണ്ട്. എന്നാൽ, ഇനി പറയാൻ പോവുന്ന ട്രെയിൻ സർവീസ് ഇന്ത്യൻ റെയിൽവേയുടെ നിയന്ത്രണത്തിലുള്ളതല്ല. തീർന്നില്ല, ഈ ട്രെയിനിൽ കയറാൻ ടിക്കറ്റും എടുക്കണ്ട. എന്തു കൊണ്ടായിരിക്കും ടിക്കറ്റ് വാങ്ങാതെ ഈ ട്രെയിൻ സർവീസ് നടത്തുന്നത്? ആരാണ് ഈ ട്രെയിൻ സർവീസ് നിയന്ത്രിക്കുന്നത് ?

പഞ്ചാബിലെ നംഗൽ റെയിൽവേ സ്റ്റേഷനും ഹിമാചൽ പ്രദേശിലെ ഭക്ര അണക്കെട്ടിനും ഇടയിൽ സർവീസ് നടത്തുന്ന 'ഭക്ര-നംഗൽ' ട്രെയിനാണ് ഈ വ്യത്യസ്ത ട്രെയിൻ. 1948-ലാണ് ഈ ട്രെയിൻ സർവീസ് ആരംഭിക്കുന്നത്. സ്വതന്ത്ര ഇന്ത്യയിലെ ഏറ്റവും വലിയ അടിസ്ഥാന സൗകര്യ വികസന പദ്ധതികളിൽ ഒന്നായ ഭക്ര-നംഗൽ അണക്കെട്ടിന്റെ നിർമ്മാണ പ്രവർത്തനങ്ങൾക്കായാണ് ഈ റെയിൽവേ പാത ഒരുക്കിയത്. അണക്കെട്ട് നിർമ്മാണത്തിന് ആവശ്യമായ യന്ത്രസാമഗ്രികൾ എത്തിക്കാനും തൊഴിലാളികൾക്കും എഞ്ചിനീയർമാർക്കും യാത്ര ചെയ്യാനുമാണ് ഈ ട്രെയിൻ പ്രധാനമായും ഉപയോഗിച്ചിരുന്നത്. 13 കിലോമീറ്റർ ദൈർഘ്യമുള്ള ഈ പാത അന്നത്തെ നിർമ്മാണ പ്രവർത്തനങ്ങളിൽ നിർണ്ണായക പങ്കുവഹിച്ചു.

ഭക്ര ബിയാസ് മാനേജ്‌മെന്റ് ബോർഡ് (ബിബിഎംബി) ആണ് ഈ ട്രെയിൻ നിയന്ത്രിക്കുന്നതും ഇതിന് വേണ്ടി പണം ചിലവഴിക്കുന്നതും. ദിവസവും രാവിലെ 7:05-ന് നംഗലിൽ നിന്ന് പുറപ്പെടുന്ന ട്രെയിൻ 8:20-ന് ഭക്രയിലെത്തും. മടക്കയാത്ര വൈകുന്നേരം 3:05-ന് നംഗലിൽ നിന്ന് ആരംഭിച്ച് 4:20-ന് ഭക്രയിൽ അവസാനിക്കും. ഡീസൽ എൻജിനുകളും തടിയിൽ നിർമ്മിച്ച പുരാതന കോച്ചുകളുമാണ് ഇപ്പോഴും ഈ ട്രെയിനിൽ ഉപയോഗിക്കുന്നത്.

അണക്കെട്ടിന്റെ നിർമ്മാണം പൂർത്തിയായെങ്കിലും പ്രദേശവാസികളുടെ ജീവിതത്തിന്റെ ഭാഗമായി മാറിയ ഈ സർവീസ് നിർത്തലാക്കാൻ ബിബിഎംബി തയ്യാറായില്ല. ടൂറിസം പ്രോത്സാഹിപ്പിക്കുക, പ്രദേശത്തെ വിദ്യാർത്ഥികൾക്കും തൊഴിലാളികൾക്കും ഗതാഗത സൗകര്യം ഒരുക്കുക എന്ന ലക്ഷ്യത്തോടെയാണ് ഈ സേവനം ഇന്നും തുടരുന്നത്. സാമ്പത്തിക ലാഭത്തേക്കാൾ ഉപരിയായി രാജ്യത്തിന്റെ ചരിത്ര പൈതൃകം കാത്തുസൂക്ഷിക്കുക എന്നതാണ് മാനേജ്‌മെന്റിന്റെ നിലപാട്. സത്‌ലജ് നദിയുടെ തീരത്തുകൂടിയുള്ള ഈ 13 കിലോമീറ്റർ യാത്ര വെറുമൊരു യാത്രയല്ല, മറിച്ച് ഇന്ത്യയുടെ നിർമ്മാണ ചരിത്രത്തിലേക്കുള്ള ഒരു മടക്കിപ്പോക്ക് കൂടിയാണ്.