ഇസ്രയേല്‍ പ്രധാനമന്ത്രി ഈ മാസം 14 മുതല്‍ ഇന്ത്യയില്‍

ഫലസ്​തീന് രാഷ്​ട്ര പിന്തുണ തേടി അറബ്​ ലോകം; ഇന്ത്യ നിലപാട്​ മാറ്റില്ലെന്ന്​ പ്രതീക്ഷ

ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവി​ന്‍റെ ഡല്‍ഹി സന്ദർശനം ഫലസ്​തീൻ വിഷയത്തിൽ ഇന്ത്യയുടെ നിലപാട്​ മാറ്റാൻ ​പ്രേരണയാകില്ലെന്ന പ്രതീക്ഷയില്‍ അറബ്​ ലോകം. ജറൂസലം പ്രഖ്യാപനത്തിന്​ പിന്തുണ ഉറപ്പാക്കാൻ അമേരിക്കയും ഇസ്രായേലും ഇന്ത്യക്കു മേല്‍ കടുത്ത സമ്മര്‍ദ്ദമാണ്​ തുടരുന്നത്​.

കിഴക്കൻ ജറൂസലം തലസ്ഥാനമായി സ്വതന്ത്ര ഫലസ്​തീൻ രാഷ്ട്രം എന്ന ആവശ്യം മുന്നോട്ടു കൊണ്ടു പോകാനാണ്​ കഴിഞ്ഞ ദിവസം അമ്മാനിൽ ചേർന്ന അറബ്​ ലീഗ്​ ​നേതൃയോഗ തീരു​മാനം. ഇതിനു വേണ്ടി പരമാവധി രാജ്യങ്ങളുടെ പിന്തുണ ഉറപ്പാക്കാൻ നയതന്ത്ര നീക്കവും ആരംഭിച്ചു. സൗദി അറേബ്യ ഉൾപ്പെടെയുള്ള അറബ്​ ലീഗ്​ പ്രതിനിധികളാണ്​ ഇന്ത്യയുടെയും മറ്റും നയതന്ത്ര, രാഷ്​ട്രീയ പിന്തുണ തേടുന്നത്​.

എന്നാൽ തെറ്റിദ്ധാരണ മൂലമാണ്​ ഇന്ത്യ ഉൾപ്പെടെ 128 രാജ്യങ്ങളിൽ ഭൂരിഭാഗവും യു.എന്നിൽ എതിർവോട്ട്​ ചെയ്​തതെന്നാണ്​ ഇസ്രായേൽ വാദം. വൈകാതെ യാഥാർഥ്യം ബോധ്യപ്പെടു​മ്പോൾ തലസ്​ഥാന മാറ്റത്തെ അറബേതര രാജ്യങ്ങൾ ശരിവെക്കുമെന്നും ഇസ്രായേൽ നേതൃത്വം പറയുന്നു.

ഈ മാസം 14നാണ്​ അഞ്ചു ദിവസത്തെ സന്ദർശനത്തിനായി ബെഞ്ചമിൻ നെതന്യാഹു ഇന്ത്യയിൽ എത്തുന്നത്​. ഡൽഹിക്കു പുറമെ അഹ്​മദാബാദ്​, മുംബൈ എന്നിവിടങ്ങളും നെതന്യാഹു സന്ദർശിക്കും. ഏതുവിധേനയും ഇന്ത്യയെ തങ്ങളുടെ ചേരിയിലേക്ക്​ കൊണ്ടുവരികയാണ്​ ലക്ഷ്യം.

പതിറ്റാണ്ടുകളായി തുടരുന്ന ഫലസ്​തീൻ പിന്തുണയിൽ മാറ്റമില്ലെന്ന്​ പറയുമ്പോൾ ​തന്നെ സ്വതന്ത്ര ഫലസ്​തീൻ രാഷ്​ട്രത്തെ ഇന്ത്യ, യുഎന്നിൽ പിന്തുണക്കുമോ എന്നു തന്നെയാണ്​ അറബ്​ രാജ്യങ്ങൾ ഉറ്റുനോക്കുന്നത്​. ഇന്ത്യ ഉറച്ചു നിന്നാൽ കൂടുതൽ രാജ്യങ്ങളെ തങ്ങളുടെ ചേരിയിൽ കൊണ്ടു വരാനും അറബ്​ ലീഗിന്​ എളുപ്പമാകും. മറിച്ചാണെങ്കിൽ വലിയ തിരിച്ചടിയായി അതു മാറും. ഏതായാലും നെതന്യാഹുവിന്‍റെ സന്ദർ​ശന വേളയിൽ ഇന്ത്യ നടത്തുന്ന പ്രസ്​താവന എന്തായിരിക്കും എന്നാണ്​ എല്ലാവരും ഉറ്റുനോക്കുന്നത്​.