ഫൈസര് വാക്സിന് ബ്രിട്ടനില് അടുത്തയാഴ്ച മുതല് ഉപയോഗിച്ച് തുടങ്ങും
മുൻഗണനാ പട്ടികയിലുള്ളവരിൽ ആർക്ക് ആദ്യം വാക്സീൻ നൽകണമെന്നത് സംബന്ധിച്ച് വാക്സിൻ കമ്മിറ്റി തീരുമാനമെടുക്കും
അമേരിക്കന് മരുന്നു കമ്പനിയായ ഫൈസറിന്റെ കോവിഡ് വാക്സിന് അംഗീകാരം നല്കുന്ന ആദ്യ രാജ്യമായി യു.കെ. അടുത്തയാഴ്ച മുതല് വാക്സിന് ഉപയോഗിച്ചു തുടങ്ങും. മുന്ഗണനാക്രമത്തിലായിരിക്കും വാക്സീന് നല്കുക.
ബ്രിട്ടനിൽ കോവിഡ് വാക്സിന് വിതരണത്തിനായി ഒരുങ്ങാന് ആശുപത്രികൾക്കു നിർദേശം നല്കിയിരുന്നു. പത്തുദിവസത്തിനുള്ളിൽ ഫൈസർ/ബയോടെക് വാക്സീൻ ബ്രിട്ടനിൽ വിതരണത്തിനു എത്തിക്കുമെന്നു ബ്രിട്ടിഷ് മാധ്യമങ്ങള് റിപ്പോർട്ട് ചെയ്തിരുന്നു. മുൻഗണനാ പട്ടികയിലുള്ളവരിൽ ആർക്ക് ആദ്യം വാക്സീൻ നൽകണമെന്നത് സംബന്ധിച്ച് വാക്സിൻ കമ്മിറ്റി തീരുമാനമെടുക്കും.
അവസാനഘട്ട പരീക്ഷണങ്ങള് പൂര്ത്തിയായപ്പോള് കോവിഡ് വാക്സിന് 95 ശതമാനം ഫലപ്രദമാണെന്ന് ഫൈസര് അറിയിച്ചിരുന്നു. വര്ണ, വംശീയ വ്യത്യാസങ്ങളില്ലാതെയാണ് ഫലമെന്നും 65 വയസ്സിനുമുകളില് പ്രായമുള്ളവരില് 90 ശതമാനത്തില് കൂടുതല് ഫലപ്രാപ്തിയുണ്ടെന്നും കമ്പനി അവകാശപ്പെട്ടിട്ടുണ്ട്.
വാക്സീന്റെ അടിയന്തര ഉപയോഗത്തിനുള്ള ബ്രിട്ടന്റെ തീരുമാനം ചരിത്രനിമിഷമെന്ന് ഫൈസർ പ്രതികരിച്ചു. ജർമൻ പങ്കാളിയായ ബയോടെക്കുമായി ചേർന്ന് നടത്തിയ ക്ലിനിക്കൽ ട്രയലിൽ വാക്സീന് ഗൗരവമേറിയ പാർശ്വഫലങ്ങൾ ഉള്ളതായി കണ്ടെത്തിയില്ലെന്നും അവർ വ്യക്തമാക്കി.
Adjust Story Font
16