ചോക്​സിയെ കിട്ടാതെ സി.ബി.ഐ സംഘം ഡൊമിനിക്കയിൽനിന്ന്​ മടങ്ങി

മെഹുൽ ചോക്​സി കരീബിയൻ രാജ്യമായ ഡൊമിനികയിൽ പിടിയിലായതിന് പിന്നാലെ തിരികെ നാട്ടിലെത്തിക്കാൻ പുറപ്പെട്ട സംഘം വെറുംകൈയോടെ മടങ്ങി. 14,000 കോടിയുടെ വൻവായ്​പ തട്ടിപ്പ്​ നടത്തി നാടുവിട്ട ഇന്ത്യൻ രത്​നവ്യാപാരി ചോക്​സിയെ തിരികെയെത്തിക്കാൻ എട്ടംഗ സി.ബി.ഐ സംഘം മേയ്​ 28നാണ്​ ഡൊമിനികയിലേക്ക് പുറപ്പെട്ടത്. ഡൊമിനിക്കയിലെ ആശുപത്രിയിലാണ്​ ചോക്​സി ഇപ്പോഴും കഴിയുന്നത്​.

ഡൊമിനിക്കയിലെ രണ്ടു കോടതികളിൽ നാടുകടത്തലുമായി ബന്ധപ്പെട്ട കേസ്​ പുരോഗമിക്കുന്നുണ്ട്​. ഇവയിൽ വിധി വരുന്നതുവരെ ചോക്​സിയെ വിട്ടുകിട്ടില്ല എന്നതിനാലാണ് സംഘം മടങ്ങിയത്. ആശുപത്രിയിലാണെങ്കിലും നടപടികൾ പൂർത്തിയാകുംവരെ ചോക്​സി പൊലീസ്​ കസ്റ്റഡിയിൽ തുടരും. നിയമവിരുദ്ധമായി രാജ്യത്തെത്തിയ കേസിൽ കഴിഞ്ഞ ദിവസം കോടതി ജാമ്യം നിഷേധിച്ചിരുന്നു.

ആന്‍റിഗ്വയിൽ പൗരത്വം നേടി 2018ൽ ഇന്ത്യ വിട്ട ചോക്​സി കഴിഞ്ഞ മാസാവസാനം വരെ അവിടെയാണ്​ കഴിഞ്ഞിരുന്നത്​. മേയ്​ 23ന്​ ബോട്ടിലേറി ഡൊമിനിക്കയിലേക്ക്​ നാടുമാറിയതാണ്​ കേസിൽ വഴിത്തിരിവായത്​. കാമുകിക്കൊപ്പം സുഖവാസത്തിനായിരുന്നു യാത്രയെന്നും​ റിപ്പോർട്ടുകളുണ്ടായിരുന്നു. ചോക്​സിയെ തിരികെയെത്തിക്കാൻ നടപടികൾ വേഗത്തിലാക്കുമെന്ന്​ വിദേശകാര്യ മന്ത്രാലയ വക്​താവ്​ അരിന്ദം ബഗ്ചി പറഞ്ഞു.