കേരള രാഷ്ട്രീയത്തെ വർഗീയവത്കരിക്കാൻ സി.പി.എം ശ്രമം : എം.എം ഹസൻ

കേരള രാഷ്ട്രീയത്തെ വർഗീയവത്കരിക്കാൻ ബി.ജെപിയേക്കാൾ സി.പി.എം ശ്രമിക്കുന്നുവെന്ന് യു.ഡി.എഫ് കൺവീനർ എം.എം ഹസൻ. ന്യൂനപക്ഷങ്ങളെ യു.ഡി.എഫിൽ നിന്ന് അടർത്താൻ സി.പി.എം ശ്രമിക്കുകയാണ്. ഭൂരിപക്ഷ വർഗീയതയുടെ പിന്തുണ കിട്ടാനാണ് സി.പി.എം ശ്രമമെന്നും ഹസൻ ആരോപിച്ചു. കുഞ്ഞാലിക്കുട്ടി -ഹസൻ - അമീർ പ്രസ്താവന മുമ്പ് നടത്തിയതും ഇതിൻ്റെ ഭാഗമാണെന്ന് അദ്ദേഹം പറഞ്ഞു.

"കോടിയേരി ഇപ്പോൾ നടത്തുന്നതും വിഷലിപ്തമായ പ്രചാരണമാണ്. വർഗസമരം ഉപേക്ഷിച്ച് വർഗീയതാ പ്രചരണം സി.പി.എം ഏറ്റെടുത്തിരിക്കുന്നു. ന്യൂനപക്ഷ വിഭാഗത്തിൽ നിന്നും ആരെയെങ്കിലും പാർട്ടി സെക്രട്ടറിയായോ മുഖ്യമന്ത്രിയായോ സി.പി.എം പരിഗണിച്ചിട്ടുണ്ടോ.?"- ഹസൻ ചോദിച്ചു. കോൺഗ്രസിനോട് ചോദ്യം ചോദിക്കാൻ കോടിയേരിക്ക് അർഹതയില്ലെന്നും അദ്ദേഹം പറഞ്ഞു.

Summary : CPM seeks to communalise Kerala politics: MM Hasan