അഡ്വ. ടി.ബി മിനിക്കെതിരായ വിചാരണ കോടതി ജഡ്ജിയുടെ പരാമർശത്തിൽ പ്രതിഷേധവുമായി സാംസ്‌കാരിക പ്രവർത്തകർ

കൊച്ചി: നടി ആക്രമിച്ച കേസിൽ നടിയുടെ അഭിഭാഷകയായ അഡ്വ. ടി ബി മിനിക്കെതിരായ വിചാരണ കോടതി ജഡ്ജിയുടെ പരാമർശത്തിൽ പ്രതിഷേധവുമായി സാംസ്‌കാരിക പ്രവർത്തകർ. 'വിചാരണ കോടതിയുടെ പ്രസ്താവന നീതി ന്യായ വ്യവസ്ഥിതിക്ക് കളങ്കം, ജഡ്ജി ഹണി എം.വർഗീസ് നടത്തിയത് അവാസ്തവമായ ആരോപണം, ഹൈക്കോടതി വിഷയത്തിൽ അടിയന്തരമായി ഇടപെട്ട് നടപടി സ്വീകരിക്കണമെന്നും സാംസ്‌കാരിക പ്രവർത്തകരുടെ കുറിപ്പ്.

കഴിഞ്ഞ ആഴ്ച കോടതി അലക്ഷ്യ ഹരജികൾ പരിഗണിക്കുന്നതിനിടെയാണ് ജഡ്ജി ഹണി എം. വർഗീസ് അഡ്വ ടി.ബി മിനിക്കെതിരെ പരാമർശം നടത്തിയത്. വിചാരണ വേളയിൽ 10 ദിവസം മാത്രമാണ് ടി.ബി മിനി കോടതിയിൽ എത്തിയത്. എത്തിയ സമയത്ത് കോടതിയിൽ ഇരുന്ന് ഉറങ്ങുകയായിരുന്നു എന്നാണ് ഹണി എം. വർഗീസ് പറഞ്ഞത്. ഇതിനെതിരെയാണ് സാംസ്‌ക്കാരിക പ്രവർത്തകർ പ്രസ്താവന ഇറക്കിയിരിക്കുന്നത്. കവി സച്ചിദാനന്ദൻ, സുനിൽ പി.ഇളയിടം, ദീദി ദാമോദരൻ, എൻ.എസ് മാധവൻ, കെ. അജിത, സാറാ ജോസഫ് തുടങ്ങിയവരും പ്രതിഷേധ കുറിപ്പിൽ ഒപ്പുവെച്ചിട്ടുണ്ട്.