'വികസന തുടർച്ചയ്ക്ക് വേണ്ടി ചടയമംഗലത്തെ ജനങ്ങൾ വോട്ട് ചെയ്യും': ജെ. ചിഞ്ചുറാണി

കൊല്ലം: വികസന തുടർച്ചയ്ക്ക് വേണ്ടി ചടയമംഗലം മണ്ഡലത്തിലെ ജനങ്ങൾ വോട്ട് ചെയ്യുമെന്ന് എൽഡിഎഫ് സ്ഥാനാർഥി ജെ. ചിഞ്ചുറാണി. ചടയമംഗലത്തെ സമഗ്ര മേഖലകളിലും വികസനം കൊണ്ട് വരാൻ കഴിഞ്ഞു. എൽഡിഎഫിന്റെ ഒറ്റക്കെട്ടായ പ്രവർത്തനം മണ്ഡലത്തിൽ ഭൂരിപക്ഷം വർധിപ്പിക്കുമെന്നും തുടർ ഭരണം ലഭിക്കുമെന്നും ചിഞ്ചുറാണി മീഡിയ വണിനോട് പറഞ്ഞു.

ഈ തെരഞ്ഞെടുപ്പിൽ തനിക്ക് ടെൻഷനൊന്നുമില്ല. ചടയമംഗലമെന്നത് ചുവന്ന മണ്ണാണ്. ഒരിക്കൽ മാത്രമാണ് നഷ്ടപ്പെട്ട് പോയത്. വലിയ വികസനമാണ് ഇവിടെ നടത്തിയതെന്നും കഴിഞ്ഞ പത്തുവർഷത്തിൽ വലിയ മാറ്റമാണ് ഉണ്ടായതെന്നും ചിഞ്ചുറാണി പ്രതികരിച്ചു.