'മരക്കാർ' ടെലഗ്രാമിൽ പ്രചരിപ്പിച്ചു; കാഞ്ഞിരപ്പള്ളി സ്വദേശി പിടിയിൽ

കോട്ടയം: മോഹൻലാൽ നായകനായ പ്രിയദർശൻ ചിത്രം 'മരക്കാർ അറബിക്കടലിന്റെ സിംഹം' സോഷ്യൽ മീഡിയാ ആപ്ലിക്കേഷനായ ടെലിഗ്രാമിലൂടെ പ്രചരിപ്പിച്ച യുവാവ് പൊലീസ് പിടിയിൽ. കാഞ്ഞിരപ്പള്ളി സ്വദേശി നസീഫിനെയാണ് കോട്ടയം എസ്.പി ഡി. ശിൽപ നേതൃത്വത്തിലുള്ള പൊലീസ് സംഘം പിടി കൂടിയത്. മനോരമയാണ് വാർത്ത റിപ്പോർട്ട് ചെയ്തത്.

സിനിമയുടെ വ്യാജ പ്രിന്റ് സിനിമ കമ്പനി എന്ന ടെലിഗ്രാം ഗ്രൂപ്പിലൂടെയാണ് ഇയാൾ പ്രചരിപ്പിച്ചത്. സിനിമ പല ഗ്രൂപ്പുകളിലേക്ക് അയച്ചു കൊടുത്ത ഇയാളെ സൈബർ പോലീസ് നിരീക്ഷിച്ചു വരികയായിരുന്നു. ഞായറാഴ്ച രാവിലെ എരുമേലി പൊലീസ് സ്റ്റേഷൻ പരിധിയിലുള്ള വീട്ടിൽ നിന്നാണ് ഇയാളെ പൊലീസ് പിടികൂടുന്നത്.

ഡിസംബർ രണ്ടിനാണ് ചിത്രം തിയേറ്ററിലെത്തിയത്. കുഞ്ഞാലിമരക്കർ നാലാമനായ മമ്മാലി മരക്കാറുടെ കഥയാണ് ചിത്രം പറയുന്നത്. ഐവി ശശിയുടെ മകൻ അനു വി ശശിയുടേതാണ് തിരക്കഥ.