കസ്റ്റഡിയിലെടുത്ത യുവാക്കൾ എസ്.ഐയെ ആക്രമിച്ചു; പൊലീസ് സ്റ്റേഷന്റെ ചില്ല് അടിച്ചുതകർത്തു

തൃശൂർ: കൊടുങ്ങല്ലൂർ പൊലീസ് സ്റ്റേഷനിൽ യുവാക്കളുടെ പരാക്രമം. സ്‌റ്റേഷനിലുണ്ടായിരുന്ന എസ്.ഐ കെ.അജിത്തിനെയും അക്രമിച്ചു. ജനൽ ചില്ല് അടിച്ചു തകർക്കുകയും ചെയ്തു. കസേരകൊണ്ടാണ് ജനൽചില്ല് അടിച്ചുതകർത്തത്. ഇതുതടാനെത്തിയപ്പോഴാണ് എസ്.ഐക്ക് പരിക്കേറ്റത്.

കൈക്ക് പരിക്കേറ്റ എസ്.ഐ കൊടുങ്ങല്ലൂരിലെ ആശുപത്രിയിൽ ചികിത്സയിലാണ്. തുടർന്ന് ബാക്കി പൊലീസുകാർ യുവാക്കളെ പിടിച്ചുമാറ്റുകയായിരുന്നു. ബാറിൽ സംഘർഷമുണ്ടാക്കിയതിനെ തുടർന്ന് കസ്റ്റഡിയിലെടുത്ത പ്രതികളാണ് ആക്രമിച്ചത്. ഇന്നലെ രാത്രിയോട് കൂടിയാണ് ആക്രമണം ഉണ്ടായത്.

എടവിലങ്ങ് പൊടിയൻ ബസാർ സ്വദേശികളായ കുന്നത്ത് രഞ്ജിത്ത്, വാലത്ത് വികാസ് എന്നിവരാണ് പൊലീസ് സ്‌റ്റേഷനിലും അതിക്രമം നടത്തിയത്. ഇവർക്കെതിരെ കൂടുതൽ വകുപ്പുകൾ ചുമത്തി.