റിയാദിൽ അടക്കം ഹൂതി ആക്രമണം; അപലപിച്ചു സഖ്യ സേന

റിയാദ്​: സൗദി അറേബ്യയുടെ തലസ്ഥാനമായ റിയാദിൽ അടക്കം യമനിലെ ഹൂതി വിമതർ നടത്തിയ ആക്രമണത്തെ അപലപിച്ച്​ സൗദി സഖ്യസേന. റിയാദിൽ അടക്കം സിവിലിയൻ കേന്ദ്രങ്ങളെയാണ്​ ഹൂതി വിമതർ ലക്ഷ്യം വെച്ചതെന്ന്​ സഖ്യ സേന വ്യക്​തമാക്കി. ഹൂതികളുടെ ആക്രമണങ്ങളൊന്നും ലക്ഷ്യം കണ്ടില്ല. എല്ലാ ആക്രമണങ്ങളെയും പരാജയപ്പെടുത്തിയതായും സഖ്യസേന അറിയിച്ചിട്ടുണ്ട്​. ശനിയാഴ്ച റിയാദ് എയർപോർട്ടിനു സമീപം അടക്കം ആക്രമണ ശ്രമം നടത്തിയിരുന്നു.

റിയാദിലെയും യാമ്പുവിലെയും സുപ്രധാന കേന്ദ്രങ്ങൾ ലക്ഷ്യം വെച്ചതായി ഹൂതി വിമതരുടെ അവകാശവാദം. ബാലിസ്റ്റിക്​ മിസൈലുകളും ഡ്രോണുകളും അടക്കം ഉപയോഗിച്ചാണ്​ ആക്രമണം നടത്തിയതെന്നും ഹൂതി വിമതരെ ഉദ്ധരിച്ച്​ അന്താരാഷ്ട്ര മാധ്യമങ്ങൾ റിപ്പോർട്ട്​ ചെയ്യുന്നുണ്ട്​.അതിനിടെ, യമനിലും സൗദി അറേബ്യയിലും സംഘർഷം വ്യാപകമാകുന്നതിനിടെ അമേരിക്ക തങ്ങളുടെ പൗരൻമാർക്ക്​ ജാഗ്രത മുന്നറിയിപ്പ്​ നൽകിയിട്ടുണ്ട്​. ഒമ്പത്​ അറബ്​ -ഗൾഫ്​ രാജ്യങ്ങളിലുള്ള അമേരിക്കൻ പൗരൻമാർക്കാണ്​ ജാഗ്രത പാലിക്കണമെന്ന നിർദേശം നൽകിയത്​.

സൗദി അറേബ്യക്കെതി​രെ ഹൂതി വിമതരുടെ ആക്രമണം നിരന്തരം തുടരുന്ന പക്ഷം ആവശ്യമായ സഹായം നൽകുമെന്ന സൂചന തുർക്കി നൽകിയിട്ടുണ്ട്​. സൗദിയെ യുദ്ധത്തിലേക്ക് വലിച്ചിഴക്കരുതെന്നും ആക്രമണങ്ങളെ പ്രതിരോധിക്കാൻ ആവശ്യമായ സൈനിക സഹായം നൽകാൻ തയാറാണെന്നും തുർക്കി വിദേശ കാര്യ മന്ത്രി ഹകാൻ ഫിദൻ പറഞ്ഞു. സൗദിയും തുർക്കിയും പാകിസ്താനും ഒപ്പുവെച്ച മക്ക കരാർ അനുസരിച്ചു സൗദിക്ക് സഹായം നൽകുമെന്ന്​ സൂചിപ്പിച്ചാണ്​ തുർക്കി വിദേശകാര്യ മന്ത്രി രംഗത്തെത്തിയത്​. ഇന്‍റലിജൻസ്​, സാ​ങ്കേതിക സഹായം തുടങ്ങിയവ നൽകുമെന്നാണ്​ സൂചിപ്പിച്ചത്​. ശനിയാഴ്ച ഉച്ചയോടെ റിയാദിലേക്ക്​ ഹൂതി വിമതരുടെ ആക്രമണ ശ്രമത്തെ തുടർന്ന്​ വിമാനത്താവളത്തിന്​ സമീപം തീപിടിത്തമുണ്ടായി. ഇന്ധന ടാങ്കിനാണ്​ തീപിടിച്ചത്​. ഇതോടെ വിമാന സർവീസുകൾ വൈകി. രണ്ട്​ മണിക്കൂറോളമാണ്​ വിമാന സർവിസുകൾ വൈകിയത്​.കരിപ്പൂരിൽ നിന്ന്​ റിയാദിലേക്കുള്ള സൗദി എയർലൈൻസ്​ വിമാനം ബുറൈദയിൽ ഇറക്കിയിരുന്നു. ശനിയാഴ്ച​ പുലർച്ചെയും ഹൂതികൾ റിയാദിലേക്ക്​ ആക്രമണ ശ്രമം നടത്തിയിരുന്നു. പുലർച്ചെ മുതൽ റിയാദിലും ഖർജിലും ആണ് മുന്നറിയിപ്പ് ലഭിച്ചത്. ചില ഭാഗങ്ങളിൽ സ്ഫോടന ശബ്ദമെന്ന് അന്താരാഷ്ട്ര മാധ്യമങ്ങൾ റിപ്പോർട്ട്​ ചെയ്​തിരുന്നു.