Quantcast

മുൻ അഫ്​ഗാൻ പാർലമെൻറംഗം ഫൌസിയ കൂഫി ഖത്തറില്‍ അഭയം തേടി

ഖത്തര്‍ അമീരി ഫോഴ്സ് വിമാനത്തിലാണ് ഫൌസിയയെ രക്ഷപ്പെടുത്തിയത്

MediaOne Logo
മുൻ അഫ്​ഗാൻ പാർലമെൻറംഗം ഫൌസിയ കൂഫി ഖത്തറില്‍ അഭയം തേടി
X

മുൻ അഫ്​ഗാൻ പാർലമെൻറംഗവും മനുഷ്യാവകാശ പ്രവർത്തകയും കടുത്ത താലിബാൻ വിമർശകയുമായ ഫൗസിയ കൂഫി ഖത്തറിൽ. അമേരിക്കൻ സൈന്യം കാബൂൾ വിടുന്നതിന്​ ​ മുമ്പായി തിങ്കളാഴ്​ച രാത്രിയോടെയാണ്​ ഇവർ ഖത്തർ അമിരി എയർഫോഴ്​സ്​ വിമാനത്തിൽ അഫ്​ഗാൻ വിട്ട്​ ഖത്തറിൽ അഭയം തേടിയത്​. അഫ്​ഗാൻ സുരക്ഷിതമല്ലെന്നും, എന്നാൽ ഒരുനാൾ ജന്മനാട്ടിലേക്ക്​ തിരികെ മടങ്ങാമെന്ന പ്രതീക്ഷയിലാണ്​ രാജ്യം വിടുന്നതെന്നും ദോഹയിലെത്തിയ ശേഷം അവർ പറഞ്ഞു. ഏറ്റവും മികച്ച ഏകോപനത്തോടെ അഫ്​ഗാനിൽ നിന്നുള്ള ഒഴിപ്പിക്കൽ പ്രവർത്തനങ്ങൾക്ക്​ മേൽനോട്ടം വഹിച്ച ഖത്തറിനെ അഭിനന്ദിച്ച ഫൗസിയ കൂഫി, വനിതകൾ പ്രധാനപദവികൾ അലങ്കരിക്കുന്ന രാജ്യം ഏറെ സുരക്ഷിതമാണെന്നും ട്വീറ്റ്​​ ചെയ്​തു. അഫ്​ഗാനിൽ നിന്നുള്ള ഒഴിപ്പിക്കൽ പ്രവർത്തനങ്ങൾക്ക്​ മേൽനോട്ടം വഹിക്കുന്ന ഖത്തർ വിദേശ കാര്യ സഹമന്ത്രി ലുൽവ റാഷിദ്​ അൽ ഖാതിറിനെ ഇവർ അഭിനന്ദിച്ചു.

അഫ്​ഗാനിലെ വനിതാ അവകാശങ്ങൾക്കും, മനുഷ്യവകാശങ്ങൾക്കും വേണ്ടി ധീരമായി പൊരുതിയ ഫൗസിയ കൂഫി എന്നും താലിബാൻെറ കടുത്ത വിമർശകയായിരുന്നു. നാഷനൽ അസംബ്ലിയിൽ വൈസ്​ പ്രസിഡൻറ്​ പദവി അലങ്കരിച്ച ഇവർ ഈ സ്​ഥാനത്തെത്തിയ ആദ്യ വനിതയുമായി. താലിബാൻ കാബൂൾ പിടിച്ചടക്കിയ ശേഷം വീട്ടുതടങ്കലിലായിരുന്നുവെങ്കിലും രാജ്യത്ത്​ സമാധാനം പുനസ്​ഥാപിക്കാനുള്ള ചർച്ചകളിൽ പങ്കാളിയായി. പത്തു ദിവസം മുമ്പും രാജ്യം വിടാൻ പദ്ധതിയില്ലെന്ന്​ വ്യക്​തമാക്കിയെങ്കിലും അവസാന നിമിഷം ഖത്തറിലെത്തുകയായിരുന്നു.

രണ്ടു പെൺമക്കൾ നേരത്തെ തന്നെ ഖത്തറിലെത്തിയിരുന്നു. ഫൗസിയ കൂഫിയും മക്കളും തമ്മിലെ പുനസമാഗമത്തിന്​​ വഴിയൊരുക്കിയതിൽ സന്തോഷം പ്രകടിപ്പിച്ചുകൊണ്ട്​ വിദേശകാര്യ സഹമന്ത്രി ലൂൽവ റാഷിദ്​ അൽ കാതിർ ട്വീറ്റ്​ ചെയ്​തു.

Next Story