മരിച്ച് 5,300 വർഷങ്ങൾക്ക് ശേഷവും ശരീരത്തിൽ ജീവന്റെ തുടിപ്പോ?; ശാസ്ത്രലോകം കണ്ടത് ആ ഞെട്ടിപ്പിക്കുന്ന രഹസ്യം, റിപ്പോർട്ട് ഇങ്ങനെ

മനുഷ്യ വംശത്തിൻ്റെ ചരിത്രത്തിലേക്ക് തുറന്നിടുന്ന അത്ഭുതപ്പെടുത്തിയ പ്രതിഭാസമാണ് മമ്മികൾ. ലോകത്ത് ഇവയെപറ്റി പല പഠനങ്ങളും നടക്കുന്നു. 5300 വർഷങ്ങൾക്ക് മുൻപ് ഇറ്റാലിയൻ മലനിരകളിൽ വച്ച് കൊല്ലപ്പെട്ടയാളാണ് 'ദി ഐസ്‌മാൻ' എന്നറിയപ്പെടുന്ന ഓറ്റ്‌സി. ശരീരത്തിൽ അമ്പു പതിച്ചാണ് അദ്ദേഹം കൊല്ലപ്പെട്ടത്. യൂറോപ്പിലെ അറിയപ്പെടുന്നതിൽ വെച്ച് ഏറ്റവും പഴക്കമുള്ള സ്വാഭാവിക മനുഷ്യ മമ്മിയാണിത്.

ഓറ്റ്‌സിയുടെ ശരീരവുമായി ബന്ധപ്പെട്ടിരിക്കുന്ന സൂക്ഷ്മാണുക്കളുടെ സമൂഹത്തെക്കുറിച്ച് വിശദമായ വിവരങ്ങൾ ശേഖരിക്കുകയാണ് 'യൂറാക് റിസർച്ച്' ഗവേഷകർ. ചെമ്പ് യുഗത്തിലെ (Copper Age) ഒരു മനുഷ്യന്റെ കുടലിലെ ബാക്ടീരിയകൾ മുതൽ തണുത്ത അന്തരീക്ഷത്തോട് പൊരുത്തപ്പെടുന്ന പൂപ്പലുകൾ വരെയുള്ള സങ്കീർണ്ണമായ ഒരു മൈക്രോബയോമിനെക്കുറിച്ചുള്ള ഉൾക്കാഴ്ചകൾ ഈ പഠനം നൽകുന്നു.

മമ്മിക്കുള്ളിൽ ഇപ്പോഴും സൂക്ഷ്മജീവികളുടെ സാന്നിദ്ധ്യമുണ്ടെന്നാണ് ഇറ്റലിയിലെ യൂറോഗ് റിസർച്ച് ഇൻസ്റ്റിറ്റ്യൂട്ടിലെ മുഹമ്മദ് സർഹാന്റെ കീഴിലുള്ള ശാസ്ത്രജ്ഞരുടെ കണ്ടെത്തൽ. മമ്മിയുടെയുള്ളിൽ ഗട്ട് ബാക്‌ടീരിയകളും തണുപ്പുമായി പൊരുത്തപ്പെടുന്ന ഈസ്റ്റ് ഇനങ്ങളുമാണ് കണ്ടെത്തിയത്. മൈക്രോബയോം ശാസ്ത്രമാസികയിലാണ് ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്. മൈനസ് 6 ഡിഗ്രി സെൽഷ്യസ് തണുപ്പുള്ള അതീവ സുരക്ഷിതമായ ഒരു ഫ്രീസിങ് ചേമ്പറിലാണ് ഓട്സിയുടെ മമ്മി നിലവിൽ സൂക്ഷിച്ചിരിക്കുന്നത്.

സാമ്പിളുകളും പരിശോധനാ രീതികളും ഉപയോഗിച്ച്, ഈ സൂക്ഷ്മാണുക്കളിൽ ഏവയാണ് അദ്ദേഹത്തിന്റെ ജീവിതകാലത്ത് തന്നെ ശരീരത്തിൽ ഉണ്ടായിരുന്നതെന്നും, ഏവയാണ് മരണശേഷവും ഹിമാനിയിൽ കഴിഞ്ഞ കാലയളവിലും മൂന്ന് പതിറ്റാണ്ടിലേറെ നീണ്ട സംരക്ഷണത്തിനിടയിലും ശരീരത്തിൽ പടർന്നുപിടിച്ചതെന്നും വേർതിരിച്ചറിയാൻ ഗവേഷകർക്ക് കഴിഞ്ഞു. ശരീരത്തിന്റെ ആന്തരിക കോശങ്ങളുടെ സാമ്പിളുകളിൽ നിന്ന്, ഓറ്റ്സിയുടെ യഥാർത്ഥ കുടൽ ഫ്ലോറയിൽപ്പെട്ട ബാക്ടീരിയകളുടെ ജനിതക ഘടകങ്ങൾ കണ്ടെത്താൻ ഗവേഷക സംഘത്തിന് സാധിച്ചു.

ഹിമാനിയിലെ അന്തരീക്ഷത്തിൽ നിന്ന് ഉത്ഭവിച്ചതെന്ന് കരുതപ്പെടുന്നതും, തണുത്ത കാലാവസ്ഥയെ അതിജീവിക്കാൻ ശേഷിയുള്ളതുമായ ചില പ്രത്യേക ഇനം ഈസ്റ്റുകളുടെ സാന്നിധ്യമാണ് ഈ പഠനത്തിലെ അത്ഭുതപ്പെടുത്തുന്ന മറ്റൊരു കണ്ടെത്തൽ. ഇവ ഇന്നുവരെ ഓറ്റ്സിയുടെ ശരീരത്തിൽ നിലനിന്നിട്ടുണ്ട്. തണുപ്പിനെ പ്രതിരോധിക്കുന്ന ഇത്തരം ഈസ്റ്റുകൾ വ്യാവസായിക ആവശ്യങ്ങൾക്ക് ഉപയോഗിക്കാൻ സാധിച്ചേക്കുമെന്നും വിലയിരുത്തപ്പെടുന്നു.

മമ്മിയുടെ ഉപരിതലത്തിലെ മഞ്ഞ്, ശരീരത്തിനുള്ളിൽ നിന്നുള്ള ഉരുകിയ വെള്ളം എന്നിവ വിശകലനം ചെയ്യുകയും സ്വാബുകൾ ഉപയോഗിച്ച് നിരവധി സാമ്പിളുകൾ ശേഖരിക്കുകയും ചെയ്തുകൊണ്ടുള്ള വിപുലമായ ഒരു അന്വേഷണമായിരുന്നു ​ഗവേഷകർ നടത്തിയത്. കുടൽ കോശങ്ങളിൽ നിന്നും വയറ്റിലെ ഉള്ളടക്കങ്ങളിൽ നിന്നുമുള്ള വിവരങ്ങൾ മുൻപത്തെ പഠനങ്ങളിൽ നിന്ന് ലഭ്യമായിരുന്നു. 1991-ൽ ഓറ്റ്സിയെ കണ്ടെടുത്ത സമയത്ത് ശേഖരിച്ച് മരവിപ്പിച്ചു സൂക്ഷിച്ചിരുന്ന, അത് കിടന്നിരുന്ന സ്ഥലത്തെ മണ്ണ് സാമ്പിളും പരിസ്ഥിതിയുടെ സ്വാധീനം കണ്ടെത്തുന്നതിനായി വിശകലനം ചെയ്തു.

മമ്മിയുടെ കുടലിലും വയറ്റിൽ നിന്നും യഥാർത്ഥ കുടൽ മൈക്രോബയോമിന്റെ ജനിതക ഘടകങ്ങളും ഗവേഷകർ കണ്ടെത്തിയിട്ടുണ്ട്. 2019ൽ 'യൂറാക് റിസർച്ച്' നടത്തിയ പഠനത്തിൽ ആദ്യമായി വിവരിക്കപ്പെട്ട ഈ മൈക്രോബയോമിന്, ആദ്യകാല മനുഷ്യസമൂഹങ്ങളിൽ ലഭ്യമായിട്ടുള്ള വളരെ കുറച്ചുമാത്രം അറിയപ്പെടുന്ന കുടൽ ഫ്ലോറയുടെ (gut flora) മാതൃകകളുമായി അടുത്ത സാദൃശ്യമുണ്ട്. വ്യവസായവൽക്കരിക്കപ്പെട്ട സമൂഹങ്ങളിൽ ജീവിക്കുന്ന ആധുനിക മനുഷ്യരുടെ കുടലുകളിൽ ഇത്തരം ബാക്ടീരിയകൾ വളരെ അപൂർവ്വമായി മാത്രമേ കാണപ്പെടാറുള്ളൂ. അതിനാൽ, മനുഷ്യന്റെ സൂക്ഷ്മാണു ചരിത്രത്തിലേക്ക് അപൂർവ്വമായ ഒരു ഉൾക്കാഴ്ച നൽകാൻ ഓറ്റ്സിക്ക് സാധിക്കുന്നുണ്ട്.

പുതുതായി കണ്ടെത്തിയ ഈസ്റ്റുകൾ ചർമ്മത്തിന്റെ സാമ്പിളുകളിൽ നിന്നും, മമ്മിയുടെ ഉള്ളിൽ നിന്നുള്ള ഉരുകിയ വെള്ളത്തിൽ നിന്നും, വയറ്റിലെ ഉള്ളടക്കങ്ങളിൽ നിന്നുമാണ് വേർതിരിച്ചെടുത്തത്. ഇത്തരം ഉയർന്ന സവിശേഷതകളുള്ള ഇനങ്ങൾ കടുത്ത തണുപ്പുള്ള അന്തരീക്ഷവുമായി പൊരുത്തപ്പെട്ടവയാണ്. അന്റാർട്ടിക്ക പോലുള്ള അതിശൈത്യ മേഖലകളിൽ നിന്നുള്ള ഈസ്റ്റ് ഇനങ്ങളുമായി ഇവയ്ക്ക് ബന്ധമുണ്ടെന്ന് ജനിതക വിശകലനങ്ങൾ വെളിപ്പെടുത്തുന്നു. ഇത് സൂചിപ്പിക്കുന്നത് ഈ ഈസ്റ്റുകൾ ഹിമാനിയിലെ അന്തരീക്ഷത്തിൽ നിന്ന് ഉത്ഭവിച്ചതാണെന്നും, ആയിരക്കണക്കിന് വർഷങ്ങളായി മമ്മിയുമായി ബന്ധപ്പെട്ട് കിടക്കുന്നവയുമാണെന്നാണ്.

വളരെ ജീർണ്ണിച്ച ഡിഎൻഎയും, ഒപ്പം നന്നായി സംരക്ഷിക്കപ്പെട്ടിട്ടുള്ള (ആധുനിക) ഡിഎൻഎയും ഗവേഷകർക്ക് കണ്ടെത്താൻ കഴിഞ്ഞു. ഈ സൂക്ഷ്മാണുക്കൾ കേവലം ഭൂതകാലത്തിന്റെ തിരുശേഷിപ്പുകൾ മാത്രമല്ലെന്നും, മൈനസ് ആറ് ഡിഗ്രി സെൽഷ്യസ് തണുപ്പും ഉയർന്ന ഈർപ്പവുമുള്ള ഇന്നത്തെ സംരക്ഷണ സാഹചര്യങ്ങളിലും അവ സുഷുപ്താവസ്ഥയിൽ തുടർന്നും നിലനിൽക്കുന്നുണ്ടെന്നുമാണ് ഇത് കാണിക്കുന്നത്.

​ഗവേഷകറുടെ അഭിപ്രായത്തിൽ ഈ മമ്മി ചലനമറ്റ ഒരു ശേഷിപ്പല്ല, മറിച്ച് ചലനാത്മകമായ ഒരു ജൈവ വ്യവസ്ഥയാണ്. മുൻകാലങ്ങളിൽ നടത്തിയ ചില സംരക്ഷണ നടപടികൾ ചില പ്രത്യേക സൂക്ഷ്മാണുക്കൾക്ക് അറിവില്ലാതെ അനുകൂല സാഹചര്യമൊരുക്കിയിരിക്കാമെന്നും ഈ പഠനം വ്യക്തമാക്കുന്നുണ്ട്. ഇതിൽ കണ്ടെത്തിയ നാല് തരം ഈസ്റ്റുകളിൽ മൂന്നെണ്ണത്തിനും ഫിനോൾ വിഘടിപ്പിക്കാനുള്ള ജനിതക ശേഷിയുണ്ട്. ഓറ്റ്സിയെ കണ്ടെടുത്തതിന് ശേഷം അദ്ദേഹത്തിന്റെ ശരീരോപരിതലത്തിലെ പൂപ്പൽ വളർച്ച ഇല്ലാതാക്കാൻ ഉപയോഗിച്ചിരുന്ന പ്രധാന ഘടകമായിരുന്നു ഫിനോൾ. ഈ ഈസ്റ്റുകൾ ഈ ഫിനോളിനെ തങ്ങളുടെ ആഹാര സ്രോതസ്സായി ഉപയോഗിച്ചിട്ടുണ്ടാകാം. മമ്മിയുടെ സംരക്ഷണത്തിനുള്ള പ്രാധാന്യത്തിന് പുറമെ, ഗവേഷണത്തിന്റെ പുതിയ വഴികളും ഈ കണ്ടെത്തൽ തുറന്നുതരുന്നുണ്ട്.