കോഹ്‍ലിയോടും രോഹിതിനോടും കളിക്കരുത്, അവർ നേരാംവണ്ണം വിചാരിച്ചാൽ കുഴപ്പമുണ്ടാക്കുന്നവർ അപ്രതക്ഷ്യരാകും -രവി ശാസ്ത്രി

ന്യൂഡൽഹി: മുതിർന്ന താരങ്ങളായ വിരാട് കോഹ്‍ലി, രോഹിത് ശർമ എന്നിവരും ഇന്ത്യൻ ക്രിക്കറ്റ് ടീം പരിശീലകൻ ഗൗതം ഗംഭീറും തമ്മിൽ വിഭാഗീയതയുണ്ടെന്ന വാർത്തകൾക്കി​ടെ പരോക്ഷ പ്രതികരണവുമായി രവി ശാസ്ത്രി. കോഹ്‍ലിയെയും രോഹിതിനെയും പിന്തുണച്ച ശാസ്ത്രി ഇരുവർക്കെതിരെയും നിൽക്കുന്നവർക്കെതിരെ രൂക്ഷ വിമർശനമാണ് ഉന്നയിച്ചത്.

രവി ശാസ്ത്രിയുടെ പ്രസ്താവനയിങ്ങനെ: "വിരാട് കോഹ്ലിയും രോഹിത് ശർമയും ഏകദിനത്തിലെ അതികായന്മാരാണ്. അങ്ങനെയുള്ള കളിക്കാരോട് നിങ്ങൾ കളിക്കാൻ നിൽക്കരുത്. കുറച്ച് പേർ അങ്ങനെ ചെയ്യുന്നുണ്ട്. കോഹ്‍ലിയും രോഹിതും ശരിയായി ചിന്തിച്ച് ശരിയായ ബട്ടൺ അമർത്തുകയാണെങ്കിൽ ഈ കുഴപ്പമുണ്ടാക്കുന്നവരെല്ലാം വേഗത്തിൽ രംഗത്തുനിന്ന് അപ്രത്യക്ഷരാകും’’ -രവി ശാസ്ത്രി പ്രതികരിച്ചു.

‘‘അനുഭവ സമ്പത്ത് മാർക്കറ്റിൽ നിന്നും വാങ്ങാൻ കിട്ടില്ല. ഒരാൾ ചേസ് മാസ്റ്ററാണ്. മറ്റൊരാൾ ഏകദിനത്തിൽ മൂന്ന് ഡബിൾ സെഞ്ച്വറികൾ നേടിയയാളാണ്’’ -രവി ശാസ്ത്രി കൂട്ടിച്ചേർത്തു. പ്രത്യക്ഷമായി ആരുടെയും പേര് പരാമർശിച്ചില്ലെങ്കിലും രവി ശാസ്ത്രി ഉന്നമിട്ടത് പരിശീലകൻ ഗൗതം ഗംഭീറിനെയും ചീഫ് സെലക്ടർ അജിത് അഗാർക്കറിനെയുമാണെന്നാണ് വിലയിരുത്തൽ.