‘ലോകകപ്പ് വരെയൊന്നും കാത്തുനിൽക്കേണ്ട’; ആസ്ട്രേലിയ സീരീസിന് ശേഷം രോഹിതും കോഹ്‍ലിയും വിരമിക്കുമെന്ന് അഭ്യൂഹം​​

ന്യൂഡൽഹി: ഒക്ടോബറിൽ നടക്കുന്ന ആസ്ട്രേലിയക്കെതിരെയുള്ള ഏകദിന പരമ്പരയോടെ രോഹിതും കോഹ്‍ലിയും വിരമിക്കുമെന്ന് അഭ്യൂഹം. ദേശീയ മാധ്യമങ്ങളാണ് ഇതുസംബന്ധിച്ച അഭ്യൂഹം ഉയർത്തിവിട്ടത്. ടെസ്റ്റിൽ നിന്നും ട്വന്റി 20യിൽ നിന്നും വിരമിക്കൽ പ്രഖ്യാപിച്ച ഇരുവരും നിലവിൽ ഏകദിന ക്രിക്കറ്റിൽ മാത്രമാണ് തുടരുന്നത്. 2027 ഏകദിന ലോകകപ്പിന് ശേഷമേ ഇരുവരും ഏകദിനം മതിയാക്കൂ എന്ന വാർത്തകൾക്കിടെയാണ് പുതിയ അഭ്യൂഹം.

ലോകകപ്പ് ടീമിൽ ഇടംപിടിക്കണമെങ്കിൽ ഇരുവരും ആഭ്യന്തര ടൂർണമെന്റായ വിജയ് ഹസാരെ ട്രോഫിയിൽ കളത്തിലിറങ്ങേണ്ടിവരും. ടെസ്റ്റ് ടീമിൽ ഇടംപിടിക്കണമെങ്കിൽ രഞ്ജി ​ട്രോഫി കളിക്കണമെന്ന ഉപാധിക്ക് തുല്യമാണിത്. ഈ വർഷം ഡിസംബർ മുതലാണ് വിജയ് ഹസാരെ ട്രോഫി അരങ്ങേറുന്നത്. ബോർഡർ-ഗവാസ്കർ ട്രോഫിയിലെ മോശം പ്രകടനത്തിന് ശേഷം കോഹ്ലിയും രോഹിതും രഞ്ജി ട്രോഫിയിൽ കളത്തിലിറങ്ങിയിരുന്നു. ഇതിന് പിന്നാലെയാണ് ഇരുവരും വിരമിക്കൽ പ്രഖ്യാപിച്ചത്. വിജയ് ഹസാരെ ട്രോഫി മാനദണ്ഡമാക്കിയാകും സെലക്ഷൻ നടപടികൾ എന്ന് വ്യക്തമായതോടെയാണ് ഇരുവരുടെയും വിരമിക്കലിനെച്ചൊല്ലി അഭ്യൂഹങ്ങൾ ഉയർന്നത്. കൂടാതെ മികച്ച യുവനിരയുടെ സാന്നിധ്യമുള്ളതും ഈ അഭ്യൂഹത്തിന് ശക്തിപകരുന്നു.

ആസ്ട്രേലിയൻ പര്യടനത്തിലെ ഇന്ത്യയുടെ ഏകദിന മത്സരങ്ങൾ ഒക്ടോബർ 19നാണ് ആരംഭിക്കുക. പെർത്ത്, സിഡ്നി, അഡലെയ്ഡ് എന്നിവിടങ്ങളിലാണ് മത്സരങ്ങൾ. തുടർന്ന് ഡിസംബറിൽ ദക്ഷിണാഫ്രിക്കക്കെതിരെ ഹോം സീരീസും ഇന്ത്യ കളിക്കും. ന്യൂസിലാൻഡ്, അഫ്ഗാനിസ്താൻ, ഇംഗ്ലണ്ട്, വെസ്റ്റിഇൻഡീസ് എന്നിവർക്കെതിരെയാണ് അടുത്ത വർഷം ഇന്ത്യക്ക് ഏകദിന പരമ്പരയുള്ളത്.