ഫോണിൽ റേഞ്ച് കിട്ടാതിരിക്കുക എന്നത് പലപ്പോഴും നമ്മൾ നേരിടുന്ന ഒരു പ്രശ്നമാണ്. നിരവധി ഉപയോക്താക്കൾ അവരുടെ ഫോണിന്‍റെ സിഗ്നൽ പരിഹരിക്കാനുള്ള വഴികൾക്കായി എല്ലാ ദിവസവും ഓൺലൈനിൽ തിരയുന്നു. ഏത് സാങ്കേതിക പ്രശ്‌നവും കൈകാര്യം ചെയ്യാൻ ചില അടിസ്ഥാന മാർഗങ്ങളുണ്ട്, നിങ്ങളുടെ ഫോണിൽ സിഗ്നൽ ഇല്ലാത്തതിന്‍റെ പ്രശ്‌നവും ഇതിൽ നിന്ന് വ്യത്യസ്തമല്ല. ഈ ടിപ്സുകൾ പരീക്ഷിച്ചാൽ സിഗ്നൽ ഇല്ലാത്ത പ്രശ്‌നം ഒരു പരിധി വരെ പരിഹരിക്കാൻ സാധിക്കും.

എയർപ്ലെയിൻ മോഡ് ഓൺ ഓണും ഓഫും ആക്കുക

നിങ്ങളുടെ ഫോണിന് എപ്പോഴെങ്കിലും സിഗ്നൽ നഷ്ടപ്പെട്ടാൽ, ആദ്യം ചെയ്യേണ്ടത് ഫോണിന്റെ എയർപ്ലെയിൻ മോഡ് കുറച്ച് സെക്കൻഡ് ഓണാക്കി പിന്നീട് അത് ഓഫാക്കുക എന്നതാണ്. ഇത് സമീപത്തുള്ള ഏറ്റവും അടുത്ത ടവറുമായി ഫോണിന്റെ നെറ്റ്‌വർക്ക് ബന്ധം വേഗത്തിൽ പുതുക്കാൻ സഹായിക്കും. മിക്ക കേസുകളിലും ഇത് സിഗ്നലുമായി ബന്ധപ്പെട്ട പ്രശ്നങ്ങൾ ഉടനടി പരിഹരിക്കുന്നു.

നെറ്റ്‌വർക്ക് മോഡ് മാറ്റുക

5G സിഗ്നൽ ദുർബലമായ സ്ഥലങ്ങളിൽ ഫോൺ നിരന്തരം ആ സിഗ്നൽ പിടിച്ചെടുക്കാൻ ശ്രമിക്കുന്നത് റേഞ്ച് കുറയാൻ കാരണമാകും. ഫോൺ സെറ്റിങ്സിൽ നെറ്റ്‌വർക്ക് ടൈപ്പ് 4G/LTE ആയി മാറ്റുന്നത് കൂടുതൽ സ്ഥിരതയുള്ള സിഗ്നൽ നൽകും.

വൈഫൈ കോളിങ്

വീടിന് പുറത്തിറങ്ങുമ്പോൾ ഫോണിൽ നല്ല റേഞ്ച് ലഭിക്കുകയും, വീടിനുള്ളിലേക്ക് പ്രവേശിക്കുമ്പോൾ സിഗ്നൽ തീർത്തും ഇല്ലാതാവുകയും ചെയ്യുന്ന അനുഭവം പലർക്കും ഉണ്ടാകാറുണ്ട്. ഈ പ്രശ്നം നേരിടുന്നുണ്ടെങ്കിൽ, ഫോണിലെ 'വൈഫൈ കോളിങ്' (Wi-Fi Calling) ഓപ്ഷൻ ഓൺ ചെയ്യുന്നതിലൂടെ വൈഫൈ കണക്ഷനുള്ള ഏത് സ്ഥലത്തും തടസ്സമില്ലാതെ സംസാരിക്കാം. ഇതിനായി ഫോൺ ഒരു വൈഫൈ നെറ്റ്‌വർക്കുമായി ബന്ധിപ്പിച്ചിരിക്കണം.

Settings > Mobile Service > SIMs എന്ന ക്രമത്തിൽ പോയി നിങ്ങളുടെ ആക്ടീവ് സിം തെരഞ്ഞെടുക്കുക. തുടർന്ന് Wi-Fi Calling ടാപ്പ് ചെയ്ത് ടോഗിൾ ബട്ടൺ ഓൺ ആക്കുക. ആൻഡ്രോയിഡ് ഫോണിൽ Settings > Network and Internet > SIMs എന്ന ക്രമത്തിൽ പോയി നിങ്ങളുടെ ആക്ടീവ് സിം തെരഞ്ഞെടുക്കുക. അതിൽ Calling എന്ന ഭാഗത്തിന് താഴെയുള്ള Wi-Fi Calling ടാപ്പ് ചെയ്ത് ഓൺ ചെയ്യുക.

നെറ്റ്‌വർക്ക് സെറ്റിങ്സ് റീസെറ്റ് ചെയ്യാം

മുകളിൽ പറഞ്ഞ വഴികളെല്ലാം നിങ്ങൾ പരീക്ഷിച്ച് നോക്കിയിട്ടുണ്ടാകാം. എന്നിട്ടും നെറ്റ്‌വർക്ക് ശരിയായി പ്രവർത്തിക്കുന്നില്ലെങ്കിൽ ഫോണിലെ നെറ്റ്‌വർക്ക് സെറ്റിങ്സ് റീസെറ്റ് (Reset) ചെയ്തു നോക്കാം. ഇത് ചെയ്താൽ ഫോണിലെ മുഴുവൻ വിവരങ്ങളും നഷ്ടപ്പെടുമെന്ന് പലരും കരുതാറുണ്ട്, എന്നാൽ അങ്ങനെയല്ല. ഐഫോണിൽ Settings > General > Transfer or Reset iPhone > Reset > Reset Network Settings എന്ന ക്രമത്തിൽ പോയി സ്ക്രീനിൽ കാണുന്ന നിർദ്ദേശങ്ങൾ പാലിക്കുക. സെറ്റിങ്സിലെ തെറ്റുകൾ മൂലമോ ഫോണിലെ ബഗുകൾ മൂലമോ ഉണ്ടാകുന്ന റേഞ്ച് പ്രശ്നങ്ങൾ പരിഹരിക്കാൻ ഇത് സഹായിക്കും.

സിം കാർഡ് ഊരി വൃത്തിയാക്കുക അല്ലെങ്കിൽ മാറ്റുക

ഇതിനുശേഷവും സിഗ്നൽ ലഭിക്കുന്നില്ലെങ്കിൽ ഫോണിൽ നിന്ന് സിം കാർഡ് പുറത്തെടുക്കുക. സിം കാർഡും സിം ട്രേയും ഉണങ്ങിയ തുണി ഉപയോഗിച്ച് തുടച്ച് വൃത്തിയാക്കി വീണ്ടും ഫോണിൽ ഇടുക. ചിലപ്പോൾ സിം കൃത്യമായി ഇരിക്കാത്തത് കൊണ്ടും നെറ്റ്‌വർക്ക് തടസ്സപ്പെടാം. ഇതോടെ പ്രശ്നം പരിഹരിക്കപ്പെടേണ്ടതാണ്. എന്നിട്ടും സിഗ്നൽ കിട്ടുന്നില്ലെങ്കിൽ പുതിയ സിം കാർഡിലേക്ക് മാറേണ്ടി വരും. സിം കാർഡും ഒരു ഇലക്ട്രോണിക് ചിപ്പായതിനാൽ അതിന് തകരാറുകൾ സംഭവിക്കാം. പുതിയ സിം എടുക്കുന്നത് ഇതിന് പരിഹാരമായേക്കാം.