ഇസ്രായേൽ ആക്രമണത്തിൽ കൊല്ലപ്പെട്ട അൽ ജസീറ മാധ്യമപ്രവർത്തകർക്ക്​ കണ്ണീരോടെ വിട നൽകി ഫലസ്തീൻ ജനത

തെൽ അവിവ്: ഇസ്രായേൽ ആക്രമണത്തിൽ കൊല്ലപ്പെട്ട അൽ ജസീറയുടെ അഞ്ച് മാധ്യമപ്രവർത്തകർക്ക്​ കണ്ണീരോടെ വിട നൽകി ഫലസ്തീൻ ജനത. കൊലക്കെതിരെ വ്യാപക പ്രതിഷേധമാണ് ഉയരുന്നത്. വിഷയത്തിൽ നിഷ്പക്ഷ അന്വേഷണം വേണമെന്ന്​ യുഎൻ സെക്രട്ടറി ജനറൽ അന്‍റോണിയോ ഗുട്ടറസ്​ആവശ്യപ്പെട്ടു. ഇസ്രായേലുമായുള്ള നിക്ഷേപ ബന്ധം പുനഃപരിശോധിക്കുമെന്ന്​ നോർവെ അറിയിച്ചു. ഗസ്സ കീഴ്പ്പെടുത്താനുള്ള ഇസ്രായേൽ പദ്ധതി ചെറുക്കാൻ യൂറോപ്യൻ യൂണിയൻ തയാറാകണമെന്ന്​ സ്പെയിൻ ആവശ്യപ്പെട്ടു. അതിനിടെ, ഭക്ഷണം കാത്തുനിന്നവരുൾപ്പെടെ 48 പേർ കൂടി ഇസ്രായേൽ ആക്രമണത്തിൽ കൊല്ലപ്പെട്ടു.

ഇസ്രായേൽ വ്യോമാക്രമണത്തെ തുടർന്ന് ഗസ്സ സിറ്റിയിൽ കൊല്ലപ്പെട്ട അൽ ജസീറയുടെ അഞ്ച്​ മാധ്യമപ്രവർത്തകരുടെ മൃതദേഹം സംസ്കരിച്ചു. ഭീഷണി വകവെക്കാതെ ഇസ്രായേൽ ക്രൂരത നിരന്തരമായി ലോകത്തിനു മുമ്പാകെ അവതരിപ്പിച്ച മാധ്യമ പോരാളികൾക്ക്​ ഗസ്സ ജനത കണ്ണീരോടെ​ വിട നൽകി​. അൽ ജസീറ അറബിക് കറസ്പോണ്ടന്‍റ് അനസ് അൽ ഷരീഫ്, കറസ്പോണ്ടന്‍റ് മുഹമ്മദ് റെയ്ഖ്, ക്യാമറ ഓപറേറ്റർമായ ഇബ്രാഹിം സഹീർ, മുഹമ്മദ് നൗഫൽ, മോഅമീൻ അലിവ എന്നിവരാണ്​ കൊല്ലപ്പെട്ടത്​. ആസൂത്രിതമായിരുന്നു ആക്രമണമെന്ന്​ ഇസ്രായേൽ സ്ഥിരീകരിച്ചു. സംഭവത്തെ കുറിച്ച്​ നിഷ്പക്ഷ അന്വേഷണം വേണമെന്ന്​ യുഎൻ സെക്രട്ടറി ജനറൽ അന്‍റോണിയോ ഗുട്ടറസ്​ പറഞു. ഗസ്സയിൽ നൂറുകണക്കിന്​ മാധ്യമപ്രവർത്തകരെ ആസൂത്രിതമായി കൊലപ്പെടുത്തിയതിനു പിന്നിലെ ഇസ്രായേൽ ലക്ഷ്യം വ്യക്​തമാണെന്ന്​ യു.എൻ മനുഷ്യാവകാശ സമിതി കുറ്റപ്പെടുത്തി.

ഭൂരിഭാഗം യൂറോപ്യൻ രാജ്യങ്ങളും ആക്രമണത്തെ അപലപിച്ചു. ലോകരാജ്യങ്ങൾ ഇസ്രായേലിനെതിരെ ശക്​തമായ നടപടി സ്വീകരിക്കണമെന്ന്​ ആഗോള മാധ്യമ കൂട്ടായ്മകൾ ആവശ്യപ്പെട്ടു. അതിനിടെ, ഗസ്സയിൽ ഇസ്രായേൽ കുരുതി ഇന്നലെയും തുടർന്നു. ഭക്ഷണത്തിന്​ കാത്തുനിന്ന 6 പേരുൾപ്പെടെ 48പേരെ​ ഇസ്രായേൽ കൊന്നുതള്ളി. കഴിഞ്ഞ ആറ്​ മാസത്തിനിടെ, ഇസ്രായേൽ ആക്രമണത്തിൽ പരിക്കേറ്റ 2500 പേർ ചികിൽസ ലഭിക്കാതെ മരണപ്പെട്ടതായി ഗസ്സ സിവിൽ ഡിഫൻസ്​ വിഭാഗം അറിയിച്ചു. രക്ഷാപ്രവർത്തനത്തിന്​​ ഇസ്രായേൽ ഏർപ്പെടുത്തിയ വിലക്കാണ്​ ഇവരുടെ മരണത്തിന്​ വഴിയൊരുക്കിയത്​.

ഇസ്രാ​യേലുമായുള്ള നിക്ഷേപ ബന്ധം പുനഃപരിശോധിക്കുമെന്ന് നോർവെ മുന്നറിയിപ്പ്​ നൽകി. ഗസ്സയെ സൈനികമായി കീഴ്​പ്പെടുത്തുന്ന ഇസ്രായേൽ പദ്ധതി അങ്ങേയറ്റം മനുഷ്യത്വവിരുദ്ധമാണെന്നും സയണിസ്റ്റ്​ രാജ്യത്തിനെതിരെ കടുത്ത നിലപാട്​ സ്വീകരിക്കാൻ ഇയു രാജ്യങ്ങൾ തയാറാകണമെന്നും സ്​പെയിൻ ആവശ്യപ്പെട്ടു.