അമേരിക്കൻ ബന്ദിയേയും നാല് ബന്ദികളുടെ മൃതദേഹവും കൈമാറുമെന്ന് ഹമാസ്

ഗസ്സസിറ്റി: യുഎസ്​ ബന്ദിയെ കൈമാറുമെന്ന് അറിയിച്ച് ഹമാസ്​. അമേരിക്കയുമായി ചർച്ചയെ തുടർന്നാണ് തീരുമാനം.

അമേരിക്കൻ-ഇസ്രായേലി ബന്ദിയായ ഈഡൻ അലക്സാണ്ടർ എന്ന സൈനികന്റെയും നാല് ബന്ദികളുടെ മൃതദേഹവും വിട്ടുനൽകുമെന്നാണ് ഹമാസ് അറിയിച്ചത്. ഇസ്രായേൽ-ഹമാസ് വെടിനിർത്തലിന്റെ അടുത്ത ഘട്ടം സംബന്ധിച്ച് ഖത്തറിൽ ചർച്ച തുടരുന്നതിനിടെയാണ് ഹമാസ്​ പ്രഖ്യാപനം. എന്നാല്‍ എപ്പോഴാണ് കൈമാറുകയെന്ന് ഹമാസ്​ വ്യക്തമാക്കിയിട്ടില്ല.

ഹമാസുമായി നേരിട്ട് ചർച്ചയില്ലെന്ന പരമ്പരാഗത നിലപാട് അമേരിക്ക ഉപേക്ഷിച്ചത്​ ഇസ്രായേലിന്‍റെ കടുത്ത എതിർപ്പിന്​ ഇടയാക്കിയിട്ടുണ്ട്​.

ഇതിനിടെ വെടിനിർത്തലുമായി ബന്ധപ്പെട്ട്​ ഇസ്രായേൽ-ഹമാസ്​ ഭിന്നത തീർക്കാൻ പുതിയ നിർദേശം സമർപ്പിച്ചതായി യുഎസ്​ പശ്ചിമേഷ്യന്‍ പ്രതിനിധി സ്റ്റിവ്​ വിറ്റ്​കോഫ്​ പറഞ്ഞു. നിലവിലെ വെടിനിർത്തൽ ഒന്നോ രണ്ടോ മാസത്തേക്ക്​ കൂടി ദീർഘിപ്പിക്കുകയും തുടർന്ന്​ ശാശ്വത സമാധാന ചർച്ചയുമാണ്​ യുഎസ്​ നിർദേശമെന്നാണ്​ സൂചന. ഹമാസ്​ നിലപാടുകൾ തികച്ചും അപ്രായോഗികമാണെന്നും സ്റ്റിവ്​ വിറ്റ്​കോഫ്​ കുറ്റപ്പെടുത്തി.

അതേസമയം ഗസ്സയിൽ ഭക്ഷ്യ,​ കുടിവെള്ളക്ഷാമം രൂക്ഷമായതോടെ ആയിരങ്ങൾ മരണമുഖത്താണെന്ന്​ യുഎൻ ഏജൻസികൾ മുന്നറിയിപ്പ്​ നൽകി. ഗസ്സ യുദ്ധത്തിൽ ഇസ്രായേൽ സേന ലൈംഗികാതിക്രമങ്ങൾ നടത്തുന്നത് ചൂണ്ടിക്കാട്ടി യു.എൻ മനുഷ്യാവകാശ കൗൺസിൽ റിപ്പോർട്ട് പുറത്തിറക്കി.